ខេត្តសៀមរាប ៖ កូនអប្រិយ៍ខឹងឪពុកស្តីបន្ទោសឱ្យដើរទៅផឹកស្រាត្រឡប់មកវិញស្ទុះទៅទាញកំបិតផ្កាក់កាប់ឪពុក បង្កើតស្លាប់ភ្លាមៗមួយរំពេចក្នុងថ្លុកឈាមក្រោយផ្ទះរួចរត់គេចខ្លួនបាត់ ហេតុការណ៍នេះបង្កឱ្យមានការភ្ញាក់ផ្អើលពេញភូមិកាលពីម៉ោង៦និង១០នាទីល្ងាច ថ្ងៃទី២៥ ឧសភា ស្ថិតក្នុងភូមិចាន់ហៀរ ឃុំបឹងមាលា ស្រុកស្វាយលើ…
ខេត្តសៀមរាប ៖ កូនអប្រិយ៍ខឹងឪពុកស្តីបន្ទោសឱ្យដើរទៅផឹកស្រាត្រឡប់មកវិញស្ទុះទៅទាញកំបិតផ្កាក់កាប់ឪពុក បង្កើតស្លាប់ភ្លាមៗមួយរំពេចក្នុងថ្លុកឈាមក្រោយផ្ទះរួចរត់គេចខ្លួនបាត់ ហេតុការណ៍នេះបង្កឱ្យមានការភ្ញាក់ផ្អើលពេញភូមិកាលពីម៉ោង៦និង១០នាទីល្ងាច ថ្ងៃទី២៥ ឧសភា ស្ថិតក្នុងភូមិចាន់ហៀរ ឃុំបឹងមាលា ស្រុកស្វាយលើ ។
ជនរងគ្រោះខាងលើឈ្មោះ សុខ ប៉ក់ ភេទប្រុស អាយុ59ឆ្នាំ ត្រូវជាឪពុក មុខរបរកសិករ និងម្តាយឈ្មោះ សួន លាំ អាយុ57ឆ្នាំ រស់នៅភូមិចាន់ហៀរ ឃុំបឹងមាលា ស្រុកស្វាយលើ ចំណែកជនសង្ស័យត្រូវជាកូនបង្កើតឈ្មោះ ប៉ក់ ផាន់ ភេទប្រុស អាយុ17ឆ្នាំ មុខរបរកសិករ រស់នៅភូមិ-ឃុំខាងលើ ព្រមទាំងក្មួយជនសង្ស័យត្រូវជាចៅជនរងគ្រោះឈ្មោះហ៊ាង ធឿន អាយុ១០ឆ្នាំ ។
តាមសមត្ថកិច្ចជំនាញប្រាប់ថា មុនកើតហេតុ ប្រពន្ធជនរងគ្រោះទៅប្តឹងសមត្ថកិច្ចមូលដ្ឋាន ដើម្បីឱ្យចាប់កូនបង្កើតយកមកផ្តន្ទាទោសទៅតាមផ្លូវច្បាប់។ ហើយមូលហេតុ គឺកាលនៅព្រឹកថ្ងៃទី២៥ ឧសភា ជនរងគ្រោះមានជម្លោះពាក្យសំដីជាមួយជនសង្ស័យមិនជួយធ្វើការងារផ្ទះគិតតែពីដើរលេងផឹកស៊ី ពេលចូលផ្ទះម្តងៗសុំតែលុយក៏កើតរឿងឈ្លោះគ្នា រួចជនសង្ស័យដើរចេញពីផ្ទះបាត់ លុៈដល់ល្ងាចថ្ងៃដដែលជនសង្ស័យបានត្រឡប់ចូលផ្ទះវិញក្នុងសភាពស្រវឹង ពេលនោះជនសង្ស័យនិងជនរងគ្រោះក៏ឈ្លោះប្រកែកគ្នាបន្តទៀត ដោយជនរងគ្រោះនិយាយដដែលៗ ស្រាប់តែជនសង្ស័យខឹងក៏ស្ទុះទៅយកកាំបិតផ្លែដែកដងឈើកាប់មកលើជនរងគ្រោះជាឪពុកត្រូវចំគល់ដោះខាងស្តាំ បណ្តាលឱ្យស្លាប់ភ្លាមៗក្នុងថ្លុកឈាមតែម្តង។
