រាជធានីភ្នំពេញ ៖ តាំងពីដំណាក់កាលលោក អេ ភូថង ហក់ចូលសម្ដែងភាពយន្តដំបូងអំឡុងឆ្នាំ២០០៤មកទល់ពេលនេះគេមើលឃើញថា កីឡាករ-កីឡាការិនីមិនតិចនាក់ទេដែលត្រូវបានគេជ្រើសរើសឱ្យសម្ដែងក្នុងខ្សែភាពយន្តខ្នាតតូចនិងខ្នាតធំដូចលោក ដែរ ។ មិនតែប៉ុណ្ណោះអ្នកខ្លះបានក្លាយជាតារាសម្ដែងអាជីពមានកេរ្តិ៍ឈ្មោះបោះសំឡេង…
រាជធានីភ្នំពេញ ៖ តាំងពីដំណាក់កាលលោក អេ ភូថង ហក់ចូលសម្ដែងភាពយន្តដំបូងអំឡុងឆ្នាំ២០០៤មកទល់ពេលនេះគេមើលឃើញថា កីឡាករ-កីឡាការិនីមិនតិចនាក់ទេដែលត្រូវបានគេជ្រើសរើសឱ្យសម្ដែងក្នុងខ្សែភាពយន្តខ្នាតតូចនិងខ្នាតធំដូចលោក
ដែរ ។ មិនតែប៉ុណ្ណោះអ្នកខ្លះបានក្លាយជាតារាសម្ដែងអាជីពមានកេរ្តិ៍ឈ្មោះបោះសំឡេង និងមានទីផ្សារខ្ពស់នៅក្នុងពិភពភាពយន្តទៀតផង ។ ខាងក្រោមនេះកោះសន្តិភាពសូមលើកយកកីឡាករ-កីឡាការិនីមួយចំនួនដែលមានស្នាដៃក្នុងពិភពសម្ដែងមកបង្ហាញជូនប្រិយមិត្តអ្នកអានបានជ្រាប។
+ អេ ភូថង ៖ ជាអតីតកីឡាករប្រដាល់ដែលមានទីផ្សារខ្ពស់ក្នុងវិស័យសម្ដែងចាប់តាំងពីលោកល្បីឈ្មោះ ។ ស្ទើរតែគ្រប់ភាពយន្តដែលលោកបានសម្ដែង សុទ្ធតែមានសន្ទុះខ្លាំង
ក្លាទទួលការគាំទ្រមិនអន់ជាងតារាសម្ដែងអាជីពនោះទេ ដោយសារតែលោកគឺជាកីឡាករល្បីឈ្មោះស្រាប់ ហើយបើនិយាយពីការសម្ដែងរបស់លោកវិញក៏ថ្នឹកមិនធម្មតាដែរ ។
ថ្វីដ្បិតតែការនិយាយស្ដីរាងដំឡាន់បន្តិច ប៉ុន្តែផលិតករភាគច្រើនចូលចិត្តផ្ដល់ឱកាសឱ្យលោកបានសម្ដែងក្នុងតំណែងជាតួអង្គមេបងធំ ជាតួអ្នកចេះក្បាច់គុន និងជាតួចិត្តអាក្រក់ជាដើម កម្របានសម្ដែងជាតួចិត្តល្អ ឬជាតួឯកខ្លាំងណាស់ ។ នៅក្នុងរឿងខ្លះលោកសម្ដែងតែមួយប្លង់បង្គ្រប់កិច្ចក៏មាន តែលោកមិនដែលប្រកាន់ថាទាល់តែឱ្យ
សម្ដែងច្រើនប្លង់ទើបទទួលសម្ដែងនោះទេ ។
ភាពយន្តដំបូងបង្អស់របស់លោកគឺរឿង«អាត់៣»ដាក់បញ្ចាំងក្នុងឆ្នាំ២០០៤ធ្វើឱ្យលោកលេចធ្លោនិងចាប់ផ្ដើមមានការងារសម្ដែងជាហូរហែបន្ថែមពីលើការងារប្រដាល់ ។ មកទល់ពេលនេះ ដ្បិតថាលោកបានបោះបង់ការប្រដាល់លើរេញច្រើនឆ្នាំហើយក៏ដោយ ក៏លោកនៅតែឆ្មក់បានតំណែងក្នុងខ្សែភាពយន្តម្ដងៗដែរ ។ អ៊ីចឹងហើយទើបលោក អេ ភូថង នៅតែលេចធ្លោក្នុងអាជីពសម្ដែង ដោយមុននេះលោកក៏ទើបតែលេចមុខក្នុងខ្សែភាពយន្តខ្នាតធំផងដែរ។
