ខេត្តកណ្ដាល ៖ សពបុរសម្នាក់ដែលមានកំផ្លោក គ្របសង្កត់ពីលើ ក្នុងភាពហើមស្អុយ ត្រូវបានអ្នកនេសាទត្រី ប្រទះឃើញនៅក្នុងប្រឡាយទឹកកាលពីរសៀលថ្ងៃទី២៩ ឧសភា នៅចំណុចក្នុងប្រទំនប់៩៤ ដីភូមិប្រាសាទ…
ខេត្តកណ្ដាល ៖ សពបុរសម្នាក់ដែលមានកំផ្លោក គ្របសង្កត់ពីលើ ក្នុងភាពហើមស្អុយ ត្រូវបានអ្នកនេសាទត្រី ប្រទះឃើញនៅក្នុងប្រឡាយទឹកកាលពីរសៀលថ្ងៃទី២៩ ឧសភា នៅចំណុចក្នុងប្រទំនប់៩៤ ដីភូមិប្រាសាទ ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល។
មន្ត្រីនគរបាលស្រុកកណ្ដាលស្ទឹងបានឱ្យដឹងថា ក្រោយពីទទួលបានពត៌មានថាមានករណីប្រទះឃើញសពបុរសម្នាក់ភ្លាម សមត្ថកិច្ចបានបង្កើតគណៈកម្មការចុះទៅពិនិត្យសពនៅកន្លែងកើតហេតុ ។ តាមការពិនិត្យរបស់សមត្ថកិច្ចបានឱ្យដឹងថា សពជនជនរងគ្រោះបានស្លាប់ប្រហែល៥ទៅ៦ថ្ងៃមកហើយ មិនទាន់ស្គាល់អត្តសញ្ញាណនៅឡើយទេ ភេទប្រុស អាយុចន្លោះ៣០-៤០ឆ្នាំ។
នគរបាលបានឱ្យដឹងបន្ថែមថា តាមឈ្មោះម៉ុក ស្រ៊ីន ភេទប្រុស បានឲ្យដឹងថា នៅវេលាប្រហែល១២ថ្ងៃត្រង់ថ្ងៃទី២៩ ឧសភា ខ្លួននិងឈ្មោះផន ផាត បានទៅបង់សំណាញ់ចាប់ត្រីនៅចំណុចខាងលើ ពេលទៅដល់ក៏ប្រទះឃើញសពបុរសម្នាក់នៅក្នុងប្រឡាយទឹកទំនប់៩៤ ភូមិប្រាសាទ ឃុំព្រែកស្លែង រួចបានរាយការណ៍មកសមត្ថកិច្ច ។
គណៈកម្មការដែលចុះពិនិត្យសពរួមមាន កម្លាំងជំនាញខេត្ត កម្លាំងជំនាញស្រុក ប៉ុស្តិ៍អាជ្ញាធរមូលដ្ឋាន និងគ្រូពេទ្យបានចុះមកដល់កន្លែងកើតហេតុធ្វើការពិនិត្យទៅលើសព រកឃើញថា សពនៅប្រឡាយក្រោមដើមត្រស់ ត្រូវបានគ្របដោយដើមកំប្លោក និងលបត្រីគ្របពីលើ ។ សពអត់ពាក់អាវ, ស្លៀកខោខូវប៊យជើងវែងពណ៌ខៀវ, ស្លៀកខោលីអូពណ៌ខ្មៅ, ស្លាប់ដេកក្បាលទៅទិសខាងត្បូង, មានស្នាមបែកនៅលើចិញ្ចើមខាងឆ្វេង មិនដល់ឆ្អឹង, មានស្នាមជាំក្រោមថ្គាម ក្រោមទងត្រចៀក, បាក់ឆ្អឹងថ្គាមផ្នែកខាងឆ្វេង, បែកឆ្អឹងក្បាលជង្គង់ (បែកអង្គុញ) ខាងស្ដាំ, ស្នាមមុតដាច់ស្មើលើក្បាលជង្គង់ប៉ះទង្គិចនឹងវត្ថុរឹងមុខមុត (សង្ស័យកាំបិត), សពមានកំពស់១,៦០ម៉ែត្រ នៅក្នុងហោប៉ាវអាវមានក្រដាសប្រាក់ប្រាំពាន់រៀលចំនួន១សន្លឹក និងក្រដាសប្រាក់ប្រាំរយរៀលចំនួន៣សន្លឹក។
ផ្អែកតាមការពិនិត្យសពរបស់ផ្នែកជំនាញខេត្ត-ស្រុក និងគ្រូពេទ្យ រកឃើញថា សពជនរងគ្រោះស្លាប់ដោយសារករណីឃាតកម្ម។
ក្រោយពេលពិនិត្យសពរួច សមត្ថកិច្ចបានប្រគល់សពជូនលោកមេឃុំដើម្បីយកទៅកប់ រង់ចាំប្រកាសរកសាច់ញាតិមកទទួលយក។ សមត្ថកិច្ចសូមប្រកាសរកសាច់ញាតិជនរងគ្រោះខាងលើ ប្រសិនបើមានបាត់បងប្អូន ដូចមានភិនភាគខាងលើ សូមធ្វើការទាក់ទងមកសមត្ថកិច្ច អធិការដ្ឋាននគរបាលស្រុកកណ្ដាលស្ទឹង ៕
ចែករំលែកព័តមាននេះ