ខេត្តព្រៃវែង ៖ ជនសង្ស័យជាចោរលួចម៉ូតូម្នាក់ ក្នុងចំណោមបក្ខពួក២នាក់ ត្រូវបានកម្លាំងនគរបាល ស្រុកពោធិ៍រៀង ស្ទាក់ចាប់បាន ក្រោយពីពួកគេធ្វើសកម្មភាពលួចម៉ូតូ របស់ជនរងគ្រោះបានសម្រេច តែរត់មិនរួចពីកណ្តាប់ដៃសមត្ថកិច្ច។…
ខេត្តព្រៃវែង ៖ ជនសង្ស័យជាចោរលួចម៉ូតូម្នាក់ ក្នុងចំណោមបក្ខពួក២នាក់ ត្រូវបានកម្លាំងនគរបាល ស្រុកពោធិ៍រៀង ស្ទាក់ចាប់បាន ក្រោយពីពួកគេធ្វើសកម្មភាពលួចម៉ូតូ របស់ជនរងគ្រោះបានសម្រេច តែរត់មិនរួចពីកណ្តាប់ដៃសមត្ថកិច្ច។ ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី២៩ ឧសភា នៅចំណុចទួលសំរោង ដែលស្ថិតក្នុងភូមិវាលព្រៅ ឃុំពោធិ៍រៀង ស្រុកពោធិ៍រៀង ខេត្តព្រៃវែង។ ជនសង្ស័យដែលត្រូវបានចាប់ខ្លួនឈ្មោះ ប៊ុត សារ៉ា ភេទប្រុស អាយុ១៩ឆ្នាំ ចំណែកបក្ខពួកម្នាក់ទៀតដែលរត់គេចខ្លួនបាត់ នៅមិនទាន់ស្គាល់អត្តសញ្ញាណនៅឡើយទេ។
សមត្ថកិច្ចបានឲ្យដឹងថា នៅវេលាម៉ោង៩ និង៣០នាទី ព្រឹកថ្ងៃទី២៩ ឧសភា ជនសង្ស័យមានគ្នា២នាក់ ជិះម៉ូតូមួយគ្រឿង បានធ្វើសកម្មភាពលួចយកម៉ូតូមួយគ្រឿងម៉ាកវ៉េវ ពណ៌ខ្មៅ គ្មានស្លាកលេខ ដែលជាកម្មសិទ្ធិរបស់ជនរងគ្រោះឈ្មោះ ឡុង ណុំ ភេទប្រុស អាយុ២៩ឆ្នាំ ពីចំណុចទួលសំរោង។ ក្រោយពីលួចបានសម្រេចហើយនោះ ជនសង្ស័យក៏ជិះម៉ូតូម្នាក់មួយ រួមទាំងម៉ូតូដែលលួចបាន រត់គេចខ្លួន ប៉ុន្តែភ្លាមៗនោះជនរងគ្រោះជាម្ចាស់ម៉ូតូបានដឹងថាម៉ូតូត្រូវចោរលួច ក៏រាយការណ៍ប្តឹងសមត្ថកិច្ចភ្លាមៗផងដែរ។
ប្រភពដដែលនេះបានបញ្ជាក់ថា ក្រោយពីទទួលបានព័ត៌មានពីជនរងគ្រោះភ្លាម លោកអធិការនគរបាលស្រុក បានបញ្ជាកម្លាំងចេញស្ទាក់នៅគ្រប់ផ្លូវ ហើយក៏ប្រទះឃើញជនសង្ស័យ កំពុងជិះម៉ូតូដែលលួចបាន នៅតាមផ្លូវបឹងចាកៃ សំដៅទៅផ្លូវព្រែអន្ទះ ដើម្បីឆ្លងដព្រែកជ្រៃ ទើបសមត្ថកិច្ចបានទំនាក់ទំនងជាមួយម្ចាស់ដ បិទដមិនឲ្យឆ្លង។ ឯសមត្ថកិច្ចតាមទៅពីក្រោយ រីឯជនសង្ស័យពេលទៅដល់កំពង់ដគេមិនចម្លង ក៏បកត្រឡប់ក្រោយវិញហើយក៏ជួបនឹងសមត្ថកិច្ច ហើយត្រូវសមត្ថកិច្ចចាប់ឃាត់ខ្លួនបានតែម្តង រីឯបក្ខពួកម្នាក់ទៀតបានជិះម៉ូតូរត់គេចខ្លួនបាត់។ បច្ចុប្បន្ន ជនសង្សយ័ត្រូវបាននាំខ្លួនទៅកាន់អធិការដ្ឋាននគរបាលស្រុក ដើម្បីសាកសួរពីអត្តសញ្ញាណ បក្ខពួកដែលរត់គេចខ្លួន និងកសាងសំណុំរឿងបញ្ជូនទៅកាន់ការិយាល័យជំនាញចាត់ការបន្ត ទៅតាមនីតិវិធី៕
ចែករំលែកព័តមាននេះ