ទីក្រុងញូដេលី៖ ក្រសួងអាកាសចរណ៍ឥណ្ឌាប្រកាសថាអ្នកបើកយន្តហោះរបស់ក្រុមហ៊ុនអាកាសចរណ៍អ៊ែឥណ្ឌា (Air India) ត្រូវបាននាំខ្លួនទៅធ្វើតេស្តរកសារធាតុញៀនបន្ទាប់ពីពួកគេបើកយន្តហោះសុខៗស្រាប់តែក្រឡាប់ផ្កាប់ផ្ងារនៅលើអាកាសបណ្ដាលឱ្យអ្នកដំណើរ និងបុគ្គលិកក្រុមហ៊ុនសរុប១៧នាក់រងរបួស។ យន្តហោះនោះម៉ាកអ៊ែបឺស អេ៣២០ (Airbus A320) ដឹកអ្នកដំណើរ១៣៧នាក់ និងបុគ្គលិកក្រុមហ៊ុន៨នាក់។ កំពុងបើកសុខៗពីកោះភូកេត ប្រទេសថៃ ឆ្ពោះទៅរដ្ឋធានីញូដេលី ប្រទេសឥណ្ឌា យន្តហោះនោះស្រាប់តែធ្លាក់ចុះមកក្រោម៩១ម៉ែត្រកាលពីថ្ងៃទី៤ ខែសីហា។ ក្រោយមក អ្វីៗក៏វិលមករកភាពប្រក្រតីឡើងវិញ ហើយយន្តហោះអាចចុះចតដោយសុវត្ថិភាព។
អ្នកដំណើរ៨នាក់ និងបុគ្គលិកក្រុមហ៊ុន៤នាក់ត្រូវគេបញ្ជូនទៅសម្រាកព្យាបាលនៅមន្ទីរពេទ្យបន្ទាប់ពីចុះចតដល់ទីក្រុងញូដេលីភ្លាម។ ឥឡូវនេះ ពួកគេបានធូរស្បើយឡើងវិញហើយ។ អាកាសយានិកទាំង២នាក់ត្រូវគេបញ្ជូនទៅធ្វើតេស្តរកសារធាតុញៀននៅក្នុងខ្លួន។ សំណាកទឹកនោមរបស់ពួកគេត្រូវបានបញ្ជូនទៅមន្ទីរពិសោធដើម្បីវិភាគ និងកំពុងរង់ចាំលទ្ធផល។ ក្រសួងអាកាសចរណ៍ឥណ្ឌាថ្លែងបន្តទៀតថាហេតុការណ៍នេះត្រូវបានចាត់ទុកថាជាឧបទ្ទវហេតុដ៏ធ្ងន់ធ្ងរមួយដែលតម្រូវឱ្យអាជ្ញាធរបើកការស៊ើបអង្កេត។ អាកាសយានិកទាំង២នាក់នោះត្រូវបានបញ្ឈរជើងពីការងារសិន ដើម្បីរង់ចាំការស៊ើបអង្កេត។ ក្រៅពីនេះ អាជ្ញាធរនឹងបន្តចាត់វិធានការសមស្របដទៃទៀតទៅតាមស្ថានការណ៍ជាក់ស្ដែងស្របទៅតាមលទ្ធផលស៊ើបអង្កេត និងអនុលោមតាមលទ្ធផលធ្វើតេស្តរកសារធាតុញៀន។
តាមរយៈវីឌីអូឃ្លីបដែលថតបាននៅពេលយន្តហោះធ្លាក់ចុះមកក្រោមនោះ គេឃើញវ៉ាលីរបស់អ្នកដំណើរធ្លាក់រប៉ាត់រប៉ាយពេញយន្តហោះ និងឃើញអ្នករបួសត្រូវគេដឹកទៅមន្ទីរពេទ្យតាមប្រង់កា (brancards)។ ក្រុមហ៊ុនអាកាសចរណ៍អ៊ែឥណ្ឌាសរសេររៀបរាប់នៅក្នុងសេចក្ដីប្រកាសរបស់ខ្លួនថាពិតជាមានការធ្វើតេស្តអ្នកបើកយន្តហោះមែន។ ប៉ុន្តែលទ្ធផលតេស្តមិនទាន់ដឹងនៅឡើយទេ។ ឧបទ្ទវហេតុនេះជាចំណុចខ្សោយថ្មីមួយទៀតនៅក្នុងវិស័យដឹកជញ្ជូនតាមយន្តហោះរបស់ក្រុមហ៊ុនអាកាសចរណ៍អ៊ែឥណ្ឌាដែលទើបតែផ្លាស់ប្ដូរនាយកប្រតិបត្តិថ្មីកាលពីថ្ងៃពុធសប្ដាហ៍មុន។ ចាប់តាំងពីទិញយកក្រុមហ៊ុនអ៊ែឥណ្ឌាកាលពីឆ្នាំ២០២២ ក្រុមហ៊ុនតាតា គ្រុប (Tata Group) បានផ្លាស់ប្ដូរមុខមាត់ថ្មីយ៉ាងសម្បើម។ ក្នុងនោះមានការកុម្ម៉ង់ទិញយន្តហោះបន្ថែមរាប់រយគ្រឿង និងកែលម្អយន្តហោះស៊េរីចាស់ៗឱ្យទំនើបឡើងវិញ។
ទោះបីខិតខំធ្វើទំនើបកម្ម និងសមាហរណកម្មយ៉ាងណាក្ដី ក៏ប៉ុន្តែក្រុមហ៊ុននៅតែប្រឈមនឹងបញ្ហាជាបន្តបន្ទាប់។ ឧទាហរណ៍ដូចជាការបញ្ជូនយន្តហោះទៅដល់ដៃក្រុមហ៊ុនមិនទាន់សភាពការណ៍ និងការបិទដែនអាកាសដោយសារជម្លោះប្រដាប់អាវុធរវាងឥណ្ឌា និងប៉ាគីស្ថានកាលពីឆ្នាំ២០២៥។ ប៉ុន្តែអ្វីដែលជាបញ្ហាធាក់ថយខ្លាំងបំផុតសម្រាប់ក្រុមហ៊ុននេះគឺហេតុការណ៍ដែលកើតឡើងកាលពីខែមិថុនា ឆ្នាំ២០២៥នៅពេលយន្តហោះខ្នាតធំដែលមានជើងហោះហើរលេខ១៧១ ធ្លាក់ទៅលើបរិវេណសាលារៀនបណ្ដាលឱ្យស្លាប់មនុស្ស២៤២នាក់ដែលជិះនៅក្នុងយន្តហោះ និងមនុស្ស១៩នាក់ទៀតនៅលើដី។ កាលនោះ យន្តហោះត្រូវធ្វើដំណើរពីឥណ្ឌាទៅទីក្រុងឡុង ប្រទេសអង់គ្លេស។ ហោះទើបតែបានមិនដល់មួយនាទីផង យន្តហោះនោះក៏ជួបប្រទះនឹងឧបទ្ទវហេតុនេះតែម្ដង៕ ប្រភព៖ Vietnam Express
ចែករំលែកព័តមាននេះ