ប្រទេសឥណ្ឌូណេស៊ី ៖ ប៉ូលិសគូសបញ្ជាក់ថា មនុស្សយ៉ាងតិច១១នាក់ស្លាប់ហើយ៤០នាក់ទៀតរងរបួស កាលពីថ្ងៃទី១៣ ឧសភា ក្នុងការវាយប្រហារភេរវកម្មដោយគ្រាប់បែកនានា ក្នុងនោះមានការវាយប្រហារអត្តឃាតមួយប្រឆាំងព្រះវិហារគ្រឹស្តទាំងឡាយ នៅទីក្រុងស៊ូរ៉ាបាយ៉ា ប្រទេសឥណ្ឌូណេស៊ី…
ប្រទេសឥណ្ឌូណេស៊ី ៖ ប៉ូលិសគូសបញ្ជាក់ថា មនុស្សយ៉ាងតិច១១នាក់ស្លាប់ហើយ៤០នាក់ទៀតរងរបួស កាលពីថ្ងៃទី១៣ ឧសភា ក្នុងការវាយប្រហារភេរវកម្មដោយគ្រាប់បែកនានា ក្នុងនោះមានការវាយប្រហារអត្តឃាតមួយប្រឆាំងព្រះវិហារគ្រឹស្តទាំងឡាយ នៅទីក្រុងស៊ូរ៉ាបាយ៉ា ប្រទេសឥណ្ឌូណេស៊ី ជាប្រទេស អ៊ិស្លាម មានប្រជាជនច្រើនជាងគេនៃពិភពលោក ។
ប៉ូលិសក្រុងស៊ូរ៉ាបាយ៉ា ជាទីក្រុងធំទី២ របស់ឥណ្ឌូណេស៊ី នៅភាគខាងកើតនៃកោះជ្វាបញ្ជាក់ថា ការវាយប្រហារ៣ ត្រូវបានធ្វើក្នុងកន្លែង៣ផ្សេងគ្នាក្នុងចន្លោះពេលត្រឹម១០នាទី ដោយការបំផ្ទុះគ្រាប់បែកលើកទី១ កើតមាននាវេលាម៉ោង៧និង៣០នាទីម៉ោងក្នុងស្រុក ។ អ្នកនាំពាក្យប៉ូលិសមូលដ្ឋានម្នាក់ លោក FRANS BARUNG MANGERA ថ្លែងថា មនុស្ស១១នាក់ស្លាប់ ហើយ៤០នាក់រងរបួស ។ លោកបញ្ជាក់ថា ប៉ូលិស២នាក់ស្ថិតក្នុងចំណោមអ្នករបួស ។
ការវាយប្រហារទាំងនេះដែលពុំមានការប្រកាសទទួលខុសត្រូវ កើតមានប៉ុន្មានថ្ងៃមុនពេលចាប់ផ្ដើមរដូវបួសរ៉ាម៉ាដានក្នុងប្រទេសនៅអាស៊ីអាគ្នេរនេះ ដែលស្ថិតក្នុងការប្រកាសអាសន្នខ្ពស់ ក្រោយការវាយប្រហារនានារយៈពេលប៉ុន្មានឆ្នាំចុងក្រោយនេះ ដោយការវាយប្រហារមួយចំនួន ជាស្នាដៃក្រុមរដ្ឋអ៊ិស្លាម ។
រូបភាពផ្សាយតាមបណ្ដាសារព័ត៌មាននាថ្ងៃទី១៣ឧសភា បង្ហាញសាកសពមនុស្សដេកដួលនៅមុខមាត់ទ្វារព្រះវិហារកាតូលិក SANTA MARIAនៅក្រុង ស៊ូរ៉ាបាយ៉ា ។ ការវាយប្រហារទាំងនេះកើតមានប៉ុន្មានថ្ងៃ បន្ទាប់ពីប៉ូលិសម្នាក់និងអ្នកទោសម្នាក់ស្លាប់ ក្នុងការប៉ះទង្គិចគ្នានៅឯពន្ធនាគារមួយនាជាយក្រុងហ្សាការតា។ក្រុមរដ្ឋអ៊ិស្លាមប្រកាសទទួលខុសត្រូវលើឧប្បត្តិហេតុនេះ ប៉ុន្តែប៉ូលិសបដិសេធ ៕
ចែករំលែកព័តមាននេះ