+ ជៀស ស្រួច ៖ អតីតកីឡាករប្រដាល់ក្បាច់គុនបុរាណខ្មែររូបនេះបានសម្ដែងតួឯកក្នុងខ្សែភាពយន្តរឿង«បេះដូងអ្នកប្រដាល់»អំឡុងចុងឆ្នាំ២០០៤ ជាមួយនាងហៀប ម៉ារ៉ាឌី ។
ការសម្ដែងរបស់លោកនៅក្នុងពេលនោះទទួលការគាំទ្រយ៉ាងខ្លាំងធ្វើឱ្យលោកបោះបង់ការប្រដាល់ចូលប្រឡូកការងារសម្ដែងនោះវិញ ។ នៅនាទីចុងក្រោយ បើកុំតែលោកខូចចិត្តរឿងបែកបាក់ភរិយា កុំអីលោកល្បីកាន់តែខ្លាំងបាត់ទៅហើយមកទល់នឹងពេលនេះ ។ ទោះបីយ៉ាងណាមុនពេលធ្លាក់ខ្លួន លោក ជៀស ស្រួច ក៏មានស្នាដៃរាប់មិនអស់ផងដែរក្នុងពេលលោកនៅជាតារាសម្ដែង។
+ សម ថារ័ត្ន ៖ កីឡាការិនីពហុជំនាញរូបនេះ រឹតតែលេចធ្លោថែមទៀតសម្រាប់វិស័យសម្ដែង ដោយសារតែនាងគឺជាកីឡាការិនីល្បុក្កតោតែម្នាក់គត់ដែលមានឱកាសបានសម្ដែងច្រើនរឿងជាងគេ ។ នាងមានស្នាដៃរាប់មិនអស់នៅក្នុងវិស័យភាពយន្ត ដោយភាពយន្តរឿង«មុនដំបូងខ្មែរក្រហមសម្លាប់ប៉ារបស់ខ្ញុំ» និងរឿង «Jailbreak ការពារឧក្រិដ្ឋជន»គឺជាភាពយន្តដែលធ្វើឱ្យនាងឡើងកូដកប់ពពកតែម្ដង ។
កញ្ញា សម ថារ័ត្ន និយាយថា ការសម្ដែងគឺជាចំណូលចិត្តរបស់នាង ទើបនាងប្រឹងប្រែងរហូតទទួលជោគជ័យក្នុងវិថីសិល្បៈ។
+ ចាន់ រតនា ៖ កីឡាករប្រដាល់រូបនេះ ក៏ជាតារាសម្ដែងដែលមានការគាំទ្រខ្លាំងកាលពីមុនផងដែរ ។ លោកបានសម្ដែងជាតួឯកក្នុងរឿង«ផ្នូរខ្មោចរន្ទះបាញ់»ខណៈតារាសម្ដែង
និងបង្ហាញម៉ូដនាងម៉ាក សែនសូនីតាជាតួឯកស្រី ។ ប៉ុន្តែមកពីលោកចាកចេញទៅរស់នៅប្រទេសបារាំងមួយរយៈ ហើយក្រោយការវិលវិញលោកក៏ស្ងាត់ទាំងការសម្ដែង និងការប្រដាល់ស្របគ្នាធ្វើឱ្យទស្សនិកជនប៊ិៈនឹងបំភ្លេចស្នាដៃរបស់លោកទៅហើយ។
+ ប្រាក់ មុន្នីឧត្ដម ៖ ជាកីឡាករបាល់ទាត់ដំបូងគេដែលបានចូលរួមសម្ដែងក្នុងខ្សែភាព
យន្តខ្នាតធំឱ្យផលិតកម្មក្នុងស្រុកមួយក្នុងតំណែងជាតួឯករឿង«មេកប់ស៊េរី»។ ប៉ុន្តែក្រោយលេចមុខក្នុងភាពយន្តនេះ លោកបែរជាប្រកាសថាឈប់ថតទៅវិញដោយសារតែលោកបញ្ជាក់ថាមិនមានចំណូលចិត្ត និងថាមិនចង់សុំច្បាប់ពីការហាត់បាល់ទាត់។
+ លី វ៉ាហេទ ៖ កីឡាករបាល់ទាត់រូបនេះក៏បានក្លាយជាតារាសម្ដែងផងដែរ ដោយលោកបានសម្ដែងក្នុងរឿង«ខូចចិត្តអាជីព»ជាតួឯកជាមួយអ្នកនាងសុខ សោម៉ាវត្តី ហើយដោយសារតែភាពយន្តនេះ លោក និងតួឯកស្រីរូបនេះ ក៏បានក្លាយជាគូស្នេហ៍នឹងគ្នារហូតដល់បច្ចុប្បន្ន។ មកទល់ពេលនេះ លោកបានទាក់ទាញការងារសម្ដែងលើផ្នែកថតបង្ហាញម៉ូដ និងការងារថតស្ពតច្រើន ប៉ុន្តែភាពយន្តជាស្នាដៃថ្មីនៅមិនទាន់មានទេ។
