ខេត្តព្រៃវែង ៖ ពលរដ្ឋ១គ្រួសាររស់នៅភូមិតាំងរមាំង ឃុំកញ្ចំ ស្រុកពារាំង ខេត្តព្រៃវែងបានរៀបរាប់ប្រាប់ក្រុមអ្នកសារព័ត៌ថា ដីរបស់គាត់មួយកន្លែងទទឹងទំហំ៣២០ម៉ែត្រ និងជម្រៅ៥៤ម៉ែត្រ ស្ថិតនៅតាមបណ្តោយផ្លូវជាតិលេខ៨អា ដែលគាត់បានទិញពីប្រជាពលរដ្ឋម្ចាស់ដីជាង២ឆ្នាំមកហើយនោះ ដោយមានទាំងការចុះហត្ថលេខាទទួលស្គាល់ដឹងលឺ និងចេញបង្កាន់ដៃបញ្ជាក់ម្ចាស់កម្មសិទ្ធិពីមន្ត្រីជំនាញ និងអាជ្ញាធរទៀតផង ។ ពេលនេះស្រាប់តែមន្ត្រីមួយចំនួនអះអាងថា ជាដីបម្រុងរបស់រដ្ឋទៅវិញ ក្រោយពីលោកអភិបាលស្រុកប្រើឲ្យមន្ត្រីប៉ុន្មាននាក់ ចុះបោះបង្គោលកំណត់ព្រំដី ។
លោក គុយ ហាន ជាពលរដ្ឋរងគ្រោះខាងលើបានអះអាងថា ដីនេះគាត់បានទិញពីស្ត្រីម្នាក់ឈ្មោះ យ៉ុន ថុល អាយុ៤៩ឆ្នាំ កាលពីឆ្នាំ២០១៦ ហើយពេលទិញលក់នេះក៏បានធ្វើលិខិតទិញលក់ត្រឹមត្រូវ និងមានការចុះហត្ថលេខាទទួលស្គាល់ពីមន្ត្រីជំនាញទាំងសុរិយោដី និងមន្ត្រីសាធារណៈការ ព្រមទាំងអាជ្ញាធរតាំងពីលោកមេភូមិ មេឃុំ និងអភិបាលស្រុកផងដែរ ។ លើសពីនេះទៅទៀតទាំងមន្ត្រីជំនាញ និងអាជ្ញាធរក៏បានចេញលិខិតឯកសារច្បាប់ផ្សេងៗ ឲ្យគាត់ជាបន្តបន្ទាប់ផងដែរ ហើយគ្មានអ្នកណាមកជំទាស់រារាំងថា ជាដីរបស់ខ្លួនឬដីរបស់រដ្ឋអីនោះទេ ។ ប៉ុន្តែមកដល់ថ្ងៃទី២៦ ឧសភា ឆ្នាំ២០១៨ ថ្មីៗនេះ ស្រាប់តែលោក ហុង ដានី ប្រធានការិយាល័យសាធារណៈការស្រុកដឹកនាំមនុស្ស ២-៣នាក់ ចុះមកបោះបង្គោលលើដីនេះ ហើយពេលដែលរូបលោក(គុយ ហាន )ទៅសួរនាំហេតុអ្វី មកបោះបង្គោលលើដីខ្ញុំ គេឆ្លើយថា លោកអភិបាលស្រុកបញ្ជាឲ្យបោះព្រោះ ដីនេះជាដីបម្រុងរបស់រដ្ឋ ។
លោក គុយ ហាន បានបញ្ជាក់ថា កាលពីពេលដែលគាត់ទៅទិញដីនេះដំបូងទាំងមន្ត្រីជំនាញ និងអាជ្ញាធរ បានទទួលស្គាល់ថា ដីនេះជាដីរបស់អ្នកស្រី យ៉ុន ថុល ថែមទាំងចុះហត្ថលេខាទទួលស្គាល់ថែមទៀតផង ទើបគាត់ហ៊ានទិញដីនេះ ចុះហេតុអី២ឆ្នាំ ក្រោយមកអះអាងថា ដីនេះជាដីបម្រុងរបស់រដ្ឋទៅវិញ ? ភាសាដីបម្រុងរបស់រដ្ឋនេះ គឺមានន័យច្បាស់ណាស់ថា ដីរបស់គាត់ និងត្រូវគេដកហូតយកទាំងស្រុង ហេតុនេះហើយទើបរូបគាត់ និងក្រុមគ្រួសារកើតទុក្ខមិនសុខចិត្ត ហើយក៏ប្តឹងដល់ក្រុមអ្នកសារព័ត៌មានគ្រប់ស្ថាប័នឲ្យជួយចុះផ្សាយរកយុត្តិធម៌ជូនគ្រួសារគាត់ផង ។
