រាជធានីភ្នំពេញេ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍នៅព្រឹកថ្ងៃទី១៤ ខែឧសភានេះថា សិស្សដែលប្រឡងជាប់មធ្យមសិក្សាទុតិយភូមិទាំងអស់គ្រប់និទ្ទេសគួរត្រូវបានអនុញាតិឲ្យប្រឡងចូលរៀននៅសាលាពេទ្យទាំងអស់ ព្រោះមិនប្រាកដអ្នកជាប់និទ្ទេសផ្សេងមិនមែន A, B និង C អន់នោះទេ ។
ថ្លែងនាឱកាសអញ្ជើញធ្វើជាអធិបតីភាពក្នុងពិធីសម្ពោធដាក់ឲ្យប្រើប្រាស់ «អគារមិត្តភាពកម្ពុជា-កូរ៉េ» ដែលទើបកែលំអរថ្មី ថ្ងៃច័ន្ទ ទី១៤ ឧសភានេះ សម្តេចតេជោមានប្រសាសន៍ថា សម្តេចពិតជាហត់នឿយណាស់ មួយរយៈដោយសារ តែសម្តេចបានដោះស្រាយដូចជាច្រើនពេកហើយ ពាក់ព័ន្ធនឹងវិស័យសុខាភិបាលនៅកម្ពុជា ព្រោះផុតពីរឿងមួយដល់រឿងមួយទៀតមិនចេះឈប់ ខណៈរឿងខ្លះត្រឹមកម្រិតក្រសួងត្រូវដោះស្រាយសោះ ។
ជាក់ស្តែងប៉ុន្មានថ្ងៃមុននេះ សម្តេចប្រមុខរាជរដ្ឋាភិបាលទើបតែដោះស្រាយបញ្ហាសមមូលនៃនិស្សិតពេទ្យវេជ្ជបណ្ឌិតដែលបញ្ជួនទៅបណ្តុះបណ្តាលនៅឯវៀតណាមនោះ គឺនៅវៀតណាមរៀនត្រឹមតែ៦ឆ្នាំ ហើយក្លាយទៅជាវេជ្ជបណ្ឌិត ឯនៅកម្ពុជារៀន គឺត្រូវរៀនដល់ទៅ៨ឆ្នាំ ។ ដែលបញ្ហានេះក្រុមនិស្សិតរៀនចប់ពីប្រទេសវៀតណាមបានចូលសរសេរពេញហ្វេសប៊ុករបស់នាយករដ្ឋមន្ត្រីស្នើសុំអន្តរាគមន៍ ក្រោយពីក្រសួងសុខាភិបាលមិនព្រមទទួលស្គាល់សមមូលនៃសញ្ញាប័ត្រពីប្រទេសវៀតណាម ដែលក្រសួងទាមទារឲ្យពួកគេត្រូវរៀនថែម ឬទៅធ្វើ តេស្តជាថ្មី ។
សម្តេចបានលើកជាចំណោទថា ៖ «បញ្ហាចោទនៅត្រង់ថា ចុះកាលពីមុនប៉ុន្មានឆ្នាំមុននោះ វេជ្ជបណ្ឌិតដដែលរៀននៅសាលាវៀតណាមដដែល ចូលមកម៉េចក៏យើងទទួលគេជាវេជ្ជបណ្ឌិត ។ ស្រាប់តែឥឡូវនេះបែរជាមិនទទួលស្គាល់គេជាវេជ្ជបណ្ឌិតឲ្យគេទៅរៀនថែម ឲ្យគេទៅធ្វើតេស្ត ។ អាហ្នឹងបានខ្ញុំសុំឲ្យឯកឧត្តម ម៉ម ប៊ុនហេង (រដ្ឋមន្ត្រីក្រសួងសុខាភិបាល) ថ្ងៃក្រោយកុំរុញឲ្យខ្លោច កុំរោលឲ្យឆៅ ។ មុនទទួលស្គាល់ជាវេជ្ជបណ្ឌិត៦ឆ្នាំ ទទួលស្គាល់គេជាវេជ្ជបណ្ឌិត ដល់ឥឡូវស្រាប់តែសុខៗឈប់ទទួលស្គាល់ទៅ» ។
