រាជធានីភ្នំពេញ ៖ បុរសម្នាក់ហេតុតែចង់បានរង្វាន់នៅក្នុងកំប៉ុងស្រាបៀរខំប្រឹងផឹកផ្សងសំណាងរហូតអស់ជាច្រើនកំប៉ុង បណ្តាលឱ្យស្រវឹង ទីបំផុតរកផ្លូវទៅផ្ទះលែងឃើញ បានចតម៉ូតូលើចិញ្ចើមផ្លូវជាតិអង្គុយទ្រោបដេកលើម៉ូតូធ្វើមិនដឹងអស់រយៈពេលជាង១ម៉ោង ហើយពលរដ្ឋដែលនៅក្បែរនោះមានការព្រួយបារម្ភ ព្រោះការឈប់ចត ហើយដេកលើម៉ូតូតាមចិញ្ចើមផ្លូវអាចប្រឈមនឹងគ្រោះថ្នាក់ ដោយហេតុថា…
រាជធានីភ្នំពេញ ៖ បុរសម្នាក់ហេតុតែចង់បានរង្វាន់នៅក្នុងកំប៉ុងស្រាបៀរខំប្រឹងផឹកផ្សងសំណាងរហូតអស់ជាច្រើនកំប៉ុង បណ្តាលឱ្យស្រវឹង ទីបំផុតរកផ្លូវទៅផ្ទះលែងឃើញ បានចតម៉ូតូលើចិញ្ចើមផ្លូវជាតិអង្គុយទ្រោបដេកលើម៉ូតូធ្វើមិនដឹងអស់រយៈពេលជាង១ម៉ោង ហើយពលរដ្ឋដែលនៅក្បែរនោះមានការព្រួយបារម្ភ ព្រោះការឈប់ចត ហើយដេកលើម៉ូតូតាមចិញ្ចើមផ្លូវអាចប្រឈមនឹងគ្រោះថ្នាក់ ដោយហេតុថា រថយន្តតូច-ធំឆ្លងកាត់ច្រើន ម្យ៉ាងយប់ងងឹត និងជាទីកន្លែងស្ងាត់ទៀត ខ្លាចកើតមានបញ្ហាណាមួយកើតឡើងចំពោះបុរសខាងលើ ទើបហៅប៉ូលិសមកជួយអន្តរាគមន៍កាលពីវេលាម៉ោង៩និង៤០នាទីយប់ ថ្ងៃទី៣០ ខែឧសភា ឆ្នាំ២០១៨ ស្ថិតនៅតាមផ្លូវជាតិលេខ៣ ខាងត្បូងជាប់សាលាសង្កាត់ភ្លើងឆេះរទេះ ភូមិព្រៃកី សង្កាត់ភ្លើងឆេះរទេះ ខណ្ឌពោធិសែនជ័យ ។
តាមពលរដ្ឋឃើញហេតុការណ៍បានឲ្យដឹងថា គេឃើញបុរសខាងលើជិះម៉ូតូមួយគ្រឿង ម៉ាកហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ កណ្តាល ១O-៦៨៨៦ តាមផ្លូវជាតិលេខ៣ ក្នុងទិសដៅពីជើងទៅត្បូង ជិះម៉ូតូទ្រេតទ្រោតរេពេញផ្លូវ លុះដល់ចំណុចខាងលើក៏រេទៅខាងឆ្វេងដៃទៅមុខលែងរួច ឈប់ម៉ូតូដេកលក់បាត់តាំងពីវេលាម៉ោង៨យប់ថ្ងៃទី៣០ ខែឧសភា ដេកលក់អស់ជាង១ម៉ោង ទើបពលរដ្ឋដាស់ឲ្យភ្ញាក់ ។
ក្រោយពីពលរដ្ឋដាស់ឲ្យបុរសខាងលើភ្ញាក់បានប្រាប់ថា គាត់ឈ្មោះ វីរៈ អាយុជាង៣០ឆ្នាំ មុខរបរកម្មកររោងចក្រ មានទីលំនៅភូមិប្រទះឡាង សង្កាត់ប្រទះឡាង ខណ្ឌដង្កោ ។ បុរសខាងលើបានប្រាប់ទាំងអាការៈស្រវឹងថា គាត់ផឹកព្រោះចង់បានរង្វាន់នៅក្រវិលកំប៉ុង ទើបគាត់ផឹកមួយកំប៉ុងហើយមួយកំប៉ុងទៀត អស់ជាច្រើនកំប៉ុង រហូតស្រវឹងកាន់តែខ្លាំង ហើយក៏ជិះម៉ូតូត្រឡប់ទៅផ្ទះ តែមិនដឹងខ្លួនឯងជិះដល់ត្រឹមណា ក៏ទ្រាំលែងបានទៅមុខលែងរួច ឈប់ម៉ូតូដេកតែម្តង ។
ដោយសារបារម្ភពីសុវត្ថិភាព ហើយបុរសខាងលើស្រវឹងទោទន់និយាយលែងដឹងខុសត្រូវ ទើបពលរដ្ឋរាយការណ៍ប្រាប់ប៉ូលិសមកជួយនាំបុរសខាងលើទៅកន្លែងមានសុវត្ថិភាព ហើយស្រាវជ្រាវរកសាច់ញាតិមកទទួលយកត្រឡប់ទៅវិញ៕
ចែករំលែកព័តមាននេះ