រាជធានីភ្នំពេញ ៖ បើមិនមានអ្វីប្រែប្រួលទេ រថភ្លើងដ៏ទំនើបនិងស្រស់ស្អាត ដែលផ្តល់ផាសុកភាពដល់អ្នកធ្វើដំណើរ នឹងត្រូវនាំមកដល់ក្រុងភ្នំពេញនាអំឡុងខែកក្កដា ខាងមុខ ។ នេះបើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន…
រាជធានីភ្នំពេញ ៖ បើមិនមានអ្វីប្រែប្រួលទេ រថភ្លើងដ៏ទំនើបនិងស្រស់ស្អាត ដែលផ្តល់ផាសុកភាពដល់អ្នកធ្វើដំណើរ នឹងត្រូវនាំមកដល់ក្រុងភ្នំពេញនាអំឡុងខែកក្កដា ខាងមុខ ។ នេះបើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន ។
រថភ្លើងថ្មីដ៏ស្រស់ស្អាតនេះ ផលិតនៅប្រទេសម៉ិកស៊ិក នឹងត្រូវបានគេដឹកមកដល់រាជធានីភ្នំពេញ ក្នុងអំឡុងពេល១ខែ ឬ២ខែទៀត ដើម្បីជំនួសរថភ្លើងចាស់ ពីស្ថានីយរាជាយស្ម័យយាន ឆ្ពោះទៅកាន់ព្រលានយន្តហោះអន្តរជាតិភ្នំពេញ ។ ក្បាលនិងទូរថភ្លើងថ្មីនេះ អាចផ្ទុកអ្នកដំណើរបាន១០០នាក់ និងរត់ក្នុងល្បឿន៨០គីឡូម៉ែត្រក្នុង១ម៉ោង ។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន បានថ្លែងនាព្រឹកថ្ងៃទី២៩ ឧសភា ម្សិលមិញថា ក្បាលរថភ្លើងថ្មីនេះ ត្រូវបានគេធ្វើរួចរាល់អស់ហើយ និងកំពុងដាក់សាកល្បងនៅក្នុងប្រទេសម៉ិកស៊ិក តែមិនទាន់បានដឹកមកដល់កម្ពុជាទេ ប៉ុន្តែយ៉ាងយូរ២ខែទៀត នឹងមកដល់រាជធានីភ្នំពេញហើយ ។ ផ្ទុយទៅវិញ បើមិនមានអ្វីជាឧបសគ្គនៅតាមសមុទ្រ ឬបើមិនមានខ្យល់ព្យុះទេ រយៈពេល១ខែទៀតទូរថភ្លើងនោះនឹងដឹកដល់ភ្នំពេញហើយ ។
លោកបន្តថា នៅពេលមកដល់ ក្រសួងនឹងប្រកាសជាសាធារណៈ ស្តីពី ការដាក់ឲ្យដំណើរការក្បាលរថភ្លើងថ្មីជំនួសក្បាលរថភ្លើងចាស់ដែលក្រសួងនិងក្រុមហ៊ុន Royal Group បានដាក់ឲ្យដំណើរការបណ្តោះអាសន្នកាលពីថ្ងៃទី១០ ខែមេសា ឆ្នាំ២០១៨ កន្លងទៅនេះ ។
ទោះជាយ៉ាងណា លោកមិនបានបញ្ជាក់ពីក្បាលរថភ្លើងថ្មីនេះថា មានតម្លៃប៉ុន្មាននោះទេ ព្រោះក្រុមហ៊ុនដឹកជញ្ជូនផ្លូវដែក Royal Railway ជាអ្នកបញ្ជាទិញដោយផ្ទាល់ ។
ការដាក់ឲ្យដំណើរការផ្លូវរថភ្លើងនៅពេល នេះ គឺក្នុងគោលបំណងកាត់បន្ថយការចំណាយថវិកា ពេលវេលា សុវត្ថិភាព គ្មានការរំខាន ព្រមទាំងរួមចំណែកកាត់បន្ថយការកកស្ទះ និងគ្រោះថ្នាក់ចរាចរណ៍ក្នុងរាជធានីភ្នំពេញ ។
ក្នុងដំណាក់កាលដំបូងនេះ គេនឹងប្រើប្រាស់រថភ្លើងចំនួន២គ្រឿងដែលមានស្រាប់ សម្រាប់ការផ្តល់សេវាដឹកជញ្ជូនអ្នកដំណើរទៅមក ខណៈរង់ចាំក្បាលរថភ្លើងថ្មីចំនួន៣គ្រឿងទៀត ដែលបានបញ្ជាទិញពីប្រទេសម៉ិកស៊ិក ៕
ចែករំលែកព័តមាននេះ