ទីក្រុងម៉ិកស៊ីកូ ៖ រដ្ឋមន្ត្រីសេដ្ឋកិច្ចរបស់ប្រទេសម៉ិកស៊ិក លោក Ildefonso Guajardo បាននិយាយកាលពីថ្ងៃទី២៥ ឧសភា ថា មានឱកាសតែ៤០%ប៉ុណ្ណោះសម្រាប់បញ្ចប់ការចរចាជាថ្មីលើកិច្ចព្រមព្រៀងពាណិជ្ជកម្មសេរីអាមេរិកខាងជើង…
ទីក្រុងម៉ិកស៊ីកូ ៖ រដ្ឋមន្ត្រីសេដ្ឋកិច្ចរបស់ប្រទេសម៉ិកស៊ិក លោក Ildefonso Guajardo បាននិយាយកាលពីថ្ងៃទី២៥ ឧសភា ថា មានឱកាសតែ៤០%ប៉ុណ្ណោះសម្រាប់បញ្ចប់ការចរចាជាថ្មីលើកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) មុនការបោះឆ្នោតនៅថ្ងៃទី១ ខែកក្កដា ។
សហរដ្ឋអាមេរិក ម៉ិកស៊ិក និងកាណាដា បានជាប់គាំងក្នុងការចរចាកិច្ចព្រមព្រៀងនេះអស់រយៈពេល៩ខែមកហើយ ។ ការចរចាជួបការរាំងស្ទះ ព្រោះតែសហរដ្ឋអាមេរិកទាមទារឲ្យដាក់លក្ខខណ្ឌតឹងរ៉ឹងជាងមុនលើគ្រឿងយានយន្តដែលផលិតក្នុងតំបន់ ។
លោក Guajardo បន្តថា អ្នកចរចាតំណាងសហរដ្ឋអាមេរិកត្រូវតែបង្ហាញពីភាពបត់បែន ទើបការចរចាកិច្ចព្រមព្រៀងនេះអាចដំណើរការទៅមុខបាន ។ លោកថា ៖« ខ្ញុំគិតថា មានឱកាសតែ៤០%ប៉ុណ្ណោះ ដែលកិច្ចព្រមព្រៀងនេះអាចសម្រេចបាននៅមុនថ្ងៃទី១ ខែកក្កដា ខាងមុខ » ។
លោកប្រធានាធិបតីអាមេរិក ដូណាល់ ត្រាំ ចង់កែទម្រង់ច្បាប់យានយន្ត ដើម្បីបង្កើតការងារផ្នែកផលិតកម្មបន្ថែមនៅសហរដ្ឋអាមេរិក។ លោកចោទប្រកាន់ថា ប្រទេសម៉ិកស៊ិកបានធ្វើឲ្យបាត់បង់ការងារនៅសហរដ្ឋអាមេរិក ។
លោក Guajardo បន្ថែមថា វាពិតជាសំខាន់ណាស់ដើម្បីសម្រេចកិច្ចព្រមព្រៀង NAFTA ថ្មីឲ្យបានលឿន ប៉ុន្តែមិនមែនត្រូវបោះបង់ចោលគុណភាពទេ ។
ប្រទេសម៉ិកស៊ិកបានស្នើឲ្យមានការដាក់លក្ខខណ្ឌ៧០% លើគ្រឿងរថយន្តដែលផលិតនៅអាមេរិកខាងជើង គឺទាបជាងសហរដ្ឋមេរិកដែលទាមទាររហូតដល់៧៥% ។
យោងតាមប្រភពពីផ្នែកឧស្សាហកម្មថា សហរដ្ឋអាមេរិកចង់បានគ្រឿងយានយន្តផលិតក្នុងតំបន់៤០% ដែលផ្តល់ប្រាក់បៀវត្សរ៍យ៉ាងតិច១៦ដុល្លារក្នុង១ម៉ោង ប៉ុន្តែប្រទេសម៉ិកស៊ិកទាមទារតែ២០%ប៉ុណ្ណោះសម្រាប់យានយន្តផលិតក្នុងតំបន់ ៕
ចែករំលែកព័តមាននេះ