ខេត្តព្រៃវែង ៖ រថយន្តបែនដឹកដីមួយគ្រឿងបើកទៅបុកម៉ូតូឌ្រីមសង់សេ១២៥ ដែលបើកមកបញ្ច្រាសទិសគ្នា ហើយរថយន្តបែនដឹកដីបានកិនបុរសម្នាក់ដែលជាអ្នកបើកបរម៉ូតូ បណ្តាលឱ្យបែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៨ព្រឹកថ្ងៃទី២៩ ឧសភា នៅលើកំណាត់ផ្លូវជាតិលេខ១ ត្រង់ចំណុចភូមិព្រៃខ្លា ឃុំកំពង់សឹង្ហ ស្រុកព្រះស្ដេច ខេត្តព្រៃវែង។
បុរសម្នាក់ដែលជាជនរងគ្រោះមិនទាន់ត្រូវបានគេស្គាល់អត្តសញ្ញាណនៅឡើយទេ ចំណែកម៉ូតូដែលជនរងគ្រោះជិះម៉ាកឌ្រីមសង់ សេ១២៥ ពណ៌ខ្មៅ ពាក់ស្លាកលេខ ភ្នំពេញ ១CN-៣៨១៣ ។ ចំណែកអ្នកបើកបររថយន្តបែនដឹកដី ក្រោយកើតហេតុ បានរត់គេចខ្លួនបាត់ ពេលនេះសមត្ថកិច្ចកំពុងស្រាវជ្រាវតាមរកចាប់ខ្លួន។
សមត្ថកិច្ចបានបញ្ជាក់ថា ម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍រដ្ឋបាលឃុំកំពង់សឹង្ហ ។ ពេលនេះសពជនរងគ្រោះត្រូវបានលើកមកដាក់នៅក្បែកន្លែងកើតហេតុ រង់ចាំក្រែងមានអ្នកស្គាល់ទាក់ទងប្រាប់ទៅក្រុមគ្រូសារឱ្យមកទទួលយកសព ប៉ុន្តែបើដល់ថ្ងៃត្រង់ហើយ នៅតែគ្មានអ្នកស្គាល់ ឬមកទទួលយកសពទេនោះ សមត្ថកិច្ចនឹងដឹកយកសពទៅរក្សាទុកនៅវត្តតាជីធំ ដូច្នេះបងប្អូន ឬសាច់ញាតិអាចទៅទទួលយកនៅវត្តនោះបាន ៕
ចែករំលែកព័តមាននេះ