សម្តេចបញ្ជាក់ថា នេះមិនមែនជារឿងថ្មីនោះទេ ព្រោះកន្លងមកអ្នកធ្លាប់ទៅរៀននៅវៀតណាមមុនៗ គឺរៀនត្រឹម៦ ដូចគ្នា ពេលចប់ត្រឡប់មកប្រទេសក៏ត្រូវបានទទួលស្គាល់ និងបានធ្វើជាវេជ្ជបណ្ឌិត និងបានធ្វើជាគ្រូបង្រៀនបានទៀត ម៉េចក៏ឥឡូវក្លាយជាបញ្ហា ។ សម្តេចតេជោ ហ៊ុន សែន មានប្រសាសន៍បន្ថែមថា ៖ «អញ្ចឹងបានថា ខ្ញុំមានការហត់នឿយបន្តិចអំពីការខ្លះ រឿងមិនចាំបាច់ ធ្វើឲ្យក្លាយទៅជារឿងចាំបាច់» ។ គេដោះស្រាយជាមួយក្រសួងសុខាភិបាលមិនបាន គេមកសុំអន្តរាគមន៍ជាមួយនឹងនាយករដ្ឋមន្ត្រី ហើយសម្តេចក៏ត្រូវពិនិត្យមើលអំពីបញ្ហានេះ ។
សម្តេចក៏ភ្ជាប់បញ្ហាមួយទៀតដែលសិស្សប្រឡងបាក់ឌុបស្នើសុំការដោះស្រាយពីសម្តេចផងដែរ ពាក់ព័ន្ធការតម្រូវឲ្យសិស្សប្រឡងជាប់បាក់ឌុបជាប់និទ្ទេស A, B និងC ទើបសាលាពេទ្យ ឲ្យចូលប្រឡងរៀនសាលាពេទ្យ ដល់និទ្ទេស D និង E អត់យកទេ ។ សម្តេចតេជោ ហ៊ុន សែនក៏ផ្តល់ជាអនុសាសន៍ថា ៖ «អញ្ចឹងទេ បានខ្ញុំទៅដោះស្រាយបញ្ហាហ្នឹងទៀត ។ ចុះបើយកទាំងអស់ទៅវាងាប់អី0x017d7 អញ្ចឹងបានថា ពេលខ្លះដូចជាហួសពេក ។ អស់លោកមើលតែដើមឈើមួយដើមៗ មិនមើលព្រៃទាំងមូល ឥតបានទេ ។ ខ្ញុំសុំឲ្យអស់លោកបើកទស្សនៈឲ្យបានធំ ទូលាយបន្តិច ។ កុំមើលឈើមួយដើមៗ ត្រូវមើលព្រៃទាំងមូល ។
ពេលខ្លះមិនប្រាកដថា អានិទ្ទេស A ឬ B វាពូកែជាងអា D និង E ទេ ។ ដោយសារតែអញ្ចេះ អាថ្ងៃប្រឡងបាក់ឌុបនោះ គឺជាថ្ងៃដែលគ្នាឥតស្រួលខ្លួន […] ឬក៏ការភ្លេចភ្លាំងណាមួយ អញ្ចឹងគ្នាឥតបានចូលនិទ្ទេសទាំង ៤ ទេ ។ អញ្ចឹងដាក់យកមកប្រឡងមកដាក់មកទាំងអស់មក រួចហើយ ។ ឲ្យប្រឡងមកអ្នកណាក៏ដោយឲ្យតែជាប់បាក់ឌុប កុំចាំបែងចែក អា A ផ្សេង អាB ផ្សេង អាអីផ្សេង» ។ សម្តេចនាយករដ្ឋមន្ត្រីបានបញ្ជាក់ថា ៖ «បងម៉ម ប៊ុនហេងស្រួលទេ ក៏ប៉ុន្តែរដ្ឋលេខាធិការ អនុរដ្ឋលេខាធិការ មួយចំនួន ដូចជា មិនសូវស្រួល ។ ខ្ញុំចេះតែសង្ស័យ […] សំខាន់អារោលឲ្យខ្លោច រុញឲ្យឆៅធ្វើឲ្យខ្ញុំពិបាកណាស់» ៕
ចែករំលែកព័តមាននេះ