រាជធានីភ្នំពេញ ៖ បុរស ស្ត្រីដែលជាយុវវ័យរាប់រយនាក់បានមកផ្តុំគ្នា និងមានការប្រគំតន្ត្រីកាលពីរាត្រីថ្ងៃទី១៤ កុម្ភៈ ២០១៣ នៅសួនច្បារខាងលិចផ្សាររាត្រី ស្ថិតក្នុងសង្កាត់វត្តភ្នំ ខណ្ឌដូនពេញ ក្នុងគោលបំណងដើម្បីឱ្យបុរសៗទាំងអស់បានយល់ពីសិទ្ធិនារី និងការរងទុក្ខរបស់ស្ត្រី និងកូនៗក្នុងគ្រួសារដែលមានអំពើហិង្សា ។ វេទិកានេះ ត្រូវបានរៀបចំឡើងដោយអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) ហើយនឹងមានអង្គការផ្សេងៗចូលរួមសហការក្នុងការរៀបចំវេទិកានេះផងដែរ ។
នៅក្នុងវេទិកាមួយរយកោដិសំឡេងបញ្ចប់អំពើហិង្សាលើស្ត្រី និងការប្រគំតន្ត្រីនេះអ្នកចូលរួមជាច្រើនបានសម្តែងនូវក្តីរំភើបសប្បាយរីករាយ ក្នុងការដែលយុវវ័យ ជាពិសេសបុរសៗបានយល់ដឹង និងបានចូលរួមក្នុងវេទិកានេះយ៉ាងច្រើនផងដែរនោះ ។ ពួកគេទាំងអស់គ្នាបានបង្ហាញនូវក្បាច់រាំ និងនាំគ្នារាំសប្បាយនៅក្នុងរាត្រីនោះ ដើម្បីបង្ហាញថា ចាប់ពីថ្ងៃនេះតទៅ អំពើហិង្សាលើស្ត្រី នឹងត្រូវបានបញ្ចប់ហើយត្រូវលើកស្ទួយ និងឱ្យតម្លៃលើស្ត្រីក្នុងការចូលរួមអភិវឌ្ឍន៍សង្គមជាតិ ។
លោកស្រី រស់ សុភាព នាយិកាប្រតិបត្តិនៃអង្គការយេនឌ័រ និងអភិវឌ្ឍន៍ដើម្បីកម្ពុជា និងជាអគ្គលេខាធិការនៃគណៈកម្មការលើកស្ទួយស្ត្រីក្នុងវិស័យនយោបាយបានមានប្រសាសន៍ថា ស្ត្រីត្រូវបានរងគ្រោះដោយសារអំពើហិង្សាពីបុរសលើគ្រប់រូបភាពទាំងអស់ ហើយបើយើងនៅស្ងៀមមិនធ្វើអ្វីនោះ ស្ត្រី នៅទូទាំងពិភពលោកនឹងនៅតែរងគ្រោះ ដោយសារអំពើហិង្សាពីបុរសៗ ហើយអ្នកដែលរងគ្រោះ ខ្លាំងជាងគេនោះ គឺអនាគតកូនៗរបស់ពួកគេ ដែលជាទំពាំងស្នងឫស្សីសម្រាប់សង្គមជាតិ ហើយបើទំពាំងដែលដុះមកហើយទទួលនូវបរិយាកាសមិនល្អហើយនោះ តើឫស្សីលូតលាស់ចេញពីទំពាំងនោះនឹងមានសភាពល្អដែលគេអាចយកទៅប្រើការបានទេ ៕
ចែករំលែកព័តមាននេះ