កីឡាហាប់គីដូ ឈ្នះមេដាយ៣៥គ្រឿង ពីព្រឹត្តិការណ៍ជើងឯកអាស៊ីលើកទី៣នៅប្រទេសចិន
- ភ្នំពេញ
រាជធានីភ្នំពេញ៖ប្រតិភូកីឡាហាប់គីដូកម្ពុជា បានវិលត្រឡប់មកដល់កម្ពុជាវិញហើយកាលពីយប់ថ្ងៃទី១៧ខែសីហាឆ្នាំ២០២៥ ដោយដណ្ដើមបានមេដាយចំនួន៣៥គ្រឿងពីព្រឹត្តិការណ៍ជើងឯកអាស៊ីលើកទី៣នៅទីក្រុងហុងកុងសាធារណរដ្ឋប្រជាមានិតចិន។
លោកគង់ ចាន់ធីណា អគ្គលេខាធិការសហព័ន្ធកីឡាហាប់គីដូកម្ពុជាបានមានប្រសាសន៍ឱ្យដឹងនៅអាកាសយានដ្ឋានអន្តរជាតិមរតកតេជោកាលពីយប់ថ្ងៃទី១៧ ខែសីហា ថា នេះជាលើកទី១ហើយដែលសហព័ន្ធកីឡាហាប់គីដូកម្ពុជា ទៅចូលរួមប្រកួតជើងឯកកម្រិតអាស៊ី ខណៈព្រឹត្តិការណ៍មួយនេះបានដំណើរការទៅចំនួន២លើករួចមកហើយ។ទោះជាយ៉ាងណាសម្រាប់ដំណើរការប្រកួតនេះអត្តពលិកកម្ពុជា ខិតខំប្រឹងប្រែងអស់ពីកម្លាំងកាយចិត្ត រហូតដណ្ដើមបានជ័យជម្នះដ៏ធំធេងនិងជាប្រវត្តិសាស្ត្រជូជាតិ ដែលបាននាំមកជាមួយនូវមេដាយចំនួន៣៥គ្រឿង។ក្នុងនោះមេដាយចំនួន១២គ្រឿង មេដាយប្រាក់ចំនួន៩គ្រឿងនិងមេដាយសំរឹទ្ធចំនួន១៤គ្រឿង។
លោកអគ្គលេខាធិការរូបនេះបានបន្តឱ្យដឹងទៀតថា នេះជាមោទនភាពខ្លាំងណាស់សម្រាប់កម្ពុជា ជាពិសេសបានការគាំទ្រពីក្រសួងអប់រំយុវជនិងកីឡា គណៈកម្មាធិការជាតិអូឡាំពិកកម្ពុជា និងបានការយកចិត្តទុកដាក់ពីសហព័ន្ធកីឡាហាប់គីដូកម្ពុជា ដែលបានជួយឧបត្ថម្ភគាំទ្រជាថវិការ ក្នុងការចេញដំណើរទៅចូលរួមប្រកួតតាំងពីដើមដល់ចប់និងទទួលបានជោគជ័យយ៉ាងត្រចះត្រចង់។
លោកបានសង្កត់ធ្ងន់ថា សម្រាប់ការប្រកួតនេះផងដែដែរអត្តពលិកកម្ពុជាធ្វើបានល្អខ្លាំងណាស់ ទោះបីជាយើងត្រូវប៉ះជាមួយគូប្រកួតខ្លាំងៗមកពីតាមបណ្ដាប្រទេសមួយចំនួន ដែលគេខ្លាំងៗដែរ។ ជាពិសេសការឆ្លងកាត់តាំងពីវគ្គជម្រុះរហូតឈានទៅដណ្ដើមយកមេដាយមាស។ហើយអ្វីដែលកីឡាហាប់គីដូកម្ពុជាទទួលបានថ្ងៃនោះ កាន់តែធ្វើឱ្យកីឡាហាប់គីដូមានឈ្មោះបោះសម្លេងកាន់តែល្បីរន្ទឺរទាំងនៅថ្នាក់ជាតិនិងអន្តរជាតិ។មិនតែប៉ុណ្ណោះចង់បង្ហាញឱ្យឃើញថាប្រភេទកីឡាហាប់គីដូពេលនេះ ក្លាយជាប្រភេទកីឡាដ៏មានសក្ដានុពលមិនចាញ់ប្រភេទកីឡាដែលមានសក្ដានុពលដ៏ទៃទៀតនោះទេ៕
ចែករំលែកព័តមាននេះ