រាជធានីភ្នំពេញ ៖ វីដេអូឃ្លីបមួយ ត្រូវបានគេបង្ហោះតាមបណ្តាញសង្គមហ្វេសបុ៊ក កាលពីរសៀលថ្ងៃទី២១ ខែឧសភា បង្ហាញពីរូបភាពបុរសជនបរទេសម្នាក់ ត្រូវបុរសជនជាតិខ្មែរមួយក្រុមមានគ្នា៥ទៅ៦នាក់ ព្រួតគ្នាវាយនៅម្តុំផ្សារសូរិយាម៉ល ដែលគេសន្និដ្ឋានថា ផ្តើមចេញពីជម្លោះដណ្តើមស្រីស្នេហ៍ ។
បុរសរងគ្រោះជាជនបរទេសរូបនេះ បានទៅដាក់ពាក្យបណ្តឹងនៅប៉ុស្តិ៍នគរបាលផ្សារថ្មីទី៣ ខណ្ឌដូនពេញ ឱ្យជួយរកយុត្តិធម៌ដល់រូបគេ ហើយពេលនេះ សមត្ថកិច្ចកំពុងដុតដៃដុតជើងក្នុងការតាមចាប់ក្រុមជនដៃ ដល់ទាំងនោះ ។ លោក កុល ខាន់ណារ៉ា នាយប៉ុស្តិ៍ផ្សារថ្មីទី៣ បានឱ្យដឹងថា នៅថ្ងៃទី២២ ខែឧសភា បុរសបរទេសម្នាក់ដែលរងគ្រោះដោយសារត្រូវគេព្រួតគ្នាប្រើអំពើហិង្សានោះ បានមកដាក់ពាក្យបណ្តឹងនៅប៉ុស្តិ៍នគរបាលផ្សារថ្មីទី៣ ឲ្យជួយរកយុត្តិធ៌មដល់រូបគេ ហើយរូបលោកក៏បានធ្វើឯកសាររាយការណ៍និងបញ្ជូនទៅអធិការដ្ឋាននគរបាលខណ្ឌដូនពេញជាបន្តទៀត ។
ទោះជាយ៉ាងណា ពាក់ព័ន្ធទៅនឹងករណីនេះលោកនាយប៉ុស្តិ៍បានប្រាប់អ្នកយកព័ត៌មានតែប៉ុន្មានម៉ាត់ប៉ុណ្ណោះ ដោយថារូបលោកកំពុងជាប់រវល់ប្រជុំ ។ ដោយឡែកនៅរសៀលថ្ងៃទី២២ ខែឧសភា អ្នកយើងព័ត៌មានយើងបាន ព្យាយាមទាក់ទងទៅលោក ហួត ចាន់យ៉ារ៉ាន់អធិការនគរបាលខណ្ឌដូនពេញ តែទូរស័ព្ទរបស់លោកហៅចូលហើយពុំមានអ្នកលើកទទួល ។
គួរបញ្ជាក់ថា វីដេអូឃ្លីបមួយត្រូវបានគេបង្ហោះតាមបណ្តាញសង្គមហ្វេសបុ៊ក អំពីសកម្មភាពបុរសបរទេសម្នាក់ ត្រូវបុរសមួយក្រុមមានគ្នា៥ទៅ៦នាក់ ព្រួតគ្នាវាយយ៉ាងចាស់ដៃនៅម្តុំផ្សារសូរិយ៉ាម៉ល ។ តាមរយៈវីដេអូឃ្លីបមួយនេះដែរ ធ្វើឱ្យមានការភ្ញាក់ផ្អើលយ៉ាងខ្លាំងទៅដល់បណ្តាអ្នកប្រើប្រាស់បណ្តាញសង្គម ហ្វេសបុ៊ក នាំគ្នាថ្កោលទោសចំពោះមនុស្សមួយក្រុមនោះ ។ មិនតែប៉ុណ្ណោះ ព័ត៌មានមួយនេះក៏បានធ្វើឱ្យមានការភ្ញាក់ផ្អើលទៅដល់លោកនាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដាក់បញ្ជាឱ្យកម្លាំងមានសមត្ថកិច្ចធ្វើការស្រាវ ជ្រាវចាប់ខ្លួនក្រុមជនដៃដល់ទាំងនេះ យកមកផ្តន្ទាទោសទៅតាមច្បាប់ឱ្យបាន ។
មកដល់ល្ងាចថ្ងៃទី២២ ខែឧសភា គេនៅមិនទាន់ឃើញមានការចាប់ឃាត់ខ្លួនជនដៃដល់ណាម្នាក់ ដែលពាក់ព័ន្ធនឹងការប្រើអំពើហិង្សាលើបុរសបរទេសម្នាក់នេះបាននៅឡើយទេ ហើយប្រជាពលរដ្ឋ ក៏ដូចជាក្រុមអ្នកលេងបណ្តាញសង្គមហ្វេសបុ៊ក ក៏កំពុងនាំគ្នាតាមដាននិងចង់ដឹងយ៉ាងខ្លាំងផងដែរ ៕
ចែករំលែកព័តមាននេះ