រាជធានីភ្នំពេញ ៖ បុរស២នាក់ឪពុកកូនបានរងរបួសដៃធ្ងន់ ដោយសារតែលើករងមុខកាំបិតដែលភាគីម្ខាងបានព្រួតគ្នាកាប់ ។ ក្រុមជនដៃដល់ គឺជាគ្រួសារមួយដែលមានគ្នា៥នាក់ ប្រដាប់ដោយដាវ កាំបិត បំពង់ទីប លើកគ្នាចូលកាប់ដល់ក្នុងផ្ទះ ដោយចោទប្រកាន់ទៅលើភាគីខាងអ្នករងគ្រោះថា បណ្តោយឲ្យឆ្កែខាំក្មួយស្រីរបស់ពួកគេ ។ ប្រតិកម្មហិង្សាដ៏សាហាវនេះ បានបង្កឲ្យផ្អើលឆោឡោ ដោយអ្នកជិតខាងរត់ចែកជើងគ្នាគេច ព្រោះខ្លាចរបួសនឹងផ្លែដាវ រហូតដល់សមត្ថកិច្ចចុះទៅអន្តរាគមន៍ ចាប់ឃាត់ខ្លួនក្រុមអ្នកលេងដាវសា
មូរ៉ៃបាន៤នាក់ ។ ចំណែកម្នាក់ទៀតមានរបួសឱ្យទៅពេទ្យក្បែរកន្លែងកើតហេតុ ។ សមត្ថកិច្ចដកហូតដាវមួយដើមកាំបិតប័ុងតោមួយដែកទីបមួយដើម ។ បាតុភាពនេះបានកើតឡើងកាលពីវេលាម៉ោង៨និង១៥នាទីយប់ថ្ងៃទី១៩ ឧសភា ស្ថិតនៅភូមិជម្ពូវ័ន២ សង្កាត់ចោមចៅ៣ ខណ្ឌពោធិ៍សែនជ័យ ។
ជនរងគ្រោះ ឈ្មោះ អុឹម ថន ភេទប្រុស អាយុ៤៩ឆ្នាំ មុខរបរ បើកបររថយន្ត និងកូនប្រុសម្នាក់ទៀតឈ្មោះ អុឹម ផានិត អាយុ២១ឆ្នាំ មុខរបរជាងអេឡិចត្រូនិក ស្នាក់នៅភូមិជម្ពូវ័ន២ សង្កាត់ចោមចៅ៣ ខណ្ឌពោធិសែនជ័យ ។ ចំណែកក្រុមគ្រួសារជនបង្កឃាត់ខ្លួនបាន៤នាក់ ដែលសមត្ថកិច្ចនាំខ្លួនចូលសាកសួរនៅប៉ុស្តិ៍ប៉ូលិសមាន៖ ទី១-ឈ្មោះ សេង កាត់ ភេទប្រុស អាយុ២៩ឆ្នាំ ជនជាតិវៀតណាម មុខរបរ លក់ប្រហិតចៀនតាមរទេះ ។ ទី២-ឈ្មោះ សេង សុីថន ភេទប្រុស អាយុ២៨ឆ្នាំ ជនជាតិវៀតណាម មុខរបរលក់បបរតាមរទេះ ។ ទី៣-ឈ្មោះ គឹម ជី ភេទប្រុស អាយុ២៥ឆ្នាំ មុខរបរ លក់បុកល្ហុងតាមរទេះ ។ ទី៤-ឈ្មោះ ថាច់ ញ៉ ភេទប្រុស អាយុ១៧ឆ្នាំ ជនជាតិវៀតណាម មុខរបរនៅផ្ទះ ។ ចំណែកម្នាក់ទៀតឈ្មោះ គឹម យី អាយុ២១ឆ្នាំ មុខរបរលក់បុកល្ហុង (របួសក្បាលនិងម្រាមដៃ ត្រូវបានបញ្ជូនទៅមន្ទីរពេទ្យ ។ អ្នកទាំង៥ ស្នាក់នៅភូមិព្រៃព្រីងជើង សង្កាត់ចោមចៅ៣ ខណ្ឌពោធិ៍សែនជ័យ ។
