ខេត្តព្រៃវែង ៖ ផ្ទះឈើមួយខ្នងត្រូវបានអគ្គីភ័យលេបត្របាក់អស់ទាំងស្រុងដោយសារតែផ្ទុះស្សេទូរទស្សន៍ ដែលចៅម្ចាស់ផ្ទះកំពុងបើកមើល ខណៈជីតា និងយាយនាំគ្នាទៅស្រែបាត់អស់ ។ ហេតុការណ៍នេះបានកើតឡើងកាលពីវេលាម៉ោង៤និង៤៥នាទីល្ងាច ថ្ងៃទី៣១ ឧសភា…
ខេត្តព្រៃវែង ៖ ផ្ទះឈើមួយខ្នងត្រូវបានអគ្គីភ័យលេបត្របាក់អស់ទាំងស្រុងដោយសារតែផ្ទុះស្សេទូរទស្សន៍ ដែលចៅម្ចាស់ផ្ទះកំពុងបើកមើល ខណៈជីតា និងយាយនាំគ្នាទៅស្រែបាត់អស់ ។ ហេតុការណ៍នេះបានកើតឡើងកាលពីវេលាម៉ោង៤និង៤៥នាទីល្ងាច ថ្ងៃទី៣១ ឧសភា នៅក្នុងភូមិកំភា ឃុំរំលេច ស្រុកស៊ីធរកណ្តាល ខេត្តព្រៃវែង ។ ផ្ទះដែលត្រូវភ្លើងឆេះនេះជាប្រភេទផ្ទះឈើ ជញ្ជាំងក្តារប្រក់ស័ង្កសី ទំហំ៦ម៉ែត្រគុណនឹង៧ម៉ែត្រ មានម្ចាស់ឈ្មោះ វ៉ា នឹន ភេទប្រុស អាយុ៦៨ឆ្នាំ និងប្រពន្ធឈ្មោះ ច្រឹក ស្រ៊ី អាយុ៦៦ឆ្នាំ ។
ប្រភពព័ត៌មានពីសមត្ថកិច្ចមូលដ្ឋានបានអោយដឹងថា យោងតាមចម្លើយរបស់កុមារីអាយុ៧ឆ្នាំដែលត្រូវជាចៅស្រីម្ចាស់ផ្ទះបានអោយដឹងថា មុនពេលកើតហេតុនោះជីតា និងជីដូនរបស់គេបាននាំគ្នាទៅវាលស្រែអស់ទុកអោយរូបនាងនៅផ្ទះម្នាក់ឯង ហើយដោយអផ្សុកពេកនាងក៏បើកទូរទស្សន៍មើលនៅលើផ្ទះម្នាក់ឯង ហើយពេលមើលបានបន្តិចស្រាប់តែឃើញមានផ្កាភ្លើងខ្ទាតចេញពីក្នុងទូរទស្សន៍ និងកើតទៅជាភ្លើងឆេះទូរទស្សន៍តែម្តង ។
ប្រភពដដែលនេះបានបន្តទៀតថា ភ្លាមៗនោះរូបនាងក៏រត់ចេញពីផ្ទះទៅហៅអ្នកស្រុកជិតខាងអោយមកជួយកើតជាហេតុការណ៍ឆោឡោឡើង និងរាយការណ៍ប្រាប់ទៅសមត្ថកិច្ចអោយជួយអន្តរាគមន៍ ប៉ុន្តែទម្រាំតែសមត្ថកិច្ច និងរថយន្តពន្លត់អគ្គីភ័យមកដល់អណ្តាតភ្លើងបានលេបត្របាក់ផ្ទះអស់ទាំងស្រុងទៅហើយ ឡានទឹកបានត្រឹមបាញ់ពន្លត់កុំអោយរាលដាលដល់ផ្ទះអ្នកជិតខាងប៉ុណ្ណោះ ។
ដោយឡែកម្ចាស់ផ្ទះបានអោយដឹងថា គ្រោះអគ្គីភ័យនេះមិនបានបណ្តាលអោយមានគ្រោះថ្នាក់ដល់មនុស្សសត្វទេ ដោយគ្រាន់តែធ្វើអោយខូចខាតទ្រព្យសម្បត្តិរួមមាន ទូរទស្សន៍មួយ ខោអាវ ចានឆ្នាំង មាស២តំឡឹង លុយ៤លានរៀល និងទ្រព្យសម្បត្តិក្នុងផ្ទះមួយចំនួនទៀត ដែលសរុបជាទឹកប្រាក់ប្រមាណជា៣០លានរៀល ៕
ចែករំលែកព័តមាននេះ