ខេត្តព្រៃវែង ៖ បុរសម្នាក់បើកបរក្នុងស្ថានភាពស្រវឹងបានជិះម៉ូតូធ្លាក់ក្រោមស្ពាន បណ្តាលឱ្យរងរបួសយ៉ាងធ្ងន់ធ្ងរ ត្រូវបានក្រុមគ្រួសារដឹកយកទៅព្យាបាល នៅក្នុងមន្ទីរពេទ្យឯរាជធានីភ្នំពេញទាំងយប់ ។ ហេតុការណ៍នេះបានកើតឡើងកាលពីវេលាម៉ោង៧យប់ថ្ងៃទី២៩ ឧសភា នៅចំណុចស្ពានជីផុច…
ខេត្តព្រៃវែង ៖ បុរសម្នាក់បើកបរក្នុងស្ថានភាពស្រវឹងបានជិះម៉ូតូធ្លាក់ក្រោមស្ពាន បណ្តាលឱ្យរងរបួសយ៉ាងធ្ងន់ធ្ងរ ត្រូវបានក្រុមគ្រួសារដឹកយកទៅព្យាបាល នៅក្នុងមន្ទីរពេទ្យឯរាជធានីភ្នំពេញទាំងយប់ ។ ហេតុការណ៍នេះបានកើតឡើងកាលពីវេលាម៉ោង៧យប់ថ្ងៃទី២៩ ឧសភា នៅចំណុចស្ពានជីផុច ដែលស្ថិតក្នុងភូមិជីផុច ឃុំជីផុច ស្រុកមេសាង ខេត្តព្រៃវែង។
បុរសរងគ្រោះឈ្មោះ ឈិន យ៉ាន់ អាយុ៥៥ឆ្នាំ ជានាយកអនុវិទ្យាល័យព្រៃឃ្នេស មានទីលំនៅក្នុងភូមិកើតហេតុ។
ប្រភពពត៌មានពីសមត្ថកិច្ចបានអោយដឹងថា មុនពេលកើតហេតុ គេឃើញលោកនាយកសាលាជិះម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ ១CF-៤២៤៥ ធ្វើដំណើរតែម្នាក់ឯង ក្នុងទិសដៅពីលិចទៅកើត បើកបរក្នុងស្ថានភាពស្រវឹងជោក ដោយមិនដឹងថា លោកនាយកសាលាផឹកនៅកន្លែងណា ឬជាមួយអ្នកណា ក្នុងកម្មវិធីអ្វីនោះទេ ប៉ុន្តែពេលមកដល់ចំណុចកើតហេតុ ដោយពុំមានប៉ះទង្គិចនិងអ្វីសោះ ស្រាប់តែម៉ូតូរ៉េចង្កូតចេញពីផ្លូវ ធ្លាក់ចុះទៅក្រោមស្ពានជីផុចកំពស់ជាង៣ម៉ែត្រ បណ្តាលអោយលោកនាយកសាលាសន្លប់ស្តូកស្តឹងនៅនឹងកន្លែង។
ក្រោយកើតហេតុ សមត្ថកិច្ចបានទាក់ទងហៅក្រុមគ្រួសារដើម្បីនាំយកលោកនាយកទៅព្យាបាលនៅមន្ទីរពេទ្យបង្អែកស្រុកភ្លាមៗ ប៉ុន្តែដោយសារតែលោកនាយករងរបួសធ្ងន់ធ្ងរ ដោយបាក់ស្មងជើងខាងឆ្វេង និងគ្រាំនៅផ្នែកខាងក្នុងខ្លាំង ទើបក្រុមគ្រួសារសំរេចនាំយកទៅព្យាបាលបន្ត នៅក្នុងមន្ទីរពេទ្យឯរាជធានីភ្នំពេញ នៅយប់ថ្ងៃកើតហេតុនោះតែម្តង៕
ចែករំលែកព័តមាននេះ