តាមសម្តីជនរងគ្រោះនៅកន្លែងកើតហេតុបានឲ្យដឹងថា ក្រុមជន១គ្រួសារនេះបានចោទប្រកាន់មកលើក្រុមគ្រួសាររបស់គាត់ថាបណ្តោយឲ្យឆ្កែសម្បុរខ្មៅមួយក្បាល ខាំក្មួយស្រីរបស់ពួកគេ កាលពីព្រឹកថ្ងៃទី១៨ ឧសភា ហើយមកដល់ព្រឹកថ្ងៃទី១៩ ឧសភា នេះភាគីខាងបង្ក លើកគ្នាមកសួរនិងចោទប្រកាន់រករឿងម្ចាស់ឆ្កែ ទោះជាគាត់បំភ្លឺហេតុផល ថាឆ្កែសម្បុរខ្មៅរបស់គាត់ នៅព្រឹកថ្ងៃទី១៨ ខែឧសភា ដាក់នៅក្នុងផ្ទះ មិនបានចេញក្រៅទេ ហេតុអ្វីទៅខាំមនុស្សកើត ។ គាត់ប្រាប់ថា ក្រែងឆ្កែសម្បុរខ្មៅមួយក្បាល ផ្សេងទៀតនៅក្បែរនោះដែរ ឬយ៉ាងណា ព្រោះនៅទីនោះ មានសត្វឆ្កែសម្បុរខ្មៅចំនួន២ក្បាលដូចគ្នា ។ ទោះជាយ៉ាងណាក្តី គាត់ជួយចេញលុយថ្លៃចាក់ថ្នាំឲ្យតែភាគីបង្កមិនព្រម នាំគ្នាចាកចេញទៅវិញ ។ រហូតមកដល់យប់ថ្ងៃកើតហេតុនេះ ខណៈដែលសមាជិកក្នុងគ្រួសារជុំគ្នានៅក្នុងផ្ទះ ស្រាប់តែភាគីអ្នកចោទលើកគ្នាទាំងគ្រួសារមានគ្នា៥នាក់ ប្រដាប់ដោយដាវ កាំបិត ចូលកាប់ម្ចាស់ឆ្កែដល់ក្នុងផ្ទះ បណ្តាលឲ្យគាត់២នាក់ឪពុកកូនរងរបួសធ្ងន់ ។ក្រោយកើតហេតុ កុំតែបានកម្លាំងសមត្ថកិច្ចច្រើននាក់ទៅជួយអន្តរាគមន៍ ទើបចាប់ឃាត់ក្រុមជនបង្កបាន៤នាក់ នៅកន្លែងកើតហេតុ ។ ដោយឡែកម្នាក់ទៀតមានរបួសឱ្យទៅដេកពេទ្យ (កាប់ត្រូវគ្នាឯង) ព្រោះពេលយប់ ។ សមត្ថកិច្ចដកហូតបានដាវមួយដើម កាំបិតប៉័ងតោមួយដំបងដែកមួយ ។ ចំណែកជនរងគ្រោះ២នាក់ឪកូនទៅព្យាបាលរបួសនៅមន្ទីរពេទ្យជាមុនសិន ទើបទៅបំភ្លឺនៅប៉ុស្តិ៍ប៉ូលិសជាក្រោយ ។
បច្ចុប្បន្ន ករណីខាងលើនេះសមត្ថកិច្ចបានឃាត់ខ្លួនបុរស៤នាក់បណ្តោះអាសន្នយកទៅសួរនាំបន្តនៅអធិការដ្ឋាននគរបាលខណ្ឌពោធិ៍សែនជ័យ ។ នេះជារឿងរ៉ាវមួយគួរឱ្យហួសចិត្តបំផុតដោយសារតែឆ្កែខាំ បែរជាកើតមានហិង្សាលើមនុស្សទៅវិញ ។ ករណីប្រហាក់ប្រហែលគ្នានេះ បានធ្លាប់កើតមានកាលពីជាង១០ឆ្នាំមុន រហូតយកកាំភ្លើងមកបាញ់ប្រហារគ្នា ព្រោះតែរឿងឆ្កែខាំ ទីបំផុតជនដៃដល់រត់ចោលផ្ទះបាត់ដល់ឥឡូវនេះ ទំនងជាព្យាយាមគេចអស់១ជីវិតហើយ ។
បញ្ហានេះគួរដោះស្រាយគ្នាដោយសន្តិវិធីទៅល្អជាង ព្រោះគ្មានម្ចាស់ឆ្កែឯណាមានបំណងឱ្យឆ្កែខាំមនុស្សទេ បើមិនមែនជាចោរនោះ តើវាហុចលទ្ធផលបែបណា ? ទីបំផុតក្លាយជាអ្នកទោសពីបទព្រហ្មទណ្ឌប៉ងសម្លាប់មនុស្ស ព្រោះតែលើកគ្នាចូលទៅតាមកាប់គេ ៕
ចែករំលែកព័តមាននេះ