រាជធានីភ្នំពេញ ៖ បុរសចិត្តធំម្នាក់បានសន្លប់បាត់ស្មារតី បន្ទាប់ពីមានទំនាស់គ្នាបន្តិចបន្តួចជាមួយប្រពន្ធ ស្រាប់តែលោតពីលើជាន់ទី១(ផ្ទះជួល) ដែលមានកម្ពស់ប្រមាណ៤ទៅ៥ម៉ែត្រប៉ងសម្លាប់ខ្លួន ទោះបីប្រពន្ធនិងអ្នកជិតខាងខំឃាត់យ៉ាងណា ក៏មិនឈ្នះ។ ទីបំផុត បុរសនេះបានលោតចុះក្រោមទាល់តែបាន…
រាជធានីភ្នំពេញ ៖ បុរសចិត្តធំម្នាក់បានសន្លប់បាត់ស្មារតី បន្ទាប់ពីមានទំនាស់គ្នាបន្តិចបន្តួចជាមួយប្រពន្ធ ស្រាប់តែលោតពីលើជាន់ទី១(ផ្ទះជួល) ដែលមានកម្ពស់ប្រមាណ៤ទៅ៥ម៉ែត្រប៉ងសម្លាប់ខ្លួន ទោះបីប្រពន្ធនិងអ្នកជិតខាងខំឃាត់យ៉ាងណា ក៏មិនឈ្នះ។ ទីបំផុត បុរសនេះបានលោតចុះក្រោមទាល់តែបាន ប៉ុន្តែខណៈពេលលោតចុះមកភ្លាមមិនបានដួលដេកភ្លាមៗនោះទេ តែបន្តិចក្រោយមក ទើបចុកឆ្អល់ក៏ដួលសន្លប់ស្តូក ។
ប្រភពបានបន្តថា ពេលឃើញបែបនេះស្ត្រីជាប្រពន្ធខឹងខ្លាំងណាស់ បានចុះមកតាមយកដុំឥដ្ឋវាយគូទលោកប្ដី ដែលកំពុងដេកដួលនោះ ព្រោះស្មានថាប្ដីធ្វើពុតជាដួលលេងសើច ប៉ុន្តែពេលវាយនោះស្រាប់តែលោកប្ដីប្រែខ្លួនផ្ងារមកវិញ បណ្ដាលឱ្យដុំឥដ្ឋត្រូវចំប្រដាប់ភេទប្រកាច់រមួលខ្លួនសន្លប់ស្ដូកស្ដឹងលែងដឹងខ្លួនតែម្ដង ។
ហេតុការណ៍នេះកើតឡើងកាលពីវេលាម៉ោង១២និង៣០នាទីរសៀលថ្ងៃទី១៣ ខែឧសភា ឆ្នាំ២០១៨ នៅចំណុចផ្ទះជួលមួយកន្លែងដែលមានទីតាំងស្ថិតនៅក្នុងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា បុរសជាប្ដីឈ្មោះ ផាន់ ណា អាយុ២៣ឆ្នាំ ជាកម្មករសំណង់ ចំណែកស្ត្រីជាប្រពន្ធឈ្មោះ ហ៊ល សុឃីម ហៅឃីម អាយុ២៦ឆ្នាំ ជាកម្មការិនីរោងចក្រកាត់ដេរ ។ អ្នកទាំង២មានកូនម្នាក់ហើយស្ត្រីជាប្រពន្ធក៏ត្រូវបាននគរបាលឃាត់ខ្លួននាំទៅសាកសួរផងដែរ ។ប្រភពបានបន្តទៀតថា នៅមុនពេលកើតហេតុប្ដីប្រពន្ធមួយគូនេះបានផឹកសីុជុំគ្នាជាមួយអ្នកជិតខាងនិងសាច់ញាតិនៅក្នុងបន្ទប់ជួលរបស់ខ្លួន ។ ប៉ុន្តែបុរសជាប្ដីបានក្រោកមុននិងបានហៅប្រពន្ធឲ្យឈប់ផឹក តែប្រពន្ធមិនព្រមក្រោកចេញពីវង់ផឹកស៊ីឡើយ។ ដោយខឹងប្រពន្ធមិនព្រមឈប់ផឹក ទើបប្ដីមាត់ធំដាក់បង្កឲ្យមានរឿងទំនាស់គ្នាកើតឡើង ហើយប្ដីបានព្យាយាមលោតសម្លាប់ខ្លួនពីជាន់ទី១ ដែលជាហេតុបង្កការភ្ញាក់ផ្អើលដល់អ្នកផឹកស៊ីជាមួយ រួមនឹងប្រពន្ធចាប់ឃាត់ តែឃាត់មិនឈ្នះឡើយ ទីបំផុតបុរសនេះលោតចុះមកទាល់តែបាន ។
សាក្សីបាននិយាយទៀតថា ពេលបុរសនោះលោតចុះមកភ្លាមគាត់មិនបានដួលដេកនោះឡើយគឺបានធ្លាក់មកឈរធម្មតា ប៉ុន្តែបន្តិចក្រោយមកស្រាប់តែដួលដេកផ្អៀងខ្លួនទៅលើដី ពេលឃើញបែបនេះស្ត្រីជាប្រពន្ធខឹងខ្លាំងណាស់ក៏បានរត់ចុះពីជាន់ទី១តាមប្តីមកក្រោម ។ ខណៈនោះនាងស្មានថា ប្ដីធ្វើពុតជាដួលបែបលេងសើចក៏បានរើសយកដុំឥដ្ឋទៅវាយគូទប្ដី ដោយវាយលើកទី១ទី២អត់អីទេ។ លុះលើកទី៣ លោកប្ដីបានប្រែខ្លួនដេកផ្ងារស្រាប់តែដុំឥដ្ឋដែលនាងជាប្រពន្ធកំពុងយារវាយនោះត្រូវចំប្រដាប់ភេទប្ដីប្រកាច់សន្លប់ស្ដូកតែម្ដង ។
ដោយឡែក ប្រភពមួយទៀតបាននិយាយចោទប្រកាន់ស្ត្រីជាប្រពន្ធថា ខណៈពេលមានទំនាស់គ្នានោះនាងបានច្រានប្ដីទម្លាក់ពីលើផ្ទះ រួចបានយកដុំឥដ្ឋទៅវាយចំប្រដាប់ភេទប្តីថែមទៀត ទើបបណ្ដាលឲ្យប្ដីសន្លប់ស្ដូកតែម្ដងទៅ។ ប៉ុន្តែនាងជាប្រពន្ធបានបដិសេធថា នាងមិនបានច្រានប្ដីទេ គឺប្ដីលោតចុះមកដោយខ្លួនឯង ហើយនាងឃាត់មិនឈ្នះប្ដីព្យាយាមលោតទាល់តែបាន នាងខឹងខ្លាំងណាស់ស្មានតែប្ដីធ្វើពុតក៏រើសដុំឥដ្ឋវាយលេង តែជាអកុសលបែរជាត្រូវប្រដាប់ភេទបែបនេះ គ្មានចេតនាទេ ។ បន្ទាប់ពីសាកសួររួច សមត្ថកិច្ចបានដោះលែងស្ត្រីនោះឱ្យទៅមើលប្តីនៅឯមន្ទីរពេទ្យវិញ ៕
ចែករំលែកព័តមាននេះ