រាជធានីភ្នំពេញ ៖ រថយន្តម៉ាកTUNDRAមួយគ្រឿងដែលជាប់ចោទថា បានបើកដេញបុកប្អូនធម៌នាយ ពែកមី តារាកំប្លែងមានប្រជាប្រិយម្នាក់ត្រូវបាននគរបាលខណ្ឌប្ញស្សីកែវស្រាវជ្រាវរកឃើញ និងឈានទៅដកហូតបានហើយ កាលពីវេលាល្ងាចថ្ងៃទី២០ ឧសភា នៅផ្ទះជនសង្ស័យនៅក្នុងបុរីវិមានភ្នំពេញ…
រាជធានីភ្នំពេញ ៖ រថយន្តម៉ាកTUNDRAមួយគ្រឿងដែលជាប់ចោទថា បានបើកដេញបុកប្អូនធម៌នាយ
ពែកមី តារាកំប្លែងមានប្រជាប្រិយម្នាក់ត្រូវបាននគរបាលខណ្ឌប្ញស្សីកែវស្រាវជ្រាវរកឃើញ និងឈានទៅដកហូតបានហើយ កាលពីវេលាល្ងាចថ្ងៃទី២០ ឧសភា នៅផ្ទះជនសង្ស័យនៅក្នុងបុរីវិមានភ្នំពេញ ដែលស្ថិតនៅតាមផ្លូវលេខ៥៩៩ ក្នុងសង្កាត់ច្រាំងចំរេះទី១ ខណ្ឌប្ញស្សីកែវ ។ ទោះបីជាយ៉ាងណា ម្ចាស់រថយន្តដែលគេចោទថា ជាអ្នកបើករថយន្តដេញបុកនោះបានគេចខ្លួនបាត់ ។ ជុំវិញការដកហូតរថយន្តនោះ នគរបាលខណ្ឌប្ញស្សីកែវ ហាក់ដូចជាព្យាយាមលាក់លៀម មិនផ្តល់ព័ត៌មាននានានោះទេ ។
រថយន្តដែលសមត្ថកិច្ចដកហូតម៉ាក TUNDRA ពណ៌.ស ពាក់ផ្លាកលេខភ្នំពេញ២AP-០១៩៨ មានម្ចាស់ឈ្មោះ វ៉ាល់ សុវណ្ណមករា ហៅគី អាយុ៣២ឆ្នាំ ជាខ្មែរអ៊ិស្លាម និងជាមន្ត្រីនគរបាលនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដែលពេលនេះបានគេចខ្លួន ។ ចំណែកជនរងគ្រោះដែលចោទថា ត្រូវរថយន្តដេញបុកឈ្មោះសាលីម ហ្វារីត (តាមនាយពែកមីថាឈ្មោះចាន់ សុផាត) ភេទប្រុស អាយុ២១ឆ្នាំ ជានិស្សិត នៅសាកលវិទ្យាល័យបៀរប្រាយ មហាវិទ្យាល័យព័ត៌មានវិទ្យា ( IT) ឆ្នាំទី៤ មានលំនៅភូមិខ១ សង្កាត់ច្រាំងចំរេះ២ ខណ្ឌឫស្សីកែវបានរងគ្រោះរបួសខណៈពេលដែលជិះម៉ូតូក្នុងល្បឿនលឿនគេចពីការដេញបុក ក៏ជ្រុលចង្កូតទៅបុកចំតោថ្ម និងរបងផ្ទះគេធ្វើឱ្យតោថ្មបែកជាពីរ ។
គួរបញ្ជាក់ថា ករណីបើករថយន្តដេញបុកនេះ យោងតាមរបាយការណ៍នគរបាលប៉ុស្តិ៍រដ្ឋបាលច្រាំងចំរេះទី២បានឱ្យដឹងថា បានកើតឡើងកាលពីវេលាម៉ោង០៩ និង៤២នាទីយប់ថ្ងៃទី១០ ឧសភា នៅចំណុចផ្លូវលេខ១១ (ផ្លូវចូលអាងទឹកច្រាំងចំរេះ) ក្នុងភូមិខ.១ សង្កាត់ច្រាំងចំរេះទី២ ខណ្ឌឫស្សីកែវ ។ បន្ទាប់ពីកើតហេតុ ក្រុមគ្រួសារជនរងគ្រោះក៏បានទៅដាក់ពាក្យបណ្តឹងនៅស្នាក់ការប៉ុស្តិ៍តែបែរជាស្ងប់ស្ងាត់ ទើបតែនៅថ្ងៃទី១៩ ឧសភា នាយពែកមីក៏បានបង្ហោះវីដេអូនៅក្នុងបណ្តាញសង្គមនិងអំពាវនាវឱ្យសមត្ថកិច្ចខណ្ឌឫស្សីកែវ ក៏ដូចជាសមត្ថកិច្ចផ្សេងៗទៀតជួយរកយុត្តិធម៌ផង ។
