ខេត្តព្រះសីហនុ ៖ យុវជនម្នាក់ត្រូវបាន គេប្រទះឃើញស្លាប់នៅក្នុងប្រឡាយដោយមានស្នាមជាំខៀវពេញផ្ទៃមុខ និងដងខ្លួន ដែលការស្លាប់នេះត្រូវគេអះអាងថា បណ្តាលមកពីរឿងឪពុកស្តីបន្ទោសព្រោះតែរូបគេដើរលេងច្រើនពេក រួចក៏លេបថ្នាំសម្លាប់ខ្លួន ។ ហេតុការណ៍នេះបានកើតឡើងកាលពីថ្ងៃទី២០ កុម្ភៈ វេលាម៉ោង៧ព្រឹក នៅភូមិស្រែចាមក្រោម ឃុំអូរជ្រៅ ស្រុកព្រៃនប់ ។
តាមឪពុកបង្កើតឈ្មោះយិន សុខ បានឱ្យដឹងថា កូនប្រុសគាត់ដែលស្លាប់នេះឈ្មោះសុខ ឧត្តម អាយុ២៤ឆ្នាំ នៅលីវ រស់នៅជាមួយគាត់ក្នុងភូមិខាងលើ ។ កូនប្រុសរបស់គាត់នេះបានលេបថ្នាំបំពុលសត្វល្អិតមិនដឹងថា បានមកពីណាទេសម្លាប់ខ្លួន បណ្តាលឱ្យស្លាប់យ៉ាងអាណោចអាធ័មព្រោះតែខឹងរូបគាត់ជាឪពុកស្តីបន្ទោសបន្តិចបន្តូចព្រោះតែគេដើរមិនចូលផ្ទះ ។
បុរសជាឪពុកបន្តទៀតថា មុនកើតហេតុ២ថ្ងៃរូបគាត់បានស្តីបន្ទោស និងហាមកុំឱ្យដើរលេងច្រើនពេក មិនល្អទេ ថែមទាំងយករំពាត់តូចមួយមកវាយមួយរំពាត់ដែរ តែមិនបណ្តាលឱ្យរបួសអ្វីទេ ។ រហូតមកដល់ព្រលប់មុនពេលប្រទះឃើញសពកូនគាត់រូបនេះ គឺគេបានបាត់ពីផ្ទះ តែពួកគាត់មិនសូវចាប់អារម្មណ៍ទេ ព្រោះស្មានថាកូនទៅជួយការគេក្បែរផ្ទះ (ចម្ងាយប្រមាណ២០០ម៉ែត្រ) ស្រាប់តែព្រឹកឡើងមានគេប្រាប់ថា ឃើញកូនគាត់ស្លាប់នៅក្នុងប្រឡាយចម្ងាយពីផ្ទះប្រហែល៣០ម៉ែត្រ និងឃើញមានផ្តិលទឹកមួយ បារីសេក១កញ្ចប់ និងថ្នាំបំពុលសត្វល្អិតប្រភេទគ្រាប់តូចៗ ព្រមទាំងស្លាបព្រាខ្លីចំនួន១ផងដែរ ។ ស្ថានភាពសព មានសភាពខៀវពេញខ្លួនប្រាណទាំងអស់ ដោយសារជាតិថ្នាំពុល ។
ពេលសមត្ថកិច្ចចម្រុះទៅពិនិត្យសពឃើញមានលិខិត១ច្បាប់សរសេរនៅសំបុត្រការដែលគេសន្និដ្ឋានថា ជាពាក្យបណ្តាំទុកក្នុងហោប៉ៅខោ ។ អត្ថន័យក្នុងលិខិតនោះគេបានសរសេរដោយសុំអភ័យទោសសម្រាប់ក្រុមគ្រួសារទាំងអស់គ្នា និងសូមនៅឱ្យបានសេចក្តីស្ងប់ចិត្ត ។ រូបគេក៏បានសូមអភ័យទោសរឿងគ្រប់យ៉ាងដែលគេជាអ្នកបង្កើត និងបញ្ចប់ទៅវិញយ៉ាងឆាប់រហ័ស ហើយបានផ្តាំទៅបងស្រីបង្កើតឈ្មោះមុំថា «មុំយប់មិញ ប៉ាខឹងអញ គាត់ឈប់រាប់អញជាកូន គាត់បណ្តេញអញចេញពីផ្ទះ តែអញអត់ហ៊ានចេញទេ » ។ ក្នុងលិខិតក៏បានផ្តាំថា «បើខ្ញុំស្លាប់ ពេលខ្ញុំស្លាប់កុំចាក់ស្មូតឱ្យសោះ បើមិនមានលុយធ្វើបុណ្យទេមិនបាច់ធ្វើក៏បាន តែបើសិនជាធ្វើបុណ្យវិញ សូមចាក់បទហ្គាណាំស្តាយ (Style) ឬភ្លេងការ» ។
នេះគឺជាបណ្តាំមួយចម្លែកមិនធ្លាប់មានទេ ។ ចំពោះបណ្ដាំនេះឪពុកម្ដាយក៏មិនបានចាក់ស្មូតទេតែបានចាក់ភ្លេងពិណពាទ្យជំនួស ឯភ្លេងការនិងហ្គាណាំស្ដាយក៏ចាក់ឱ្យតាមបណ្ដាំដែរ តែមិនចាក់ច្រើនទេ ៕
ចែករំលែកព័តមាននេះ