រាជធានីភ្នំពេញ ៖ ការប្រកួតប្រដាល់អន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃអាទិត្យ ទី១៣ ឧសភា ម្នាក់ៗមានការចាប់អារម្មណ៍យ៉ាងខ្លាំងចំពោះការប្រកួតរវាងកីឡាករ យុគ យក្សគីល និងកីឡាករអុីស្រាអែលដោយសារតែពួកគេបានបើកការវាយគ្នាយ៉ាងចាស់ដៃ…
រាជធានីភ្នំពេញ ៖ ការប្រកួតប្រដាល់អន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃអាទិត្យ ទី១៣ ឧសភា ម្នាក់ៗមានការចាប់អារម្មណ៍យ៉ាងខ្លាំងចំពោះការប្រកួតរវាងកីឡាករ យុគ យក្សគីល និងកីឡាករអុីស្រាអែលដោយសារតែពួកគេបានបើកការវាយគ្នាយ៉ាងចាស់ដៃ ។
ក្រោយពីដឹងលទ្ធផលចាញ់ឈ្នះ គេឃើញកីឡាករបរទេសស្ទុះមកលុតជង្គង់ថ្វាយបង្គំកីឡាករកម្ពុជា ធ្វើឱ្យអ្នកទស្សនាទះដៃឡើងខ្ទរពេញសង្វៀន ។ នេះជាការប្រកួតមួយដែលអ្នកទស្សនាមើលឃើញថា មិនខុសពីយក្សធំប៉ះយក្សតូចនោះទេ ដោយសារតែកីឡាករទាំង២មើលទៅសុទ្ធតែមានមាឌធំដូចគ្នា ហើយកីឡាករបរទេសខ្ពស់ជាងនិងធំជាងបន្តិចផងដែលមើលទៅមិនខុសពីយក្ស២ប៉ះគ្នាទេ។
ការប្រកួតនៅក្នុងថ្ងៃនោះ គ្រាន់តែបង្ហាញសមាសភាពភ្លាម ម្នាក់ៗបានលាន់មាត់ដោយប្រដូចកីឡាករ យុគ យក្សគីល គឺជាយក្សតូច ចំណែកកីឡាករអុីស្រាអែល ដែលមានមាឌធំជាង ខ្ពស់ជាងជាយក្សធំ ធ្វើឱ្យមានការចាប់អារម្មណ៍យ៉ាងខ្លាំងតាំងពីមុនចាប់ផ្ដើមប្រកួត ។
កីឡាករអុីស្រាអែល ត្រូវគេដឹងថាមានបទពិសោធន៍ឡើងរេញតិចជាងកីឡាករកម្ពុជា ប៉ុន្តែទាំងកម្ពស់ និងសមត្ថភាពដែលបានបង្ហាញក្នុងការប្រកួតនោះគេអាចដឹងថា កីឡាករអុីស្រាអែលអាចប្រកួតជាមួយ យុគ យក្សគីល ក្នុងថ្ងៃនោះបាន ដោយសារតែកីឡាករទាំងពីរមានសមត្ថភាព និងកម្លាំងប្រហែលគ្នា ។ ស្របគ្នាកីឡាករបរទេសនៅក្នុងទឹកទី១បានបញ្ចេញថ្វីដៃខ្លាំងក្លាផងនោះ រឹតតែធ្វើឱ្យអ្នកគាំទ្រកីឡាករកម្ពុជាពិបាកជឿថា យុគ យក្សគីល ដែលជាកីឡាករចាស់វស្សានិងមានបទពិសោធន៍លើរេញរាប់មិនអស់ ពិតជាមិនងាយសុីផុយឡើយ ។
នៅក្នុងទឹកទី១ កីឡាករកម្ពុជាដ្បិតថាមានកម្លាំងវាយចេញបានច្រើនប៉ុន្តែសន្ទុះក្នុងការវាយត្រូវមិនច្រើននោះទេ ជាពិសេសក្នុងពេលកីឡាករបរទេសវាយសម្រុកដោយកម្លាំងបាយត្រឡប់មកវិញ ។ យក្សធំអុីស្រាអែល បានធ្វើឱ្យអ្នកទស្សនាបុកពោះយ៉ាងខ្លាំង បន្ទាប់ពីគេមានឱកាសវាយទៅលើយក្សតូចកម្ពុជាធ្វើឱ្យយុគ យក្សគីល ចង់អស់ខ្យល់ក្នុងការតតាំងទៀតផង ។