ទន្ទឹមនោះ ក្នុងបណ្តាញសង្គមរបស់អធិការដ្ឋាននគរបាលខណ្ឌឫស្សីកែវ ក៏បានប្រតិកម្មតបភ្លាមៗ ដោយអះអាងថានឹងរកយុត្តិធម៌ជូនប្អូនធម៌ប្រុសរបស់នាយពែកមី ដោយបានសរសេរតបថា«ជំរាបជូនលោកពែកមី ក៏ដូចសាធារណជនមេត្តាជូនជ្រាប ! ចំពោះករណីដែលបានកើតឡើងកាលពីថ្ងៃទី១០ ឧសភា សមត្ថកិច្ចខណ្ឌឫស្សីកែវនឹងប៉ុស្តិ៍នគរបាលរដ្ឋបាល បាននឹងកំពុងខិតខំជំរុញលើវិធានការជំនាញទាំងនីតិវិធីនិងប្រតិបត្តិការតាមប្រសាសន៍ដឹកនាំនិងបទបញ្ជារបស់លោកនាយឧត្តមសេនីយ៍ ជួន សុវណ្ណអគ្គស្នងការរង នឹងជាស្នងការនគរបាលរាជធានីភ្នំពេញ សូមក្រុមគ្រួសារជនរងគ្រោះក៏ដូចសាធារណជន មេត្តាផ្តល់ទំនុកចិត្តលើសមត្ថកិច្ចយើងខ្ញុំ !» ។ បន្ទាប់ពីមានប្រតិកម្មសមត្ថកិច្ចក៏បានបើកការស្រាវជ្រាវឈានទៅដល់ការដកហូតបានរថយន្តតែម្តង ។
នៅក្នុងរបាយការណ៍ដែលបានបង្ហោះនៅក្នុងបណ្តាញសង្គមនោះ ក៏បានបន្តទៀតថា យោងតាមកំណត់ហេតុសាកសួរបំភ្លឺសន្និដ្ឋានថា ឈ្មោះ វ៉ាល់ សុវណ្ណមករា ហៅគី ពិតជាបានប្រព្រឹត្តិហិង្សាដោយចេតនាមានស្ថានទម្ងន់ទោស (បើករថយន្តដេញបុកបណ្តាលឱ្យជនរងគ្រោះបុកជញ្ជាំងរបងទ្វារផ្ទះរងរបួសធ្ងន់) ពិតប្រាកដមែន ។ តាមព័ត៌មានពីសមត្ថកិច្ចបានឱ្យដឹងថាការឈានទៅប្រើហិង្សាបើករថយន្តដេញបុកបណ្តាលឱ្យជនរងគ្រោះជិះគេចជ្រុលទៅបុករបងទ្វារផ្ទះរបួសធ្ងន់នេះ ផ្តើមចេញពីរឿងទំនាស់ពេលធ្វើចរាចរណ៍នៅតាមដងផ្លូវ ។ តាមព័ត៌មានឱ្យដឹងទៀត នៅមុនពេលកើតហេតុជនរងគ្រោះបានជិះម៉ូតូម៉ាកស្មាក់វី ពណ៌.ស លាយខ្មៅមួយគ្រឿង ពាក់ផ្លាកលេខភ្នំពេញ១CC-៣៨៦៩មួយគ្រឿងធ្វើដំណើរ តាមផ្លូវជាតិលេខ៥ ក្នុងទិសដៅពីត្បូងទៅជើង ។ នៅពេលមកដល់ផ្លូវភ្លោះអតីតផ្លូវរថភ្លើង ក្នុងសង្កាត់គីឡូម៉ែត្រលេខ៦ ស្រាប់តែមានរថយន្តរបស់មន្ត្រីនគរបាលរូបនេះដែលទើបតែចេញពីស៊ីការបានស៊ីប្លេសុំផ្លូវ តែជនរងគ្រោះទំនងជាមិនឮមិនបានគេច ឬបើកផ្លូវឱ្យរថយន្តនោះទេ ជាហេតុធ្វើឱ្យមន្ត្រីនគរបាលរូបនោះខឹងបានបើកដេញនិងកៀរឱ្យឈប់ នៅចំណុចផ្លូវចូលអាងទឹកក្បែរកន្លែងកើតហតុខាងលើ ។
តាមព័ត៌មានឱ្យដឹងទៀតថា នៅពេលឈប់មន្ត្រីប៉ូលិសរូបនោះបានបន្ទោសថា អ្ហែងចង់ងាប់បានជាមិនអែបខាង ហើយជនរងគ្រោះថា អត់ដឹង ហើយក៏បានសុំទោសដោយនិយាយថា សុទ្ធតែគ្នាឯងទេ តែជននោះនៅតែគំហកមិនបាច់សុំទោសទេ ព្រមទាំងបោះសំដីថា បើឡើងជិះម៉ូតូអញបើកបុក ។ នៅពេលជនរងគ្រោះបើកម៉ូតូចេញទៅ ក៏ត្រូវមន្ត្រីប៉ូលិសរូបនោះបើករថយន្តដោយកំហឹងរហូតទួងកង់រថយន្តបើកចេញ ធ្វើឱ្យជនរងគ្រោះដែលលោកពែកមីអះអាងថា ជាប្អូនធម៌បានជិះគេចខ្លួនហួសផ្ទះ រហូតដល់ផ្លូវកែងក៏ជ្រុលទៅត្រង់ បុករបងទ្វារនិងតោថ្ម រងរបួសធ្ងន់ហើយជននោះក៏បានគេចខ្លួនបាត់ ។ តាមរយៈវីដេអូកាមេរ៉ាសុវត្ថិភាពនៅចំណុចនោះ ក៏បានបង្ហាញពីសកម្មភាពដេញបុកនោះផងដែរ ។
តាមស្ត្រីឈ្មោះ នី រីយ៉ា អាយុ៣៧ឆ្នាំ ត្រូវជាម្តាយមីងជនរងគ្រោះបានឱ្យដឹងថា នៅមុនពេលកើតហេតុ ក្មួយប្រុសបានធ្វើដំណើរមកពីរៀនដោយមុននោះ មានភ្លៀងលិចចិញ្ចើមផ្លូវ ជាហេតុធ្វើឱ្យក្មួយជិះម៉ូតូកណ្តាលផ្លូវ ជាហេតុធ្វើឱ្យជនដៃដល់ខឹងមិនចៀសក៏ បើករថយន្តដេញនិងគៀរឱ្យឈប់និងជេរប្រមាថ ហើយក្មួយបានសុំទោសនៅពុំព្រម នៅពេលបើកម៉ូតូចេញជននោះក៏បានបើករថយន្តដេញបុក ជាហេតុធ្វើឱ្យក្មួយជិះគេចជ្រុលទៅបុករបងផ្ទះគេរបួសធ្ងន់ ។តាមក្រុមគ្រួសារបានឱ្យដឹងទៀតថា បន្ទាប់ពីរងរបួសក៏បាននាំទៅព្យាបាលនៅមន្ទីរពេទ្យកាល់ម៉ែតក្អួតធ្លាក់ឈាម ហើយថ្ងៃទី១៩ ឧសភា ក៏បានបញ្ជូនទៅព្យាបាលនៅប្រទេសវៀតណាម ។
តាមក្រុមគ្រួសារក៏បានឱ្យដឹងដែលថា បន្ទាប់ពីកើតហេតុគាត់និងបងប្អូនក៏បានទៅដាក់ពាក្យបណ្តឹងដោយទាមទារសំណងថ្លៃព្យាបាល២ម៉ឺន ៥ពាន់ដុល្លារ ។ជនរងគ្រោះ និងនាយពែកមីត្រូវបានគេដឹងថាជាអ្នករាប់អានគ្នានិងលេងបាល់ជាមួយគ្នា (តាមពែកមីថា ជាប្អូនធម៌) ។ បើតាមក្រុមគ្រួសារថា ជនរងគ្រោះអនាគតត្រូវជាប្អូនថ្លៃនាយពែកមី ព្រោះជនរងគ្រោះនិងប្អូនស្រីរបស់នាយពែកមីស្រលាញ់គ្នាដោយចាស់ទុំទាំងសងខាងបានដឹងឮ ។ ដោយឡែក ឈ្មោះ វ៉ាល់ សុវណ្ណមករា ហៅគី តាមព័ត៌មានឱ្យដឹងថា ជាកូនមន្ត្រីនគរបាលម្នាក់នៃស្នងការដ្ឋាននគរបាលរាជធានីភ្នំពេញចូលនិវត្តន៍ ។ ពីមុនលោកជានគរបាលខណ្ឌឫស្សីកែវផ្នែកអន្តរាគមន៍ ហើយបានប្តូរទៅជានគរបាលនៅការិយាល័យចរាចរណ៍នៃស្នងការដ្ឋាននគរបាលរាជធានីភ្នំពេញ និងជាកូនប្រសាមន្ត្រីនគរបាលខណ្ឌឫស្សីកែវម្នាក់ផងដែរ ។
ជុំវិញការចោទប្រកាន់មន្ត្រីនគរបាលដេញបុកនេះ កោះសន្តិភាពពុំបានទទួលការបំភ្លឺពីក្រុមគ្រួសារមន្ត្រីនគរបាលជាប់ចោទរូបនោះឡើយ ៕
ចែករំលែកព័តមាននេះ