រាជធានីភ្នំពេញ ៖ សហភាពអឺរ៉ុបប្រចាំនៅកម្ពុជាសហការជាមួយក្រសួងអប់រំនៅថ្ងៃទី៣០ ខែឧសភា ឆ្នាំ២០១៨នេះ បានរៀបចំសន្និសីទរយៈពេល២ថ្ងៃ ស្តីពីការគាំទ្ររបស់សហភាពអឺរ៉ុបសម្រាប់ឧត្តមសិក្សាក្នុងតំបន់អាស៊ានក្រោមកម្មវិធីស៊ែរ ដោយមានការចូលរួមពីលោកយ៉ក់ ង៉ុយរដ្ឋលេខាធិការក្រសួងអប់រំ និងលោកចច…
រាជធានីភ្នំពេញ ៖ សហភាពអឺរ៉ុបប្រចាំនៅកម្ពុជាសហការជាមួយក្រសួងអប់រំនៅថ្ងៃទី៣០ ខែឧសភា ឆ្នាំ២០១៨នេះ បានរៀបចំសន្និសីទរយៈពេល២ថ្ងៃ ស្តីពីការគាំទ្ររបស់សហភាពអឺរ៉ុបសម្រាប់ឧត្តមសិក្សាក្នុងតំបន់អាស៊ានក្រោមកម្មវិធីស៊ែរ ដោយមានការចូលរួមពីលោកយ៉ក់ ង៉ុយរដ្ឋលេខាធិការក្រសួងអប់រំ និងលោកចច ដេហ្គា ឯកអគ្គរដ្ឋទូតអឺរ៉ុបប្រចាំនៅកម្ពុជា ។
តំណាងសហភាពអឺរ៉ុបបានលើកឡើងថា អ្នកជំនាញផ្នែកឧត្តមសិក្សា និងប្រព័ន្ធផ្ទេរក្រេឌីត ថ្នាក់ដឹកនាំឧត្តមសិក្សា និងមន្ត្រីជាន់ខ្ពស់មកពីតំបន់អាស៊ាន និងសហភាពអឺរ៉ុបប្រមាណ២០រូប បានចូលរួមក្នុងកម្មវិធីនេះ ។ សន្និសីទនេះមានគោលបំណង ដើម្បីផ្តល់ដល់អ្នកចូលរួមទាំងអស់នូវការយល់ដឹងពីបញ្ហាសំខាន់ៗរួមមានគោលនយោបាយអប់រំបច្ចុប្បន្ន ដែលទទួលមានជោគជ័យ និងបទពិសោធន៍ល្អៗ ដែលបានអនុវត្តនៅតំបន់អាស៊ានក៏ដូចជា នៅសហភាពអឺរ៉ុប ។
តំណាងសហភាពអឺរ៉ុបថា ៖ នៅក្នុងសន្នីសីទពីរថ្ងៃនេះវាគ្មិននៃកិច្ចពិភាក្សាក៏នឹងចែករំលែកនូវឧទាហរណ៍ល្អៗដែលទាក់ទងនឹងយុទ្ធសាស្ត្រទាក់ទងនឹងស្ថាប័ន និងការយល់ដឹងពីលក្ខខណ្ឌនៃការអនុវត្ត និងផលប៉ះពាល់ជាក់ស្តែង ។
ស៊ែរ គឺជាកម្មវិធីមួយដែលគាំទ្រដោយសហភាពអឺរ៉ុបក្រោមកិច្ចសហការជាមួយលេខាធិការដ្ឋានអាស៊ានក្នុងគោលបំណង ដើម្បីពង្រឹងសហប្រតិបត្តិការតំបន់ និងលើកកម្ពស់គុណភាពអប់រំក្នុងការប្រកួតប្រជែង និងអន្តរតូបនីយ៍កម្មក្នុងឧត្តមសិក្សា និងនិស្សិតអាស៊ាន ។
គម្រោងនេះផ្តល់ចំណុចសំខាន់មួយសម្រាប់អាស៊ានតាមរយៈការរៀនសូត្រភាពជោគជ័យរបស់សហភាពអឺរ៉ុបក្នុងការធ្វើសុខដុមណីយកម្មប្រព័ន្ធឧមត្តមសិក្សារបស់ខ្លួន ដោយផ្នែកលើវេទីកានានារបស់ស៊ែរ(Share)ដែលមានស្រាប់នៅក្នុងតំបន់ ។
លើសពីនេះការអនុវត្តឧត្តមសិក្សានៅក្នុងតំបន់នឹងជម្រុញការចល័តនិស្សិតនៅក្នុងតំបន់អាស៊ាន ៕
ចែករំលែកព័តមាននេះ