រាជធានីភ្នំពេញ ៖ អាជ្ញាធរាជធានីភ្នំពេញបានអះអាងថា ការបង់ពន្ធប្រថាប់ត្រាចំពោះការផ្ទេរកម្មសិទ្ធិអចលនទ្រព្យបន្តគ្នាច្រើនដង ត្រូវបានលើកលែងឲ្យបង់តែមួយដងប៉ុណ្ណោះ ក្រោយពីសម្តេចតេជោ នាយករដ្ឋមន្ត្រី បានអនុញ្ញាតឯកភាពជាគោលការណ៍។ ក្នុងពិធីផ្សព្វផ្សាយបន្ត ស្តីពីការផ្តល់អនុគ្រោះបង់ពន្ធប្រថាប់ត្រាតែមួយដងចំពោះដែលផ្ទេរកម្មសិទ្ធិអចលនទ្រព្យ ដែលបានចុះបញ្ជីរួច នៅសាលារាជធានីភ្នំពេញ កាលពីថ្ងៃទី៣០ ឧសភា ២០១៨នេះ លោក ឃួង ស្រេង អភិបាលរាជធានីភ្នំពេញ បានលើកឡើងថា ដោយពិនិត្យឃើញពីការលំបាករបស់បងប្អូនប្រជាពលរដ្ឋ និងដើម្បីជួយសម្រួលដល់ម្ចាស់កម្មសិទ្ធិអចលនទ្រព្យចុងក្រោយ ដែលពុំមានលទ្ធភាពបង់ពន្ធ ប្រថាប់ត្រាច្រើនដង គ្រប់ដំណាក់កាលនៃការផ្ទេរអចលនទ្រព្យ សម្តេចតេជោនាយករដ្ឋមន្ត្រី បានអនុញ្ញាតឯកភាពជាគោលការណ៍ ដើម្បីបន្តផ្តល់ការអនុគ្រោះបង់ពន្ធប្រថាប់ត្រាតែម្ដង លើការផ្ទេរកម្មសិទ្ធិអចលនទ្រព្យ បន្តដៃគ្នាពីម្នាក់ទៅម្នាក់ច្រើនដងនៅត្រឹមថ្នាក់សង្កាត់ខណ្ឌ ត្រឹមថ្ងៃទី៣១ ខែធ្នូ ឆ្នាំ២០១៨ប៉ុណ្ណោះ ដែលអាជ្ញាធរគ្រប់លំដាប់ថ្នាក់ត្រូវធ្វើការផ្សាព្វផ្សាយឲ្យបានទូលំទូលាយដល់ប្រជាពលរដ្ឋ។
លោក ឃួង ស្រេង បានជំរុញឲ្យអាជ្ញាធរខណ្ឌសង្កាត់ បើកការប្រជុំតាមភូមិ ហើយរដ្ឋបាលរាជធានីភ្នំពេញ ត្រូវធ្វើលិខិតជំនួយស្មារតីទៅភូមិ ដើម្បីផ្សព្វផ្សាទៅប្រជាពលរដ្ឋ សំខាន់កុំជះទឹកដាក់គ្នា ត្រូវតែរួមគ្នាធ្វើការងារនេះឲ្យបានល្អ ការផ្សព្វផ្សាយឲ្យប្រជាជនបានដឹង ឮដល់កម្រិតណានោះ អាជ្ញាធរខណ្ឌត្រូវរាយការណ៍មកក្រុងវិញ ដើម្បីរាយការណ៍បន្តទៅក្រសួងមហាផ្ទៃ។ លោក ឃួង ស្រេង បានបញ្ជាក់ថា កន្លងមក មានមន្ត្រីសុរិយោដីនៅខណ្ឌ វាស់វែងដីជូនប្រជាពលរដ្ឋមានការយឺតយ៉ាវ ហើយមានមន្ត្រីខ្លះមានការទារលុយគេថែមទៀត សូមឲ្យប្រយ័ត្នប្រយែងខ្លួន សូមកុំបង្កការលំបាកឲ្យប្រជាពលរដ្ឋទៀត។ អភិបាលរាជធានីភ្នំពេញ បានស្នើឲ្យចៅសង្កាត់ចុះដល់ផ្ទះប្រជាពលរដ្ឋ ដើម្បីចង់ដឹងពីការចង់បានរបស់ប្រជាពលរដ្ឋ យើងជួយប្រជាពលរដ្ឋឲ្យចំគោលដៅដែលពួកគាត់ចង់បាន។
លោក កែម សម្បត្តិ អគ្គនាយករងនៃអគ្គនាយកដ្ឋានពន្ធដារ បានលើកឡើងថា អគ្គនាយកដ្ឋានពន្ធដារ ជាសេនាធិការឲ្យក្រសួងសេដ្ឋកិច្ច និងហិរញ្ញវត្ថុ និងរដ្ឋាភិបាលក្នុងការប្រមូលពន្ធដើម្បីផលប្រយោជន៍ថ្នាក់ក្រោមជាតិ ដូច្នេះថ្នាក់ក្រោមជាតិត្រូវប្រឹងប្រែង ដើម្បីបានលុយមកអភិវឌ្ឍមូលដ្ឋានរបស់ខ្លួន។ លោកបន្តថា អគ្គនាយកដ្ឋានពន្ធដារបានធ្វើឲ្យមានភាព ងាយស្រួលឲ្យអ្នកបង់ពន្ធ ដូចជាការបង់ពន្ធតាមធនាគារជាដើម ដែលសម្រេចបានជោគជ័យ៦ឆ្នាំជាប់ៗគ្នា ធ្វើឲ្យការប្រមូលពន្ធមានការកើនឡើងជាបន្តបន្ទាប់ ជាពិសេសនៅភ្នំពេញ ចំណូលពន្ធបានច្រើនជាងគេ រហូតទៅដល់៩៣ទៅ៩៤ភាគរយផងដែរ៕
ចែករំលែកព័តមាននេះ