អ៊ិស្លាមចាត់ទុកការធ្វើសមាហរណកម្មសន្តិភាពរបស់ប្រមុខរាជរដ្ឋាភិបាលកម្ពុជាជាគំរូ
- ភ្នំពេញ
រាជធានីភ្នំពេញ ៖ លោកស្រី មាស ឡាតលិបណា តំណាងលោកបណ្ឌិត យូសូហ្វ អាល់អូសៃមិន អគ្គលេខាធិការនៃអង្គការសហប្រតិបត្តិការអ៊ិស្លាម (OIC)…
រាជធានីភ្នំពេញ ៖ លោកស្រី មាស ឡាតលិបណា តំណាងលោកបណ្ឌិត យូសូហ្វ អាល់អូសៃមិន អគ្គលេខាធិការនៃអង្គការសហប្រតិបត្តិការអ៊ិស្លាម (OIC) ដែលតំណាងឱ្យរដ្ឋអ៊ិស្លាម ជាសមាជិកចំនួន៥៧ប្រទេស បានលើកឡើងថា សកម្មភាពរបស់រាជរដ្ឋាភិបាលកម្ពុជា សម្រាប់សមាហរណកម្មសន្តិភាព សុខដមបនីយកម្ម និងការរួមរស់ជាមួយគ្នា និងការស្វែងរកភាពសុខដុមរមនារវាងប្រជាជន និងវប្បធម៌ គឺជាការសម្រេចចិត្តក្នុងការអនុវត្តនូវគោលនយោបាយដ៏ល្អបំផុតជាគំរូល្អសម្រាប់ប្រទេសដទៃនៅក្នុងតំបន់ និងនៅលើឆាកអន្តរជាតិ។
លោកស្រីមានប្រសាសន៍បែបនេះ នៅក្នុងឱកាសនៃពិធីទទួលទានអាហារស្រាយបួសរ៉ាម៉ាឌន របស់សាសនិកអ៊ិស្លាមកម្ពុជា នៅល្ងាចថ្ងៃទី២៩ ឧសភា ឆ្នាំ២០១៨ ដែលរៀបចំ និងអញ្ជើញចូលរួមពីប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន។
នៅក្នុងអង្គពិធីនោះដែលមានវត្តមានប្រមុខថ្នាក់ដឹកនាំជាន់ខ្ពស់នៃកម្ពុជា និង តំណាងអង្គទូត មេដឹកនាំអ៊ិស្លាម ស្ថាប័នអង្គការ អន្តរជាតិ អញ្ជើញចូលរួមពី ៣៣ ប្រទេស និងតំណាងសហគមន៍ខ្មែរអ៊ិស្លាមជិត៥០០០នាក់។
លោកស្រីតំណាងអគ្គលេខាធិការអង្គការ OIC បានបន្តថា ការលើកកម្ពស់ការអត់ឱនផ្នែកសាសនារបស់រាជរដ្ឋាភិបាលបានបង្ហាញយ៉ាងច្បាស់នូវផលវិជ្ជមាន និងជាកត្ដាមួយដែលនាំឱ្យកម្ពុជាមានលក្ខណៈខុសពីបណ្តាប្រទេសមួយចំនួន។ ក្នុងនាមជាអង្គការអន្តររដ្ឋាភិបាលធំបំផុតទីពីររបស់ពិភពលោក OIC បានប្តេជ្ញាចិត្តសហការជាមួយសហគមន៍អន្តរជាតិ ដើម្បីលើកកម្ពស់ការគោរពគ្នាទៅវិញទៅមក និងភាពសុខដុមរមនារវាងប្រជាជន សង្គម និងវប្បធម៌ខុសៗគ្នា ដើម្បីពង្រឹងសន្តិភាព ស្ថិរភាព សន្តិសុខ និងការអភិវឌ្ឍជាសកល។ អង្គការសហប្រតិបត្ដិការអ៊ិស្លាម នឹងបន្តជម្រុញ និងខិតខំប្រឹងប្រែងដើម្បីបញ្ចូលកម្ពុជា ជាសមាជិកអង្កេតការណ៍នៅអង្គការនេះនានៅពេលឆាបៗខាងមុខនេះ៕
ចែករំលែកព័តមាននេះ