ខេត្តកណ្ដាល៖ កម្លាំងនគរបាលស្រុកអង្គស្នួល បានធ្វើការឃាត់ខ្លួនក្មេងទំនើង១ក្រុមចំនួន៧នាក់ ដែលមានរហស្សនាមថា«ក្រុមផ្ទះណេត ឬក្រុមប្លុកតាន់» បន្ទាប់ពីក្រុមនេះបានប្រើកាំបិតនិងដំបងដេញតាមកាប់និងវាយប្រហារទៅលើយុវជន១ក្រុមទៀត បណ្ដាលឲ្យរងរបួស និងកាប់បំផ្លាញម៉ូតូជនរងគ្រោះ បណ្ដាលឲ្យរងការខូចខាតថែមទៀតផង ។
ហេតុការណ៍នោះបានកើតឡើងកាលពីវេលាម៉ោង០១ និង៤០នាទីយប់រំលងអាធ្រាត្រឈានចូលថ្ងៃទី១៤ ខែមិថុនា ឆ្នាំ២០២៦ នៅតាមផ្លូវស្ថិតនៅក្នុងភូមិត្រពាំងសុក្រុំ ឃុំបែកចាន ស្រុកអង្គស្នួល ខេត្ដកណ្ដាល ។
នគរបាលបានប្រាប់ថា ក្រុមក្មេងទំនើងខាងលើនោះរួមមាន១-ឈ្មោះ ភឺន រ៉ានុត ហៅនុត អាយុ១៦ឆ្នាំ ជាសិស្ស មានទីលំនៅភូមិព្រៃសំរោង ឃុំបែកចាន ស្រុកអង្គស្នួល(គឺជាមេក្លោង អ្នកកាន់កាំបិតធ្វើសកម្មភាពកាប់ជនរងគ្រោះ ) ។ ២-ឈ្មោះ ខៀវ ហនចននី ហៅចន អាយុ១៨ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅភូមិត្រពាំងខ្នារ ឃុំឆក់ឈើនាង ស្រុកអង្គស្នួល (អ្នកបើកម៉ូតូ) ។ ៣-ឈ្មោះ ស្រីុ ម៉េងស្រៀ អាយុ១៧ឆ្នាំ មានទីលំនៅវាល សង្កាត់កន្ទោក ខណ្ឌកំបូល រាជធានីភ្នំពេញ (អ្នកបើកម៉ូតូ) ។ ៤-ឈ្មោះ រ៉ុន ណារីន ហៅរ៉ុក អាយុ២១ឆ្នាំ មុខរបរកម្មកររោងចក្រ មានទីលំនៅភូមិព្រៃត្បែងមានជ័យ សង្កាត់ឪឡោក ខណ្ឌកំបូល រាជធានីភ្នំពេញ (អ្នកបើកម៉ូតូ ) ។ ៥-ឈ្មោះ នី លីហៀង អាយុ១៨ឆ្នាំ មុខរបរកម្មកររោងចក្រ មានទីលំនៅភូមិព្រៃត្បែងមានជ័យ សង្កាត់ឪឡោក ខណ្ឌកំបូល(អ្នកបើកម៉ូតូ)។ ៦-ឈ្មោះ ប៉ុក ចៅឡុង ហៅឡុង អាយុ២០ឆ្នាំ មុខរបរកម្មកររោងចក្រ មានទីលំនៅភូមិព្រៃត្បែងមានជ័យ សង្កាត់ឪឡោក ខណ្ឌកំបូល(អ្នកជិះក្រោយ កាន់ដំបងឬស្សី)។ ៧-ឈ្មោះ ចេក មួយហាក់ អាយុ២១ឆ្នាំ មុខរបរកម្មកររោងចក្រ មានទីលំនៅភូមិកណ្តាល ឃុំឆក់ឈើនាង ស្រុកអង្គស្នួល(អ្នកជិះពីក្រោយកាន់ដែកដងឆ័ត្រ)។
នគរបាលបានប្រាប់ទៀតថា ដោយឡែកយុវជនរងគ្រោះមានចំនួន០៦នាក់រួមមាន ១-ឈ្មោះ ថៃ ប៉ាវ អាយុ១៩ឆ្នាំ មុខរបរ កម្មកររោងចក្រ មានទីលំនៅបច្ចុប្បន្នស្នាក់នៅភូមិត្នោតម្តើម ឃុំបែកចាន ស្រុកអង្គស្នួល រងរបួសមុខផ្នែកខាងឆ្វេង និងក្បាលខាងក្រោយ ព្រមទាំងខូចខាតម៉ូតូស្ទើរទាំងស្រុង ។ ២-ឈ្មោះ ផល សុខលីន អាយុ១៩ឆ្នាំ មុខរបរកម្មកររោងចក្រ មានទីលំនៅបច្ចុប្បន្នស្នាក់នៅភូមិចុងបង្គោល ឃុំបែកចាន ស្រុកអង្គស្នួល រងរបួសឆ្អឹងជំនីរខាងស្តាំ ដោយជនសង្ស័យវាយ១ដងឆ័ត្រ ។ ៣-ឈ្មោះ សុឹម សីហា អាយុ២១ឆ្នាំ មុខរបរកម្មកររោងចក្រ មានទីលំនៅភូមិចុងបង្គោល ឃុំបែកចាន ស្រុកអង្គស្នួល ខូចខាតម៉ូតូបែកកំបាំងខាងស្ដាំ និងបែកស្តុបក្រោយ ។ ៤-ឈ្មោះ ចាន់ សុធន់ អាយុ២៣ឆ្នាំ មុខរបរនិស្សិត មានទីលំនៅភូមិពោធិ៍ញាណ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ខូចខាតម៉ូតូ បែកក្បាំងខាងឆ្វេង និងបែកចង្គៀងមុខ ។ ៥-ឈ្មោះ អឿ សេតសៅរ៉ា អាយុ២០ឆ្នាំ មុខរបរនិស្សិត មានទីលំនៅភូមិពោធិ៍ញាណ សង្កាត់ស្ទឹងមានជ័យ ខណ្ឌមានជ័យ ខូចខាតម៉ូតូបែកក្បាំងខាងមុខនិងបែកស្តុបសុីញ៉ូខាងស្តាំ ។ ៦-ឈ្មោះ សៀន ថៃ អាយុ២២ឆ្នាំ ជនជាតិខ្មែរ មុខរបរ កម្មកររោងចក្រ មានទីលំនៅភូមិទួលស្វាយ សង្កាត់បឹងធំ ខណ្ឌកំបូល រាជធានីភ្នំពេញ ខូចខាតម៉ូតូ បែកក្បាំងខាងមុខ និងបែកស្តុបក្រោយ។
នគរបាលបានប្រាប់បន្តទៀតថា នៅមុនពេលកើតហេតុ ខណៈដែលក្រុមយុវជនរងគ្រោះកំពុងជិះម៉ូតូទៅដល់ត្រង់ចំណុចកើតហេតុ ក៏ត្រូវក្រុមក្មេងទំនើងរហស្សនាមថា«ក្រុមផ្ទះណេត ឬក្រុមប្លុកតាន់»នោះ ជិះម៉ូតូដេញតាមស្ទាក់កាប់និងវាយ បណ្ដាលឲ្យរងរបួស ។ ពេលនោះជនរងគ្រោះបានរត់គេចយករួចខ្លួនចោលម៉ូតូ ក៏ត្រូវក្រុមនេះកាប់និងវាយបំផ្លាញម៉ូតូ បណ្ដាលឲ្យរងការខូចខាតទៀត ទើបនាំគ្នារត់គេចខ្លួនបាត់អស់ បន្ទាប់មកជនរងគ្រោះបាននាំគ្នាអូសម៉ូតូតាមផ្លូវ ហើយបានជួបកម្លាំងនគរបាលស្រុកអង្គស្នួលកំពុងល្បាត ។
នគរបាលបានបញ្ជាក់ប្រាប់ទៀតថា ខណៈនោះដោយឃើញម៉ូតូជនរងគ្រោះមានសភាពបែកបាក់យ៉ាងដំណំ ហើយពួកគេក៏មានរបួសទៀតនោះនគរបាលក៏បានសួរនាំទើដឹងថា មានក្មើងទំនើង១ក្រុមមានគ្នាជាច្រើននាក់ និងជិះម៉ូតូប្រហែល២០គ្រឿង បានធ្វើសកម្មភាពដេញកាប់ក្រុមខ្លួន ។ បន្ទាប់មកនគរបាលស្រុកអង្គស្នួលក៏បានស្រាជ្រាវតាមឃាត់ខ្លួនជនសង្ស័យចំនួន០៣នាក់ទាំងយប់ រួចនាំយកទៅកាន់អធិការដ្ឋាននគរបាលស្រុកអង្គស្នួលដើម្បីសួរនាំ ។
នគរបាលបានប្រាប់បន្ថែមថា លុះដល់វេលាម៉ោង ០៩និង១០នាទីព្រឹកថ្ងៃដដែល ក៏បានចុះទៅសហការជាមួយកម្លាំងប៉ុស្តិ៍នគរបាលរដ្ឋបាលឪឡោក នៃអធិការដ្ឋាននគរបាលខណ្ឌកំបូល រាជធានីភ្នំពេញ ។ ខណៈនោះបានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យ និងបក្ខពួករួមទាំងវត្ថុតាងមួយចំនួនជាបន្តបន្ទាប់ទៀត រួចនាំយកទៅកាន់អធិការដ្ឋាននគរបាលស្រុកអង្គស្នួល ដើម្បីសួរនាំនិងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