រាជធានីភ្នំពេញ ៖ រថយន្តម៉ាក Masda មួយគ្រឿងបានជ្រុលចង្កូតបុកម៉ូតូក្នុងទិសដៅបញ្ច្រាសគ្នា ហើយ ជ្រុលទៅបុកចូលរោងលក់បាយកល់ជាប់ទៅមុខលែងរួច។ នៅក្នុងគ្រោះថ្នាក់នេះបណ្តាលឲ្យបុរស ជាអ្នកបើកបរម៉ូតូបានរងរបួសប្រអប់ជើងធ្ងន់ធ្ងរ។ ហេតុការណ៍គ្រោះថ្នាក់នេះបង្កឲ្យមានការភ្ញាក់ផ្អើកាលពី ម៉ោង១ និង៣០នាទីរសៀល ថ្ងៃទី៣១ ខែឧសភា ឆ្នាំ២០១៨ នៅចំណុចផ្លូវបេតុង ក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ។ អ្នករងរបួសមិនត្រូវស្គាល់ឈ្មោះឡើយ ត្រូវបានបងប្អូនដឹកតាមរថយន្តផ្ទាល់ខ្លួនទៅមន្ទីរពេទ្យ។ ចំណែក រថយន្តបង្កម៉ាកMasda ពណ៌ត្រេអ៊ី ពាក់ស្លាកលេខ ខេមរភូមិន្ទ 02.2-9441 បើកបរដោយបុរសម្នាក់ពុំស្គាល់ អត្តសញ្ញាណឡើយ។
តាមព័ត៌មានបានឲ្យដឹងថា នៅមុនកើតហេតុឃើញបុរសម្នាក់ បានជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ តែម្នាក់ឯង ធ្វើដំណើរក្នុងទិសដៅពីជើងទៅត្បូង ខណៈមកដល់ចំណុចកើតហេតុ ស្រាប់តែមានរថយន្តមួយគ្រឿងម៉ាក Masda ពណ៌ត្រេអ៊ីពាក់ស្លាកលេខ ខេមរភូមិន្ទ បើកបរមកពីទិសខាងត្បូង ក្នុងល្បឿនលឿន មកបុកម៉ូតូពេញទំហឹង បណ្តាលឲ្យខ្ទេចទៅម្ខាងផ្លូវ ហើយរថយន្តក៏បានរេចង្កូត ជ្រុលទៅបុកចូលរោងលក់បាយពេញទំហឹង ហើយជាប់ទៅមុខលែងរួច។ នៅក្នុងគ្រោះថ្នាក់នោះបណ្តាលឲ្យ អ្នកបើកម៉ូតូបានរងរបួសជើងខាងឆ្វេងបែកចេញខួរឆ្អឹងជាប់ម៉ូតូរងរបួសធ្ងន់។
ចំណែកអ្នកបើកបររថយន្តបង្កមិនមានរងរបួសឡើយ។ នេះចាត់ទុកជាសំណាង ដែលរោងលក់បាយ ថ្ងៃនោះពុំមានមនុស្សអង្គុយ ព្រោះម្ចាស់បានលក់បាយអស់រៀបចំអីវ៉ាន់ទុកអស់ ស្រាប់តែរថយន្តបុកចូលតែម្តង ។ ភ្លាមៗនោះអ្នករងរបួសត្រូវបានបងប្អូនបញ្ជូនទៅកាន់មន្ទីរពេទ្យ។ ដោយឡែករថយន្តបង្ក និងម៉ូតូត្រូវបានសមត្ថកិច្ច វាស់វែងយកទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញរង់ចាំដោះស្រាយ៕
https://www.youtube.com/watch?v=MxSNbMzbaMQ
ចែករំលែកព័តមាននេះ