ខេត្តកណ្ដាល ៖ កម្មការិនី២នាក់ ខណៈពេលកំពុងដើរចេញពីធ្វើការឆ្លងផ្លូវទៅកាន់ផ្ទះជួល ស្រាប់តែមានរថយន្តដឹកទំនិញធុនយក្ស១គ្រឿងរបស់ក្រុមហ៊ុនSP បើកបរក្នុងល្បឿនលឿនទៅដល់បុក និងកិនបណ្ដាលឲ្យខ្ទេចខ្លួនស្លាប់ភ្លាមៗទាំង២នាក់នៅនឹងកន្លែងតែម្ដង ។ បន្ទាប់មករថយន្តបានបើករត់ចម្ងាយប្រមាណ៥គីឡូម៉ែត្រ ទើបឈប់…
ខេត្តកណ្ដាល ៖ កម្មការិនី២នាក់ ខណៈពេលកំពុងដើរចេញពីធ្វើការឆ្លងផ្លូវទៅកាន់ផ្ទះជួល ស្រាប់តែមានរថយន្តដឹកទំនិញធុនយក្ស១គ្រឿងរបស់ក្រុមហ៊ុនSP បើកបរក្នុងល្បឿនលឿនទៅដល់បុក និងកិនបណ្ដាលឲ្យខ្ទេចខ្លួនស្លាប់ភ្លាមៗទាំង២នាក់នៅនឹងកន្លែងតែម្ដង ។ បន្ទាប់មករថយន្តបានបើករត់ចម្ងាយប្រមាណ៥គីឡូម៉ែត្រ ទើបឈប់ រួចហើយអ្នកបើកបរបានចុះរត់គេចខ្លួនទៅបាត់ស្រមោល ។
ចំណែកនគរបាលចរាចរណ៍ស្រុកអង្គស្នួលបានចុះទៅកាន់កន្លែងកើតហេតុនាំយករថយន្តទៅរក្សាទុក និងប្រគល់សពជនរងគ្រោះទៅឲ្យក្រុមគ្រួសារនាំយកទៅធ្វើបុណ្យតាមប្រពៃណី ។ ហេតុការគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង៤០នាទីយប់ ថ្ងៃទី២៩ ខែឧសភា ឆ្នាំ២០១៨ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រ ២៣-២៤ ត្រង់ចំណុចភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្ដាល ។
នគរបាលបានឲ្យដឹងថា នាងកម្មការិនីរងគ្រោះដល់ស្លាប់បាត់បង់ជីវិតទាំង២នាក់នោះ ម្នាក់ឈ្មោះ ស្រែ ឡំ អាយុ២៥ឆ្នាំ មានទីលំនៅក្នុងភូមិថ្មី ឃុំត្រាប់ ស្រុកបាធាយ ខេត្តកំពង់ចាម ។ ចំណែកម្នាក់ទៀតឈ្មោះ ជាវ លីន អាយុ២៣ឆ្នាំ មានទីលំនៅក្នុងភូមិឃុំជាមួយគ្នា ។ សព្វថ្ងៃស្នាក់នៅផ្ទះជួលក្នុងភូមិចុងបង្គោល ឃុំបែកចាន ស្រុកអង្គស្នួល ខេត្តកណ្ដាល ។
រីឯរថយន្តបង្កម៉ាកហ៊ីណូដាយ ពណ៌ក្រហម ប្រភេទដឹកទំនិញ របស់ក្រុមហ៊ុនS P ពាក់ស្លាកលេខ ភ្នំពេញ 3A-5622 បើកបរដោយបុរសមិនស្គាល់ឈ្មោះ ម្នាក់ ហើយបានរត់គេចខ្លួនបាត់ ។
ប្រភពដដែលបានបន្តទៀតថា នៅមុនពេលកើតហេតុជនរងគ្រោះទាំង២នាក់បានចេញពីធ្វើការថែមម៉ោងពេលយប់ ហើយបាននាំគ្នាដើរចេញពីក្នុងរោងចក្រនៅជិតកន្លែងកើតហេតុនោះ ដើម្បីត្រឡប់ទៅផ្ទះជួលដែលពួកនាងស្នាក់នៅ ។ លុះពេលទៅដល់ចំណុចកើតហេតុខាងលើពួកនាងបានដើរឆ្លងផ្លូវក្នុងទិសដៅពីត្បូងទៅជើង ខណៈនោះស្រាប់តែរថយន្តបង្កបើកបរធ្វើដំណើរក្នុងទិសដៅពីកើតទៅលិចយ៉ាងលឿន និងមិនប្រកាន់ស្ដាំជ្រុលទៅបុក និងកិនជនរងគ្រោះទាំង២នាក់ បណ្ដាលឲ្យខ្ទេចសាច់ស្លាប់ភ្លាមៗតែម្ដង ។
ប្រភពខាងលើបានបន្តថា ក្រោយពេលកើតហេតុរថយន្តនេះបានបើករត់គេចចេញពីកន្លែងកើតហេតុបានចម្ងាយប្រមាណ៥គីឡូម៉ែត្រទើបឈប់ ហើយអ្នកបើកបរបានចុះរត់គេចខ្លួនបាត់ស្រមោល ។
ចំណែកនគរបាលចរាចរណ៍ស្រុកអង្គស្នួលបានចុះទៅកាន់កន្លែងកើតហេតុនាំយករថយន្តនោះទៅរក្សាទុកនៅអធិការដ្ឋានស្រុករង់ចាំការដោះស្រាយ ព្រមទាំងបានប្រគល់សពជនរងគ្រោះទៅឲ្យក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