ប្រេងឆៅជាច្រើនដែលបាននាំចេញពីសហរដ្ឋអាមេរិក នឹងទៅដល់ប្រទេសថៃ និងប្រទេសផ្សេងទៀតនៅតំបន់អាស៊ី ក្នុងអំឡុងពេលប៉ុន្មានខែខាងមុខនេះ ដែលធ្វើឲ្យទីផ្សារកាន់តែតូចចង្អៀតសម្រាប់ប្រទេសរុស្ស៊ី និងប្រទេសផលិតប្រេងផ្សេងទៀតក្នុង OPEC ។
ការនាំចេញប្រេងពីសហរដ្ឋអាមេរិកទៅកាន់ប្រទេសថៃ នឹងកើនឡើងយ៉ាងហោចណាស់ ២លានធុង ។ សហរដ្ឋអាមេរិកអាចនឹងនាំចេញប្រេងបាន២,៣លានធុងក្នុង១ថ្ងៃ នាខែមិថុនាខាងមុខនេះ ហើយប្រេង១,៣លានធុងនឹងនាំចេញទៅកាន់តំបន់អាស៊ី ។ នេះបើតាមការប៉ាន់ស្មានរបស់អ្នកនាំចេញប្រេងអាមេរិក ។
តាមទិន្នន័យពីរដ្ឋបាលព័ត៌មានថាមពលបង្ហាញថា កាលពី២សប្តាហ៍មុន ការនាំចេញប្រេងរបស់អាមេរិកបានកើនឡើងដល់កម្រិតខ្ពស់ជាងគេ គឺនាំចេញបានចំនួន២,៦លានធុងក្នុង១ថ្ងៃ ។
អ្នកទិញប្រេងមកពីអាស៊ីអាគ្នេយ៍និយាយថា ៖« ពួកយើងកំពុងតែងាកទៅកាន់តំបន់ផ្សេងទៀត ។ ប្រសិនបើក្រុមហ៊ុន Saudi Aramco និងក្រុមហ៊ុន ADNOC (Abu Dhabi National Oil Company) នៅតែមិនព្រមទម្លាក់តម្លៃប្រេងរបស់ខ្លួននៅខែក្រោយទេ ពួកយើងនឹងបង្កើនការទិញប្រេងឆៅពីសហរដ្ឋអាមេរិក » ។
នៅអាស៊ី ចិនគឺជាប្រទេសនាំចូលប្រេងពីអាមេរិកច្រើនជាងគេ ។ ប្រភពមួយចំនួនថា បន្ទាប់ពីកាត់បន្ថយការនាំចូលប្រេងពីប្រទេសអារ៉ាប៊ីសាអូឌីត ក្រុមហ៊ុន SinOpec របស់ចិនបានទិញប្រេងរបស់អាមេរិកប្រមាណ១៦លានធុង ស្មើ៥៣ម៉ឺន៣ពាន់ធុងក្នុង១ថ្ងៃ ។
ប្រទេសឥណ្ឌា និងកូរ៉េខាងត្បូង គឺជាអតិថិជនធំជាងគេបន្ទាប់នៅតំបន់អាស៊ី ដោយប្រទេសទាំងពីរនេះបានទិញប្រេងចាប់ពី៦ទៅ៧លានធុងសម្រាប់ខែមិថុនា ។
ចំណែកក្រុមហ៊ុន CPC Corp របស់តៃវ៉ាន់វិញ ក៏បានទិញប្រេងចំនួន៧លានធុងសម្រាប់ខែមិថុនា និងខែកក្កដា ផងដែរ ។
បើទោះបីជាបណ្តាប្រទេសក្នុងតំបន់អាស៊ី និងអឺរ៉ុបចង់នាំចូលប្រេងបន្ថែមពីអាមេរិកក្តី ប៉ុន្តែចំនួននាំចេញដ៏ធំនេះ ធ្វើឲ្យសមត្ថភាពបូម និងនាំចេញប្រេងបន្ថែមរបស់អាមេរិកនៅមានកម្រិត ៕
ចែករំលែកព័តមាននេះ