រាជធានីភ្នំពេញ ៖ ជនសង្ស័យពីរនាក់បានធ្វើសកម្មភាពឆក់កាបូបពីនារីជនជាតិចិនម្នាក់ដែលកំពុងដើរតាមផ្លូវតែក៏ត្រូវបុរសជាជនជាតិចិនម្នាក់ទៀតរត់ទៅវាយជនសង្ស័យបណ្តាលឲ្យដួលម៉ូតូត្រូវប្រជាពលរដ្ឋដែលនៅក្បែរនេះនាំគ្នាចាប់វាយទ្រោមខ្លួនទើបប្រគល់ទៅអោយសមត្ថកិច្ចមូលដ្ឋានយកទៅសួរនាំ ។ ហេតុការណ៍នេះកើតឡើងកាលពីវេលាម៉ោង១១និង៥០នាទីយប់ ថ្ងៃទី២៩ ខែឧសភា ឆ្នាំ២០១៨ ត្រង់ចំណុចខាងមុខខាងមុខអាគារខនដូរ ឌីខាស់ស្ត័រ៨៣ ក្បែរនឹងផ្សារទំនើបធីខេ ដែលនៅតាមបណ្តោយផ្លូវ៣១៥ ស្ថិតក្នុងសង្កាត់បឹកកក់ទី១ ខណ្ឌទួលគោក ។
ជនសង្ស័យទី១មានឈ្មោះ ទូច ម៉ែងហុង ភេទប្រុស អាយុ១៦ឆ្នាំ ជាសិស្សថ្នាក់ទី៩ វិទ្យាល័យទួលសង្កែ ស្នាក់នៅសង្កាត់ទូលសង្កែ ខណ្ឌឬស្សីកែវ មានស្រុកកំណើតនៅខេត្តកំពង់ចាម និងទី២មានឈ្មោះ ស៊ាង ជាងកាង ភេទប្រុស អាយុ១៩ឆ្នាំ ជាសិស្សថ្នាក់ទី១១នៅវិទ្យាល័យវត្តកោះ ស្នាក់នៅសង្កាត់វាលវង់ ខណ្ឌ៧មករា មានស្រុកំណើតនៅខេត្តតាកែវ ។
បើតាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញជនជាតិចិនប្រុសស្រីពីរនាក់បានបណ្តើរគ្នាដោយថ្មើរជើងតាមបណ្តោយផ្លូវលេខ៣១៥ ក្នុងទិសដៅពីជើងទៅត្បូង រួមទាំងមានបុរសជាជនជាតិម្នាក់ផ្សេងទៀតដើរម្នាក់ឯងតាមពីក្រោយជនរងគ្រោះឃ្លាតពីគ្នាប្រមាណ១០ម៉ែត្រ ។ ជនជាតិចិនប្រុសស្រីទាំងពីរនាក់ខាងលើនោះគឺទើបតែដើរចេញមកពីផ្សារទំនើបធីខេក្នុងគោលបំណងដើរចូលទៅខនដូរខាងលើដែលជាកន្លែងរបស់ពួកគេស្នាក់នៅ ។ លុះដើរមកដល់ចំណុចកើតហេតុក៏ស្រាប់តែលេចមុខជនសង្ស័យទាំងពីរនាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ព្រះសីហនុ 1H-8708 ជិះមកពីក្រោយរួចក៏ធ្វើសកម្មភាពឆក់កាបូបពីរនារីជាជនជាតិចិនដែលកាន់យួរនៅដៃខាងលើបានសម្រេច ។
ប្រភពដដែលបានបន្តថា ពេលនោះជនសង្ស័យក៏បម្រុងនឹងបត់ម៉ូតូត្រឡប់ក្រោយដើម្បីជិះរត់គេចខ្លួនជាអកុសលក៏ត្រូវបានបុរសជាជនជាតិចិនដែលដើរម្នាក់ឯងតាមពីក្រោយជនរងគ្រោះខាងលើបានរត់ស្ទុះទៅវាយជនសង្ស័យទាំងពីរអ្នកខាងលើបណ្តាលឲ្យដួលម៉ូតូទើបបង្កអោយមានភ្ញាក់ផ្អើលដល់ប្រជាពលរដ្ឋដែលរស់នៅក្បែរនោះ និងអ្នកធ្វើដំណើរតាមផ្លូវបាននាំគ្នាជួយអន្តរាគមន៍ស្ទាក់ចាប់ជនសង្ស័យទាំងពីរនាក់ខាងលើ និងបានស្វាគមន៍ម្នាក់មួយដៃមួយជើងបណ្តាលឲ្យទ្រោមខ្លួន ។ ភ្លាមៗនោះនារីជាជនជាតិចិនដែលជនរងគ្រោះរូបទាំងបុរសជាជនជាតិម្នាក់ទៀតដែលដើរជាមួយគ្នាបានយកកាបូបរបស់ពួកគេរួចដើរចូលទៅក្នុងខនដូរខាងលើបាត់ដោយមិនបានទៅដាក់ពាក្យបណ្តឹងនៅប៉ុស្តិ៍នគរបាលនោះទេ ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកដល់ចំណុចកើតហេតុហើយក៏បានធ្វើការនាំខ្លួនជនសង្ស័យទាំងពីរនាក់ខាងលើទៅសាកសួរនាំនៅប៉ុស្តិ៍នគរបាលរដ្ឋបាលបឹងកក់ទី១ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោករងចាំធ្វើការចាត់ការទៅតាមនីតិវិធី ៕
ចែករំលែកព័តមាននេះ