ខេត្តក្រចេះ ៖ ពលរដ្ឋនៅក្នុងភូមិស្រែនន ឃុំកន្ទួត ស្រុកចិត្របុរីប្រមាណជិត៤០គ្រួសារ និងមានអណ្តូតទឹកប្រើប្រាស់ចំនួន៧គ្រឿងនៅក្នុងភូមិ ដើម្បីបញ្ចៀសពីការប្រើប្រាស់ទឹកព្រែកទេរ ដែលអាជ្ញាធរបានរកឃើញថា ទឹកព្រែកនេះមានសារធាតុពុលពីថ្នាំបាញ់ស្មៅ និងថ្នាំបាញ់សម្លាប់ សត្វល្អិតដែលបានផ្ទុះបាតុភាពពុលសម្លាប់អ្នកភូមិយ៉ាងតិចជាង១០នាក់ឲ្យស្លាប់ ។
រដ្ឋមន្ត្រីក្រសួងមុខងារសាធារណៈលោកទេសរដ្ឋមន្ត្រីពេជ្រ ប៊ុនធិនបានអះអាងប្រាប់ ទៅអ្នកភូមិចំនួនជាង៤រយនាក់ថា អណ្តូងទឹកស្អាតចំនួន៧ និងត្រូវខួងដាក់ឱ្យបងប្អូនប្រើប្រាស់ ក្នុងពេលឆាប់ៗនេះ ។ ដោយក្នុងនោះមានអណ្តូងទឹក២ ជាអំណោយរបស់លោកអភិបាលខេត្តក្រចេះ ផ្ទាល់ និងអណ្តូងទឹកចំនួន៥ទៀត ជាអំណោយរបស់ថ្នាក់ដឹកនាំខេត្តក្រចេះ ។
ដោយមានការអញ្ជើញក្នុងពិធីចុះសួរសុខទុក្ខ សំណេះសំណាលជាមួយប្រជាពលរដ្ឋដែលភាគច្រើន សុទ្ធសឹងជាជនជាតិភាគតិចព្នងរស់នៅ ក្នុងភូមិស្រែនន ឃុំកន្ទួត ស្រុកចិត្របុរី នៅថ្ងៃទី១២ ខែឧសភា លោកទេសរដ្ឋមន្ត្រីពេជ្រ ប៊ុនធិនបានអំពាវនាវឲ្យពលរដ្ឋក្នុងភូមិដែលរងគ្រោះ និងរួចផុតពីការ ស្លាប់ ដោយសារពុលទឹក និងស្រាសត្រូវមានការប្រុងប្រយ័ត្នលើការទទួលទានចំណីអារហារប្រចាំថ្ងៃ ហាមមិនឲ្យទទួលទានស្រាស ក៏ដូចជា ទឹកព្រែកទេរ និងទឹកដែលមានប្រភពមិនច្បាស់នៅតំបន់នោះ ។ លោកទេសរដ្ឋមន្ត្រីបានបង្កើនការលើកទឹកចិត្តដល់ពលរដ្ឋក្នុងភូមិដែលកន្លងមកពួកគាត់មានភាព តុកស្លុតពីបាតុភាពពុលដែលបានសម្លាប់មនុស្សនៅក្នុងភូមិយ៉ាងរង្គាលនោះថា ស្ថានភាពពុល នេះ គឺត្រូវបានអាជ្ញាធរត្រួតត្រាស្ថានការណ៍បាន និងមិនឲ្យពលរដ្ឋមានការភ័យខ្លាចទៀតនោះទេ ។
បាតុភាពពុលមួយដែលអាជ្ញាធររកឃើញថា ផ្តើមចេញពីស្រាស និងពុលទឹកព្រែកទេរបានកើត មានយ៉ាងគំហុកក្នុងអឡុងរយៈពេល៤ថ្ងៃ ចាប់ពីថ្ងៃ៥ ដល់ថ្ងៃទី៨ ខែឧសភានេះ ក្នុងនោះបានបង្កឲ្យអ្នកភូមិរស់ក្នុងភូមិស្រែនន ឃុំកន្ទួត ស្រុកចិត្របុរី ដែលជាភូមិមួយសម្បូរទៅដោយបងប្អូនជនជាតិភាគតិចព្នងរស់នៅមានទីតាំងប្រប និងព្រែកទេ មានយ៉ាងតិច១៣នាក់ បានស្លាប់ក្នុងនោះមានស្រី៨នាក់ ក្រៅពីនោះមានចំនួនជិត៣រយនាក់ទៀតក៏ត្រូវរងគ្រោះ ។
ស្របពេលដែលស្ថានភាពពុលដ៏អាក្រក់នេះបានផ្ទុះឡើងយ៉ាងគំហុកបែបនេះបានបង្កឲ្យអ្នករស់នៅក្នុងភូមិមានភាពតក់ស្លុតជាខ្លាំង ដោយអ្នករងគ្រោះខ្លះបានទៅសម្រាកពេទ្យ និងខ្លះទៀតបានគេចខ្លួនជម្លៀសចេញពីភូមិនេះមួយរយៈពេល ។
ថ្លែងឲ្យដឹងនៅក្នុងការចុះសួរសុខទុក្ខនៅថ្ងៃនោះអភិបាលខេត្តក្រចេះលោក វ៉ា ថន បានមាន ប្រសាសន៍ឲ្យដឹងដែរថា សព្វថ្ងៃនេះស្ថានការរបស់អ្នកភូមិដែលរងការពុល គឺពួកគាត់មានសុខភាព ប្រក្រតី ក្រោយពីទទួលបានការជួយសង្គ្រោះរបស់អាជ្ញាធរក៏ដូចជាគ្រូពេទ្យ ។ ចំណែកឯអ្នកភូមិ ដែលបានជម្លៀសខ្លួនចេញពីភូមិក៏បានវិលចូលមករស់នៅក្នុងភូមិចាស់របស់ពួកគាត់តាមធម្មតា វិញ ក្រោយពីស្ថានភាពពុលបានធូរស្រាល ៕
ចែករំលែកព័តមាននេះ