នៅដើមទឹកទី២ គេឃើញយក្សតូចយុគ យក្សគីល ថែមទាំងត្រូវយក្សធំអុីស្រាអែលវាយឡើងប៉ោងមុខ ហើយដង្ហក់រកផ្លូវតតាំងស្ទើរតែមិនបាននោះផង ។ ទោះបីយ៉ាងណា ចាត់ទុកជារឿងសំណាង សម្រាប់កីឡាករកម្ពុជាដោយសារតែក្នុងពេលប្រទូស្តរ៉ាយគ្នានោះ យុគ យក្សគីលស្រាប់តែមានឱកាសវាយត្រូវគុម្ពថ្គាមគូប្រកួត២ដៃពេញទំហឹងបណ្ដាលឱ្យដួលខ្ពកដូចគេច្រាននិងត្រូវអាជ្ញាកណ្ដាលរាប់ដល់៨ហើយនៅតែសន្លប់
ស្ដូកស្ដឹងមិនដឹងខ្លួនទៀត ។
យុគ យក្សគីល ដែលអ្នកណាក៏មើលឃើញថាអស់ខ្យល់ទៅហើយនោះ សប្បាយចិត្តចង់ហោះនៅពេលឃើញគូប្រកួតរបស់ខ្លួនចាញ់ដោយសន្លប់ធំក្នុងទឹកទី២ ជាមួយសំឡេងហ៊ោកញ្ជ្រៀវពីអ្នកគាំទ្រយ៉ាងកងរំពងពេញសង្វៀន ។ ទាំងក្រុមគ្រូពេទ្យ និងអ្នកឱ្យទឹកបានប្រញាប់ប្រញាល់ចូលទៅក្នុងរេញធ្វើចលនាឱ្យកីឡាករអុីស្រាអែលមួយសន្ទុះទើបដឹងខ្លួនវិញ ។
ការប្រកួតត្រូវបានបញ្ចប់ដោយកីឡាករបរទេសបោះបង់ការប្រកួតក្នុងទឹកទី២ ប៉ុន្តែអ្វីដែលគេចាប់អារម្មណ៍ គឺកីឡាករអុីស្រាអែល មិនបានចុះពីរេញភ្លាមទេ គេបែរជាដើរបកក្រោយពីកន្លែងអ្នកឱ្យទឹកគ្រាហ៍ចុះនោះ មកលុតជង្គង់ថ្វាយបង្គំកីឡាករកម្ពុជា ធ្វើឱ្យម្នាក់ៗស្រែកហ៊ោកញ្ជ្រៀវអបអរ ។
យុគ យក្សគីល ស្រឡាំងកាំងមិនតិចនោះទេ នៅពេលឃើញគូប្រកួតដែលខ្លួនវាយដល់ថ្នាក់សន្លប់ធំទៅហើយមកលុតជង្គង់ថ្វាយបង្គំទៅវិញ ហើយគេក៏ឱនលុតជង្គង់ឱបវិញដែរ ។ ទិដ្ឋភាពនៃការលុតជង្គង់ដាក់គ្នាទៅវិញទៅមកបានក្លាយជារូបភាពគំរូមួយសម្រាប់កីឡាករនៅលើសង្វៀន ដើម្បីកុំឱ្យមានការវាយតម្លៃថា កីឡាករក្រោយពេលប្រកួតចប់អ្នកចាញ់មិនទទួលស្គាល់ថាខ្លួនអន់ ហើយក្រោយពេលចុះមកដល់ក្រោយឆាកតែងមានការលាបពណ៌ថាខ្លួនចាញ់ដោយសារហេតុផលនេះហេតុផលនោះ។
លោក ថៃ អ៊ូ អ្នកដឹកនាំកីឡាករអុីស្រាអែលឱ្យមកប្រកួតនៅកម្ពុជាបានអះអាងថា លោកពិតជាសរសើរកីឡាករអុីស្រាអែលដែលក្រោយប្រកួតចាញ់បានស្ទុះទៅថ្វាយបង្គំកីឡាករ យុគ យក្សគីល ដោយចាត់ទុក យុគ យក្សគីល ដូចជាគ្រូដែលខុសពីកីឡាករថៃដែលឱ្យតែវាយចាញ់
គឺមិនចង់មើលមុខកីឡាករកម្ពុជានោះទេ។ លោកថា ការប្រកួតមួយនេះ ការពិតកីឡាករកម្ពុជាសំណាងទេ ដោយសារតែភាពជាក់ស្ដែងគឺ យុគ យក្សគីល ក៏អស់កម្លាំងស៊ុហ្វដោយសារតែគេប្រឹងវាយលុកនៅដើមទឹក ។
អ៊ីចឹងហើយទើបលោកនៅតែសរសើរថា កីឡាករអុីស្រាអែលមានការទទួលខុសត្រូវខ្ពស់ ដែលក្រោយប្រកួតចាញ់ហ៊ានទទួលការពិត និងបានទាំងស្ទុះទៅលុតជង្គង់ថ្វាយបង្គំ យុគ យក្សគីល លើរេញ ដោយមិនខ្វល់ពីភ្នែកអ្នកណានោះទេ ។ លោកថា មួយគូនេះបើជួបគ្នាលើកក្រោយនឹងកាន់តែល្អមើល ដោយសារតែកីឡាករអុីស្រាអែល ក៏ស្គាល់កណ្ដាប់ដៃ និងបច្ចេកទេសរបស់កីឡាករកម្ពុជារួចម្ដងហើយបែបនេះ ៕
ចែករំលែកព័តមាននេះ