ខេត្តឧត្ដរមានជ័យ ៖ ពលរដ្ឋភៀសសឹកកម្ពុជា ១០០០គ្រួសារ ដែលកំពុងស្នាក់នៅជំរំ «បាត់ថ្កៅ» ស្ថិតក្នុងវត្តបាត់ថ្កៅ ឃុំចុងកាល់ ស្រុកចុងកាល់ ខេត្តឧត្តរមានជ័យ…
ខេត្តឧត្ដរមានជ័យ ៖ ពលរដ្ឋភៀសសឹកកម្ពុជា ១០០០គ្រួសារ ដែលកំពុងស្នាក់នៅជំរំ «បាត់ថ្កៅ» ស្ថិតក្នុងវត្តបាត់ថ្កៅ ឃុំចុងកាល់ ស្រុកចុងកាល់ ខេត្តឧត្តរមានជ័យ ទទួលបានតង់ សម្ភារប្រើប្រាស់ គ្រឿងឧបភោគបរិភោគ ព្រមទាំងថវិកាមួយចំនួន ១០០,០០០ដុល្លារ ពីក្រុមហ៊ុន E-GetS នៅថ្ងៃទី១២ ខែធ្នូ ឆ្នាំ ២០២៥ នេះ ។
ក្រោមការសម្របសម្រួល របស់ក្លិបអ្នកកាសែតកម្ពុជា (CCJ) លោក ពុយ គា ប្រធានក្លិបអ្នកកាសែត បានឱ្យដឹងថា ៖ «ថ្ងៃនេះក្លិបអ្នកកាសែតកម្ពុជា បានដឹកនាំស្ថាប័នព័ត៌មានជិត ២០ស្ថាប័ន ដើម្បីសិក្សាស្វែងយល់ដោយផ្ទាល់និងមើលឃើញ នូវទិដ្ឋភាពជាក់ស្តែងនៅក្នុងជុំរំនេះ និងរាយការណ៍នូវព័ត៌មានផ្សេងៗ ដែលពួកគាត់បានឃើញជាក់ស្តែងនេះ» ។
លោក ពុយ គា បានបន្តថា មានតែការចុះមកដល់មូលដ្ឋានទេ ទើបដឹងអំពីទុក្ខលំបាករបស់ប្រជាពលរដ្ឋ ។ យើងមានសុខសន្តិភាពរាប់ឆ្នាំហើយ ប៉ុន្តែនាពេលនេះយើងទទួលរងនូវការឈ្លានពាន ដែលធ្វើឱ្យប្រជាជនកម្ពុជារងទុក្ខវេទនា ហើយយើងជាជនជាតិតែមួយត្រូវតែជួយគ្នា និងផ្សព្វផ្សាយឱ្យពិភពលោកបានដឹងអំពីទុក្ខវេទនានេះ ។
អភិបាលខេត្តឧត្ដរមានជ័យ លោក មាន ចាន់យ៉ាដា បានថ្លែងអំណរគុណយ៉ាងជ្រាលជ្រៅ របស់ក្រុមការងារក្លិបអ្នកកាសែតកម្ពុជា និងការធ្វើសប្បុរធម៌របស់ក្រុមហ៊ុន E-GetS នាពេលនេះ និងសូមអំពាវនាវដល់សប្បុរជនផ្សេងៗទៀតសូមបន្តជួយ» ។
លោក មាន ចាន់យ៉ាដា បានបន្តថា ឆ្លៀតក្នុងឱកាសនេះដែរ ក្នុងនាមអាជ្ញាធរ លោកត្រូវធានាសម្រាប់ពលរដ្ឋភៀសសឹក ដោយទី ១ ៖ ពួកគាត់មានជំរកស្នាក់នៅ តាមរយៈការផ្តល់នូវតង់ និងឈើ ដើម្បីធ្វើកន្លែងស្នាក់នៅ ។ ទី ២ ៖ ពួកគាត់ត្រូវមានស្បៀងអាហារ ហើយអំណោយថ្ងៃនេះជាសម្ភារប្រើប្រាស់ ។ ទី ៣ ៖ ត្រូវធានាអំពីសុវត្ថិភាពនិងសុខភាពរបស់ពួកគាត់ ។ ពួកយើងបានរៀបចំពេទ្យ និងមន្ទីរសុខាភិបាល ប្រមាណជាង ៣០នាក់ ហើយក៏មានក្រុមគ្រូពេទ្យស្ម័គ្រចិត្តសម្តេចតេជោធីតាផងដែរ ។
ក្នុងចំណោមជនភៀសសឹករាប់ពាន់គ្រួសារ បងស្រី ចិន្តា បាននិយាយទាំងទឹកភ្នែកថា គាត់មកនៅទីនេះមានរយៈពេល ៤ ថ្ងៃហើយ បងស្រីរត់មកនេះ មាន៣គ្រួសារ មានប្រមាណ ១០នាក់ជាងរាប់ទាំងក្មេងតូចៗ ។
អ្នកធ្វើស្រែចម្ការនៅភូមិកំណើតរូបនេះ បានបន្តថា ៖ «កាលពីដំបូងរត់មកមិនមានអ្វីជិះនោះទេ មកសុំគេជិះតែគេមិនឱ្យ ទម្រាំគេព្រមឱ្យជិះជាមួយមក ត្រូវចាំ ២ថ្ងៃ បានមកទីនេះ ។ រត់មកនេះមានខោអាវ ម្នាក់តែ ២កំប្លេរទេ ចឹងត្រូវផ្លាស់ប្តូរ និងបោករាល់ថ្ងៃ ។ កាលមកដល់ដំបូងយើងអត់មានអ្វីនោះទេ បន្ទាប់មកទទួលបានតង់គេង និងអាហារ» ។ បងស្រី ចិន្តា ក៏បានសុំណូមពរផងដែរថា ស្នើរសុំទឹកដោះគោកូន ព្រោះកូនៗខ្វះច្រើន សម្រាប់មនុស្សធំយើងញុំាអីក៏បាន ហើយពួកយើងក៏នៅខ្វះខាងភួយ និងខោអាវផងដែរ ។
សូមជម្រាបផងដែរថា តាមប្រភពរដ្ឋបាលក្រុងសំរោង គិតចាប់ពីថ្ងៃទី ៨ មកដល់ ត្រឹមម៉ោង ៣ ថ្ងៃត្រង់ថ្ងៃទី ១២ ខែធ្នូ ឆ្នាំ ២០២៥ នេះ ជនភៀសសឹកមានចំនួនសរុប ៤៩៣៥ គ្រួសារហើយ ដែលមកពីសង្កាត់សំរោង អូរស្មាច់ កូនគ្រៀល បន្សាយរាក់ បុស្បូវ បន្ទាយអំពិល និងអន្លង់វែង ៕
ចែករំលែកព័តមាននេះ