រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជាបានបញ្ជាក់ថា ក្រោយការចាប់ឆ្នោតកំណត់លំដាប់លេខរៀង គណបក្សនយោបាយដែលបានចុះបញ្ជីសម្រាប់ការបោះឆ្នោតជ្រើសតាំងអ្នកតំណាងរាស្ត្រអាណត្តិទី ៦ ដែលរៀបចំឡើងដោយគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប នៅព្រឹកថ្ងៃទី២៩ ខែឧសភា គឺគណបក្សកាន់អំណាច ត្រូវបានចាប់បានលំដាប់លេងរៀងទី២០ គឺនៅចុងក្រោយគេបង្អស់ ដែលជាលេខស្រួលចំណាំដល់អ្នកបោះឆ្នោត ។
សូមបញ្ជាក់ថា ការប្រារព្ធពិធីចាប់ឆ្នោតកំណត់លំដាប់លេខរៀងគណបក្សនយោបាយដែលបានចុះបញ្ជីសម្រាប់ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ នេះ គឺធ្វើឡើងក្រោមការនិមន្តជាអធិបតីភាពដោយសម្តេចសង្ឃរាជទាំង២គណៈ ។ រឿងចៃដន្យមួយដែលអាចចាត់ទុកជារឿងចៃដន្យ គឺគណបក្សប្រជាធិបតេយ្យមូលដ្ឋានរបស់លោកយ៉េង វីរះ និងបណ្ឌិត យ៉ាង សាំងកុមារ ត្រូវបានជាប់លេខរៀងទី៧ ក្នុងសន្លឹកឆ្នោត ដែលលេខ៧ នេះជាលេខរៀងរបស់អតីតគណបក្សសង្គ្រោះជាតិសម្រាប់ការបោះឆ្នោតជាតិឆ្នាំ២០១៣ ដែលអតីតបក្សប្រឆាំងទទួលបានដល់ទៅ៥៥ អាសន្នៈនៃអាសន្នៈ ១២៣ សរុបនៅរដ្ឋសភា ។
សម្តេចតេជោបានបង្ហោះសារក្នុងបណ្តាញសង្គមយ៉ាងដូច្នេះថា អបអរសាទរ គណបក្សប្រជាជនកម្ពុជាលេខរៀងទី២០ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦» ។ សម្តេចមានប្រសាសន៍បន្តថា នៅព្រឹកមិញនេះ គណៈកម្មាធិការជាតិ រៀបចំការបោះឆ្នោត (គ.ជ.ប) បានធ្វើការចាប់លេខរៀង គណបក្សនយោបាយទាំង២០ សម្រាប់ការចូលរួមបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខ ។
សម្តេចតេជោ ហ៊ុន សែន បញ្ជាក់ថា៖ «គណបក្សប្រជនកម្ពុជាត្រូវចាប់លេខរៀងបានលេខ ទី ២០ ដែលជាលេខងាយស្រួលចំណាំដល់ពលរដ្ឋទូទាំងប្រទេស ។ គជបនឹងដាក់បង្ហាញការបោះពុម្ពទម្រង់សន្លឹកឆ្នោតនៅពេលឆាប់ៗនេះ» ។
លេខរៀងរបស់ គណៈបក្សនយោបាយនានាដែល(គ.ជ.ប) បានធ្វើការចាប់លេខរៀងនៅព្រឹកថ្ងៃទី២៩ ខែឧសភា ឆ្នាំ២០១៨ មានលេខ១- បានទៅលើគណបក្ស «គណបក្សខ្មែររួបរួមជាតិ» – លេខ២ – បានទៅលើគណបក្ស «គណបក្សមាតុភូមិយើង» លេខ៣- បានទៅលើគណបក្ស «គណបក្សពន្លឺថ្មី» លេខ៤ – បានទៅលើគណបក្ស «សញ្ជាតិកម្ពុជា» លេខ៥- បានទៅលើគណបក្ស «ខ្មែរក្រោក» លេខ៦- បានទៅលើគណបក្ស «សំបុកឃ្មុំ» លេខ៧- បានទៅលើគណបក្ស «ប្រជាធិបតេយ្យមូលដ្ឋាន» លេខ៨ – បានទៅលើគណបក្ស «ខ្មែរសាធារណរដ្ឋប្រជាធិបតេយ្យ» លេខ៩- បានទៅលើគណបក្ស «រស្មីខេមរា» លេខ១០- បានទៅលើគណបក្ស «សម្ព័ន្ធដើម្បីប្រជាធិបតេយ្យ» លេខ១១ -បានទៅលើគណបក្ស «ខ្មែរសាធារណរដ្ឋ»លេខ១២- បានទៅលើគណបក្ស «ខ្មែរឈប់ក្រ» លេខ១៣ – បានទៅលើគណបក្ស «ហ្វ៊ុនស៊ិនប៉ិច» លេខ១៤ – បានទៅលើគណបក្ស «ខ្មែរអភិវឌ្ឍន៍សេដ្ឋកិច្ច» លេខ១៥- បានទៅលើគណបក្ស «យុវជនកម្ពុជា» លេខ១៦- បានទៅលើគណបក្ស «ធម្មាធិបតេយ្យ» លេខ១៧- បានទៅលើគណបក្ស «ឆន្ទះខ្មែរ» លេខ១៨- បានទៅលើគណបក្ស «ជនជាតិដើមប្រជាធិបតេយ្យកម្ពុជា» លេខ១៩ -បានទៅលើគណបក្ស «ខ្មែរតែមួយ» លេខ២០ -បានទៅលើគណបក្ស «ប្រជាជនកម្ពុជា» សម្តេចតេជោ ក៏បានបង្ហាញការអរគុណដល់បងប្អូនជនរួមជាតិ និងក្មួយៗយុវជន «ព្រមទាំងកូនក្មួយកម្មករកម្មការនីដែលមានជំនឿជឿជាក់គាំទ្រ និងបោះឆ្នោតជូនគណបក្សប្រជាជនកម្ពុជា ទាំងក្នុងអាណត្តិមុនៗ និងនៅក្នុងអាណត្តិនេះ ដែលមានលេខរៀងទី២០»៕
ចែករំលែកព័តមាននេះ