ក្នុងពេលដែលក្រុមគ្រួសារជនរងគ្រោះកំពុងផ្តល់បទសម្ភាសន៍ដល់ក្រុមអ្នកព័ត៌មាន នៅលើទីតាំងដីទំនាស់នេះលោក ហុង ដានី ប្រធានការិយាល័យសាធារណៈការស្រុកក៏បានទៅដល់ ហើយលោកបានបញ្ជាក់ប្រាប់អ្នកព័ត៌មានថា លោកពិតជាបានចុះហត្ថលេខាទទួលស្គាល់ដីនេះពិតមែន ប៉ុន្តែមកពីកាលណោះលោកមិនបានដឹងច្បាស់ តែក្រោយមកពេលសាកសួររកឯកសារលិខិតស្នាមផ្សេងៗ ម្ចាស់ដីមុនលោកស្រី យ៉ុន ថុល ពុំមានទាល់តែសោះ គឺបញ្ជាក់ថា លោកស្រីមិនមែនជាម្ចាស់ដីស្របច្បាប់នោះទេ ហេតុនេះហើយលោក និងធ្វើលិខិតបដិសេធថ្មីមួយទៀត គឺបដិសេធមិនទទួលស្គាល់លើឯកសារដែលលោកបានចុះហត្ថលេខាមុននោះទេ ។
ដោយឡែកលោក ហេង ផលលៀង ប្រធានការិយាល័យភូមិបាលស្រុកពារាំងក៏បានចុះទៅដល់ទីតាំងដីនោះដែរ និងបានប្រាប់ក្រុមអ្នកសារព័ត៌មានថា បង្កាន់ដៃបញ្ជាក់ម្ចាស់កម្មសិទ្ធិនោះ គឺគាត់បានបញ្ជាក់ពីភូមិ.ឃុំពិតមែន តែការិយាល័យសុរិយោដីស្រុកអត់បានដឹងទេ ក្រោយមកទៀត ទើបលោក គុយ ហាន ហៅឲ្យជំនាញសុរិយោដីចុះទៅវាស់វែង ដើម្បីឲ្យដឹងព្រំដី និងឲ្យស្គាល់ម្ចាស់អ្នកទិញ និងអ្នកលក់ប៉ុណ្ណោះ រឿងសាធារណៈការ និងអាជ្ញាធរស្រុកចុះមកបោះបង្គោលថា ជាដីបម្រុងរបស់រដ្ឋអីនោះ លោកមិនបានដឹងទេ ។
រីឯលោក សៀង ជាន មេភូមិតាំងរមាំង និងលោក អ៊ិត ស៊ីម មេឃុំកញ្ចំ បានទទួលស្គាល់ថា ដីនេះ គឺគ្រួសារលោក គុយ ហាន បានទិញពីលោកស្រី យ៉ុន ថុល ពិតមែនក្នុងតម្លៃ៣ម៉ឺនដុល្លារ ហើយពេលទិញលក់នោះ រូបលោក និងលោកអភិបាលស្រុកព្រមទាំងមន្ត្រីជំនាញក៏បានស៊ីញ៉េទទួលស្គាល់ និងចេញបង្កាន់ដៃបញ្ជាក់ម្ចាស់កម្មសិទ្ធិឲ្យឈ្មោះ គង់ ហាន នេះដែរ ដោយក្នុងបង្កាន់ដៃនោះបានកំណត់ព្រំយ៉ាងច្បាស់ គឺខាងជើងទល់ផ្លូវជាតិលេខ៨A ខាងត្បូងទល់ដីឈ្មោះ ឈាងជាប់នឹងផ្លូវរទេះ ខាងកើតទល់នឹងស្ពាន និងខាងលិចទល់ និងឈ្មោះថា ហ៊ន ។
ជុំវិញរឿងរ៉ាវខាងលើនេះ កោះសន្តិភាពមិនអាចសុំការបំភ្លឺពីលោក ហ៊ី ធួក អភិបាលស្រុកពារាំងបាននោះទេ គិតត្រឹមថ្ងៃទី៣០ ឧសភា ដោយសារទូរសព្ទ័របស់លោកខលចូលហើយគ្មានអ្នកទទួល ។
ទោះជាយ៉ាងណា ក្រុមគ្រួសារពលរដ្ឋម្ចាស់ដី បានសំណូមពរដល់លោក ហ៊ី ធួក អភិបាលស្រុកពារាំង សូមលោកមេត្តាជួយដោះស្រាយ ប្រគល់ដីនេះឲ្យក្រុមគ្រួសារគាត់ បានកាន់កាប់ និងប្រើប្រាស់ដូចពលរដ្ឋដទៃវិញផង ព្រោះដីនេះគាត់បានទិញ និងកាន់កាប់ដោយស្របច្បាប់ អស់រយៈពេលជាង២ឆ្នាំមកហើយ ៕
ចែករំលែកព័តមាននេះ