រាជធានីភ្នំពេញ ៖ ជាការចូលរួមអបអរសាទរព្រះរាជពិធីបុណ្យចម្រើនព្រះជន្ម ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់៦៥យាងចូល៦៦ព្រះវស្សានៅថ្ងៃទី១៦ ឧសភា…
រាជធានីភ្នំពេញ ៖ ជាការចូលរួមអបអរសាទរព្រះរាជពិធីបុណ្យចម្រើនព្រះជន្ម ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់៦៥យាងចូល៦៦ព្រះវស្សានៅថ្ងៃទី១៦ ឧសភា រាជរដ្ឋាភិបាលបានចេញអនុក្រឹត្យឱ្យធនាគារជាតិនៃកម្ពុជាចេញផ្សាយក្រដាសប្រាក់ប្រភេទ២០០០០រៀលគំរូថ្មីធ្វើចរាចរ និងប្រើប្រាស់នៅទូទាំងព្រះរាជាណាចក្រកម្ពុជា ទន្ទឹមនឹងបណ្តាប្រភេទក្រដាសប្រាក់ដែលបានចេញផ្សាយរួចហើយ ។ ចំពោះលក្ខណៈពិសេសនៃធនបត្រប្រភេទ២០០០០រៀលគំរូថ្មីនេះ មានចែងក្នុងប្រកាសរបស់ធនាគារជាតិនៃកម្ពុជាដូចខាងក្រោម ៖
ផ្ទៃខាងមុខនៃក្រដាសប្រាក់គំរូថ្មីនេះមានបណ្តុះជាព្រះឆាយាល័ក្ខណ៍ព្រះមហាក្សត្រ និងផ្ទៃខាងខ្នងមានរំលេចប្រាង្គប្រាសាទបន្ទាយស្រីដែលជាប្រាសាទមួយមានក្បាច់ផ្កាភ្ញីយ៉ាងល្អនិងថ្មចម្លាក់នរសិង្ហ ដែលស្ថិតនៅក្នុងខេត្តសៀមរាប ។ ក្នុងអនុក្រឹត្យស្តីពីការចេញផ្សាយក្រដាសប្រាក់ប្រភេទ២០០០០រៀលនេះបានណែនាំក្នុងមាត្រា២ឱ្យធនាគារជាតិធ្វើការផ្សព្វផ្សាយពីលក្ខណៈសម្គាល់នៃធនបត្រគំរូថ្មីនេះ ។
មាត្រា៣នៃអនុក្រឹត្យដែលចុះហត្ថលេខាដោយសម្តេចតេជោនាយករដ្ឋមន្ត្រីបានកំណត់ឱ្យរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី អគ្គទេសាភិបាលធនាគារជាតិនៃកម្ពុជា រដ្ឋមន្ត្រី-រដ្ឋលេខាធិការគ្រប់ក្រសួង-ស្ថាប័ន និងអភិបាលរាជធានី-ខេត្តត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ ៕
ចែករំលែកព័តមាននេះ