ខេត្តត្បូងឃ្មុំ ៖ ស្របពេលដែលច្បាប់កាន់តែតឹងនោះ ក្រុមឈ្មួញខិលខូចតែងតែមានល្បិចកាន់តែខ្ពស់
ដោយបានរកស៊ីដឹកឈើប្រណីត និងឈើអារបង្កប់ក្រោមរូបភាពផ្សេងៗតាមរថយ្តតូចធំ ដែលកម្រនឹងមានអ្នកដឹង។ ជាក់ស្តែងមានរថយន្តវេងទ្រុងវែងប្រភេទម៉ាកហ៊ីយ៉ានដាយ១គ្រឿង ពាក់ស្លាកលេខ រតនៈគិរី 3A-0095 មកឈប់ចតនៅត្រង់ចំណុចផ្លូវចូលច្រកទន្លេចាម ក្នុងភូមិខ្ជាយ ឃុំជាំក្រវៀន ស្រុកមេមត់ នាព្រឹកថ្ងៃទី៣១ ឧសភា ២០១៨ ដឹកចំនៀរបង្កប់ឈើអារជាច្រើនម៉ែត្រ គូបត្រូវបានបង្ក្រាប។ លោកឧត្តមសេនីយ៍ទោ បែន រ័ត្ន ស្នងការគរបាលខេត្តបានឲ្យដឹងថា នៅវេលាម៉ោង៥ព្រឹក ថ្ងៃខាងលើកម្លាំងអធិការដ្ឋានគរបាលស្រុកមេមត់ ដឹកនាំដោយលោក អនុសេនីយ៍ឯក ឡេង ពៅ នាយរងផ្នែកសន្តិសុខសហការជាមួយកម្លាំងបរិស្ថាន នគរបាលសេដ្ឋកិច្ច សង្កាត់រដ្ឋបាលព្រៃឈើមេមត់ និងលោកព្រះរាជអាជ្ញារងអមសាលាដំបូងខេត្ត បានឃាត់រថយន្ត១គ្រឿង នេះ ដឹកចំនៀរឈើបង្កប់ឈើអារ។
មន្ត្រីរដ្ឋបាលព្រៃឈើវិញបានប្រាប់ឲ្យដឹងដែរថា រថយន្តធុនយក្សនេះ អាចមានប្រភពចេញមកពីខេត្តមណ្ឌលគិរី ដោយឆ្លងកាត់ស្រុកស្នួល ខេត្តក្រចេះ មានដឹកចំនៀរឡើងពេញប្រៀបតែម្តង។ ស្របពេលដែលមកដល់ត្រង់ចំណុចឃុំជាំក្រវៀន មានកម្លាំងបរិស្ថានរួមនឹងស្ថាប័នផ្សេងៗទៀត បានឃាត់រថយន្ត នោះនៅលើផ្លូវជាតិលេខ៧ ដែលមិនទាន់បត់ក្បាលចូលទៅច្រកទន្លេចាមនោះទេ។ ការដឹកចំនៀរមិនល្មើសច្បាប់ ហើយក៏មិនបាច់សុំច្បាប់ដឹកជញ្ជូនអនុផលព្រៃឈើ(PC) ដោយសម្អាងតែមិនមានដឹកឈើ
ប៉ុន្តែផ្ទុយទៅវិញរថយន្ត១គ្រឿងនេះ នៅពេលដែលមានបញ្ជាពីលោកនាយខណ្ឌ និងលោកព្រះរាជអា
ជ្ញាអមសាលាដំបូងខេត្ត ត្រូវបានឃាត់ចាត់ការតាមច្បាប់។
ជាមួយនោះអ្នកបើកបររថយន្តវិញបានរត់គេចខ្លួនបាត់ ក្នុងពេលដែលអូសរថយន្តនេះ ដោយមានកិច្ចសហការជាមួយនឹងអាវុធហត្ថស្រុកមេមត់មកដាក់នៅឃ្លាំងទន្លេបិទ លុះពេលដែលជួលកម្មករជាច្រើននាក់មកលើចំនៀរចេញ ស្រាប់តែប្រទះឃើញមានឈើអារបង្កប់នៅផ្នែកកណ្តាលជាច្រើនម៉ែត្រគូប។ សូមបញ្ជាក់ថា នៅរាល់ថ្ងៃនេះសង្កេតឃើញមានក្រុមឈ្មួញមួយចំនួន បានប្រើប្រាស់រថយន្តប្រភេទសាំងយ៉ុងដឹកឈើប្រណីតចេញពីភូមិសាស្ត្រស្រុកស្នួល ខេត្តក្រចេះ ចូលមកស្រុកមេមត់ ចេញតាមច្រកចាន់មូល ស្ទើរតែរាល់ថ្ងៃចេញទៅប្រទេសវៀតណាម ហើយឈ្មួញទាំងនោះត្រូវបានគេស្គាល់មុខដដែលៗដូចពាក់អាវមិនដែលឃើញដោះ៕
https://youtu.be/y0Z7MqgxJNg
ចែករំលែកព័តមាននេះ