អ្នកប្រាជ្ញមាននិទស្សន៍ថា ធម៌ដែលគួរដឹងគួរឃើញនោះមានច្រើនយ៉ាង តែរួបរួមដោយខ្លីមានត្រឹម២យ៉ាងគឺ ធម៌ដែលគួរលះវៀរ១ និងធម៌ដែលគួរធ្វើឱ្យកើតមាន១ ។
ធម៌ដែលគួរលះវៀរនោះគឺទុច្ចរិត សេចក្តីប្រព្រឹត្តអាក្រក់ដោយកាយ វាចា ចិត្ត ។ ទុច្ចរិតនេះ គួរដឹង គួរឃើញថាជាអកុសលធម៌មានទុក្ខទោស ដល់អ្នកប្រព្រឹត្តដោយចៀសមិនរួច អ្នកប្រាជ្ញមិនសរសើរឡើយ ។ បើអ្នកណាប្រព្រឹត្តឱ្យច្រើនហើយ ក៏បណ្តាលឱ្យផលដែលមិនជាប្រយោជន៍ និងសេចក្តីសុខដល់អ្នកនោះអស់កាលយូរអង្វែង ។
លុះដឹងឃើញផលងងឹតយ៉ាងនេះហើយ បុគ្គលគួរលះវៀរចេញឱ្យអស់ពីខន្ធសន្តាន ។ មួយទៀត ធម៌ដែលគួរធ្វើឱ្យកើតមាននោះ គឺសុចរិត សេចក្តីប្រព្រឹត្តល្អដោយកាយ វាចា ចិត្ត ។ សុចរិតនេះគួរដឹង គួរឃើញថាជាកុសលធម៌មិនមានទុក្ខទោសដល់អ្នកប្រតិបត្តិ អ្នកប្រាជ្ញទាំងឡាយរមែងសរសើរមិនដាច់ ។
បើអ្នកណាប្រព្រឹត្តឱ្យបរិបូរណ៍ហើយ ក៏នឹងឱ្យកើតប្រយោជន៍ និងសេចក្តីសុខដល់អ្នកនោះអស់កាលដ៏យូរ ។
លុះបុគ្គលដឹងឃើញលក្ខណៈល្អយ៉ាងនេះហើយគួរធ្វើឱ្យកើតមានឡើងជានិច្ចក្នុងអារម្មណ៍ចុះ ។
ចែករំលែកព័តមាននេះ