បើតាមការបំភ្លឺពីស្ត្រីប្រពន្ធជនរងគ្រោះប្រាប់ថា ប្តីគាត់និងកូនពិតជាមានជម្លោះនឹងគ្នាមែនពីរឿងកូនដើរផឹក និងកូនសុំលុយទៅធ្វើប៉ាស់ស្ព័រទៅថៃ ប៉ុន្តែប្តីគាត់មិនឱ្យលុយទើបទាស់គ្នា នៅពេលកើតហេតុនេះគាត់កំពុងដាំបាយនៅក្នុងផ្ទះក៏លឺសំលេងកូននិងប្តីទាស់គ្នានៅខាងលិចផ្ទះ មួយសន្ទុះក្រោយមកឃើញប្តីដេកដួលក្រោយផ្ទះដោយមានឈាមប្រឡាក់ពេញខ្លួន ចំណែកកូនជិះម៉ូតូចេញទៅបាត់មិនដឹងមូលហេតុ ទើបគាត់ស្រែកប្រាប់គេឱ្យជួយ ប៉ុន្តែប្តីបានស្លាប់បាត់ហើយ។
ចំណែកក្មួយជនសង្ស័យអាយុ១០ឆ្នាំត្រូវជាចៅជនរងគ្រោះប្រាប់ថា នៅល្ងាចនោះរូបគេត្រូវយាយប្រើឱ្យដាំបាយនៅក្បែរផ្ទះ ចំណែកតាគាត់បោសសំរាមមុខផ្ទះ ពេលនោះមារបស់គេ (ជនសង្ស័យ) មិនដឹងមកពីផឹកស្រានៅឯណាទេ ។ ពេលមកដល់គាត់ក៏ឈ្លោះគ្នាជាមួយតា ខណៈនោះតាបានស្តីឱ្យថា «ដើរតែផឹកមិនគិតការងារផ្ទះទេ» មាតបវិញថា «កុំរអ៊ូពេក ខ្ញុំធំខ្ញុំដឹងហើយ» ពួកគាត់ឈ្លោះគ្នាទៅមក តានិយាយថា «អាហែងចូលមកអញមិនខ្លាចងាប់ទេ» លឺដូចនេះ មាក៏ឡើងទៅយកកាំបិតនៅលើជង្រុកស្រូវដើរសំដៅទៅតា ពេលនោះដែរយាយបានចូលទៅឃាត់ ប៉ុន្តែឃាត់មាមិនឈ្នះ ហើយក៏យកកាំបិតនោះចាក់ទៅលើតាត្រូវចំដើមទ្រូងដួលដេកដី ពេលនោះខ្ញុំខ្លាចរត់មកខាងកើតផ្ទះមិនដឹងថា មាយកកាំបិតទៅទុកឯណាទេ ។
ដោយផ្អែកលើការបំភ្លឺ និងវត្ថុតាង (កាំបិត) ចាប់យកបាននៅកន្លែងកើតហេតុ គឺពិតជាជនសង្ស័យបានប្រព្រឹត្តទៅលើជនរងគ្រោះពិតប្រាកដមែន។ បច្ចុប្បន្នសមត្ថកិច្ចបានប្រគល់សពជនរងគ្រោះឱ្យក្រុមគ្រួសារយកទៅធ្វើបុណ្យតាមប្រពៃណី ចំណែកជនសង្ស័យសមត្ថកិច្ចកំពុងដុតដៃដុតជើង ដើម្បីចាប់យកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