+ អូត ភូថង ៖ អតីតកីឡាករប្រដាល់រូបនេះ ទោះបីមិនសូវមានដុងខាងសម្ដែង ប៉ុន្តែលោកបានលេចមុខក្នុងខ្សែភាពយន្តរឿង«ក្បាច់គុនល្បុក្កតោ»ដោយសម្ដែងជាសិស្សគុនចូលចិត្តរករឿងគេឯងក្នុងភូមិ ។ លោកមិនសូវហ៊ានទទួលសម្ដែងរឿងច្រើនទេ ដោយសារតែខ្លាចសម្ដែងមិនកើត និងមិនសូវសម ទើបធ្វើឱ្យលោកមិនសូវលេចធ្លោក្នុងការសម្ដែង។
+ វ៉ន វីវ៉ា និងសេន ប៊ុនថេន ៖ កីឡាករប្រដាល់ទាំង២រូបនេះក៏ធ្លាប់សម្ដែងភាពយន្តមួយរឿងជាមួយគ្នាផងដែរ ស្របគ្នានឹងជម្លោះពាក្យសម្ដីក្នុងគ្រាមុនផ្ទុះឡើង ប៉ុន្តែភាពយន្តមុនៗមិនធ្វើឱ្យពួកលោកលេចធ្លោនិងចាប់អារម្មណ៍ខ្លាំងពីសំណាក់ទស្សនិកជនទេ។
+ ឃុន ឌីម៉ា ៖ កីឡាករប្រដាល់រូបនេះបានសម្ដែងក្នុងខ្សែភាពយន្តខ្នាតធំមួយរឿង ប៉ុន្តែមិនសូវទទួលការចាប់អារម្មណ៍នោះទេ ដោយសារតែភាពយន្តនោះ ក្រោយការដាក់បញ្ចាំងក្នុងរោងកុនទទួលបានការចាប់អារម្មណ៍តិចតួច ហើយការសម្ដែងរបស់លោកក៏មិនច្រើនប្លង់ប៉ុន្មានដែរ។
+ សុខ សុវណ្ណដែន ៖ អតីតកីឡាករល្បុក្កតោរូបនេះ បានក្លាយជាតារាសម្ដែងភាពយន្តល្បីល្បាញតែម្ដងមកទល់ម៉ោងនេះ ដោយសារតែលោកបានសម្ដែងភាពយន្តវាយតប់ច្រើននាពេលចុងក្រោយ ។ លោកត្រូវគេស្គាល់ថាជាតារាសម្ដែងច្រើនជាងអាជីពកីឡាករនោះផង មកទល់ម៉ោងនេះ។
+ ពេជ្រ ចរណៃ ៖ កញ្ញាជាសិស្សគុនល្បុក្កតោ ប៉ុន្តែចុងក្រោយគេស្គាល់នាងជាតារាសម្ដែងច្រើនជាង ដោយសារតែនាងមានសម្រស់ស្រស់ស្អាត និងមានស្នាដៃបញ្ចេញក្បាច់គុនបានល្អត្រូវតាមផលិតករចង់បាន ។ នាងមានស្នាដៃក្នុងភាពយន្តច្រើននាពេលចុងក្រោយ ជាពិសេសចាប់តាំងពីត្រូវបានបញ្ចូលជាសមាជិក«គ្រួសារតារាកម្ពុជា»។
+ សុវណ្ណ គីរី ៖ កីឡាករការ៉ាតេដូរូបនេះ តាំងពីបានសម្ដែងក្នុងរឿង«ភូមិខ្ញុំស្រស់ឆើតឆាយ» មក គឺថាល្បីឈ្មោះតែម្ដង ។ មកទល់ពេលនេះ ក្រៅពីការងារសម្ដែងលោកគឺជាពិធីករប្រចាំនៅទូរទស្សន៍បាយ័នផង ដោយសារតែលោកចេះកំប្លុកកំប្លែង ប៉ុន្តែលោកនៅតែបង្ហាញមុខជាគ្រូបង្វឹកការ៉ាតេដូនៅស្ដាតអូឡាំពិកជាប្រចាំ៕
ចែករំលែកព័តមាននេះ