រាជធានីភ្នំពេញ ៖ បុរសម្នាក់ចេញពីផឹកស៊ីស្រវឹងទោរទន់បានជិះម៉ូតូធន់ធំឡើងស្ពានអាកាសស្ទឹងមានជ័យ ទាំងបញ្ច្រាសទិសដៅចរាចរណ៍ជ្រុលទៅបុករ៉ឺម៉កដឹកបាយជ្រូកពេញទំហឹងបណ្តាលឱ្យអ្នករងរបួសធ្ងន់ម្នាក់និងស្រាលម្នាក់ហេតុការណ៍នេះដែរបានកើតឡើងនៅវេលាម៉ោង៣និង៣០នាទីទៀបភ្លឺ ថ្ងៃទី២២ ខែឧសភា ឆ្នាំ២០១៨ ចំណុចលើស្ពានអាកាសស្ទឹងមានជ័យ ផ្លូវ២៧១ សង្កាត់ស្ទឹងមានជ័យ១ ខណ្ឌមានជ័យ ។
តាមប្រភពព័ត៌មានពីកន្លែងកើតបានឱ្យដឹងថា មុនពេលកើតហេតុគេបានឃើញបុរសម្នាក់វ័យជាង៣០ឆ្នាំ បានបើកម៉ូតូសណ្តោងរ៉ឺម៉កដឹកបាយជ្រូកធ្វើដំណើរតាមផ្លូវ២៧១ចុះពីលើស្ពានអាកាសស្ទឹងមានជ័យវិញ លុះមកដល់ចំណុចកើតហេតុក៏ស្រាប់តែមានបុរសម្នាក់វ័យជាង២០ឆ្នាំមិនដឹងថា ចេញពីផឹកស៊ីវិញនៅកន្លែងណានោះទេបានជិះម៉ូតូធន់ធំម៉ាក Duke ពណ៌សលាយទឹកក្រូច ពាក់ស្លាកលេខ ភ្នំពេញ ១GQ-៥២៦១ ធ្វើដំណើរតាមផ្លូវ២៧១ក្នុងទិសដៅពីត្បូងទៅជើងឡើងស្ពានអាកាសស្ទឹងមានជ័យក្នុងទិសដៅបញ្ច្រាសទិសចរាចរណ៍ហើយបើកលឿនដូចហោះ ព្រមទាំងស្រវឹងផងនោះបានជ្រុលទៅបុកនឹងរ៉ឺម៉កដឹកបាយជ្រូកដែលជិះដោយបុរសម្នាក់យ៉ាងពេញទំហឹងបណ្តាលឱ្យអ្នកបើកម៉ូតូរ៉ឺម៉ករងបួសបាក់ជើងខាងឆ្វេង ត្រូវបានរថយន្តសង្គ្រោះដឹកយកទៅសង្គ្រោះនៅគ្លិនិកឯកជន ចំណែកអ្នកបើកម៉ូតូបង្កវិញរងរបួសរលាត់ដៃរលាត់ជើងតិចតួចមិនបានទៅមន្ទីពេទ្យនោះទេ រីឯម៉ូតូរងការខូចខាតខ្ទេចផ្នែកខាងមុខបន្តិចបន្តួច ។
ក្រោយពេលកើតហេតុសមត្ថកិច្ចមូលដ្ឋាន និងជំនាញបានចុះទៅកន្លែងកើតហេតុយកម៉ូតូ និងរ៉ឺម៉កទៅរក្សាទុកនៅអធិការដ្ឋានខណ្ឌមានជ័យដើម្បីរងចាំធ្វើការដោះស្រាយ ៕
ចែករំលែកព័តមាននេះ