ដោយអំណាចនៃបញ្ញាញាណដ៏ក្រៃលែងនៃព្រះសម្ពុទ្ធចាក់ធ្លុះ និងសម្រេចកិច្ចសព្វបែបយ៉ាងឱ្យសត្វលោកទាំងឡាយបានសម្រេចមគ្គផលតាមឧបនិស្ស័យរៀងៗខ្លួន ព្រោះហេតុនោះបានជាមុននឹងឈានដល់ការទេសនាអប់រំប្រដៅមនុស្សណាម្នាក់ ព្រះបរមសាស្តារមែងប្រមើលមើលនូវឧបនិស្ស័យរបស់បុគ្គលនោះជាមុនសិន បើនិស្ស័យមនុស្សនោះត្រូវនឹងសាវកអង្គណា ព្រះភគវានឹងប្រើសាវកអង្គនោះឱ្យទៅប្រោះអប់រំប្រដៅ ឬបើឃើញថានិស្ស័យបុគ្គលនោះត្រូវនឹងព្រះអង្គ លោកក៏យាងទៅដោយព្រះអង្គឯងផ្ទាល់ ។ ការធ្វើយ៉ាងនេះគឺដើម្បីអនុគ្រោះដល់សត្វទាំងឡាយឆាប់បានសម្រេចមគ្គផលតាមសមគួរដល់ឧបនិស្ស័យរបស់ខ្លួន ។
ខាងក្រោមនេះជាពុទ្ធឱវាទ៤ចំណុច ដែលព្រះអង្គតែងអប់រំប្រដៅសព្វសត្វ ៖
១-ព្រះអង្គទ្រង់កំណត់ជ្រាបឆន្ទៈ គឺទ្រង់យល់ចិត្ត មានអធ្យាស្រ័យ ដឹងឧបនិស្ស័យរបស់មនុស្សដែលគួរប្រៀនប្រដៅ ហើយក៏ប្រដៅឱ្យល្មមសមគួរដល់បុគ្គលនោះ
២-ទ្រង់ប្រដៅធម៌ជាលំដាប់តាំងអំពីភូមិធម៌ជាន់ទាបឡើងទៅរហូតដល់ជាន់ខ្ពស់ដើម្បីប្រតិបត្តិងាយស្រួល
៣-ទ្រង់ជាអ្នកកាលញ្ញុតា ជ្រាបកាលវេលា កាន់យកធម៌ ឬលើកយកធម៌មកអប់រំដល់បុគ្គលនោះដ៏សមគួរដល់ឱកាសគួរប្រដៅ អប់រំគឺមិនវែងពេក មិនខ្លីពេក
៤-ទ្រង់ប្រកបព្រមដោយអង្គ៤ គឺអធិប្បាយឱ្យឃើញច្បាស់លាស់នូវអំពើល្អ, បបួលឱ្យមានចិត្តសមាទានកាន់យកដោយមិនងាករេ, ណែនាំឱ្យកើតឧស្សាហ៍អង់អាចដើម្បីនឹងធ្វើអំពើល្អ និងលើកស្ទួយឆន្ទៈឱ្យរីករាយក្នុងកិរិយាធ្វើតាម ។ ព្រោះយ៉ាងនេះហើយទើបហៅថាទ្រង់ប្រដៅជាអស្ចារ្យ ។
ចែករំលែកព័តមាននេះ