ពួកគេរីករាយរំភើបស្រក់ទឹកភ្នែកគ្រប់គ្នា...

ពួកគេរីករាយរំភើបស្រក់ទឹកភ្នែកគ្រប់គ្នា…

ថ្ងៃទី ២១ ខែ ឧសភា ឆ្នាំ ២០១៨

ម៉ោង ១២:៥១

ខេត្តបន្ទាយមានជ័យ ៖ បន្ទាប់ពីកោះសន្តិភាពបានចេញផ្សាយស្តីពីទុរគតជនមួយគ្រួសារ ឪពុកខ្នងគម និងកូនស្រី កំពុងរស់នៅបោះតង់តាមបន្ទាត់ព្រំដែនកម្ពុជា-ថៃ ស្ថិតក្នុងភូមិបន្ទាយមានឫទ្ធិ ឃុំគោករមៀត ស្រុកថ្មពួក ការិយាល័យនិពន្ធកោះសន្តិភាព បានទទួលអំណោយ១០ម៉ឺនរៀលភ្លាមពីលោក សេង គី ផ្ទះលក់ជ្រូកខ្វៃ និងទាខ្វៃនៅផ្សារច្បារអំពៅ រាជធានីភ្នំពេញ ។ ភ្លាមៗ ព្រឹកថ្ងៃទី២០ ឧសភា ភ្នាក់ងារកោះសន្តិភាពប្រចាំខេត្តបន្ទាយមានជ័យ បាននាំយកអំណោយដ៏ថ្លៃថ្លានេះជូនដល់ដៃគ្រួសារដែលត្រូវទទួលនេះរួចហើយ ដូចមានរូបថតជាសក្ខីភាព ។

ភ្នាក់ងារកោះសន្តិភាពក៏បានជួយដល់គ្រួសារក្រីក្រមួយនេះបន្ថែម៥ម៉ឺនរៀលទៀត ខណៈកាលពីជួបសម្ភាសន៍លើកដំបូងភ្នាក់ងារយើង ក៏ធ្លាប់ជួយថវិកា៣ម៉ឺនរៀលរួចម្តងទៅហើយដែរ ព្រោះមើលឃើញទុក្ខលំបាកពេក ។

គួបញ្ជាក់ថា បុរសគមខាងលើឈ្មោះ អុី ត្រេក អាយុ៤៨ឆ្នាំ ប្រពន្ធឈ្មោះ ផូ ផន អាយុ៤៣ឆ្នាំ មានកូន៣នាក់ ស្រីម្នាក់ ប្រុស២នាក់ ។ កូនស្រីច្បងឈ្មោះ អុី ត្រប់ អាយុ២២ឆ្នាំបានបោះបង់ការសិក្សារយៈពេល៦ទៅ៧ឆ្នាំហើយ និងរៀនបានត្រឹមថ្នាក់ទី៦ប៉ុណ្ណោះ ព្រោះតែវិបត្តិគ្រួសារក្រីក្រហើយម្តាយជាមេគ្រួសារផងដើរតួជាមនុស្សប្រុសផង រត់ម៉ូតូឌុបកញ្ចាស់ដើម្បីយកប្រាក់ឲ្យប្អូនៗ២នាក់បានរៀនសូត្រក្រែងមានអនាគតនិងគេ ។

ពេលបានទទួលអំណោយ ពួកគេរីករាយរំភើបស្រក់ទឹកភ្នែកគ្រប់គ្នា ព្រោះស្មានមិនដល់ថាមានសប្បុរស ជនបានមើលឃើញដល់ពួកគាត់ក្រីក្រតាមព្រំដែនបែបនេះឡើយ ព្រមទាំងបានបួងសួងទេវតា តាមថែរក្សាសប្បុរសជនឱ្យជួបតែសេចក្តីសុខ ចម្រុងចម្រើនគ្រប់ពេលវេលា កុំបីឃ្លៀងឃ្លាតឡើយ ៕

អត្រាប្តូរប្រាក់

អត្រាប្តូរប្រាក់ផ្សេងទៀត