ខេត្តបាត់ដំបង ៖ បិទវគ្គហ្វឹកហ្វឺនសិក្ខាកាមពលទាហានថ្មីបំពេញក្របខណ្ឌឲ្យយោធភូមិភាគទី១ ចំនួន៣៤៩នាក់ នៅសាលាពលទាហានយោធភូមិភាគទី៥ កាលពីវេលាព្រឹកថ្ងៃទី១២ ខែឧសភា ឆ្នាំ២០១៨ ស្ថិតភូមិបឹងជរាជ ឃុំឈើទាល ស្រុកបាណន់ ខេត្តបាត់ដំបង ។
ក្រោមអធិបតីភាពលោកនាយឧត្តមសេនីយ៍ ហ៊ីង ប៊ុនហៀង តំណាងលោកនាយឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ លោកឧត្តមសេនីយ៍ទោឯក សំអូន មេបញ្ជាការស្តីទីយោធភូមិភាគទី៥ ព្រមទាំងមានការចូលរួមពីលោកអភិបាលរងខេត្ត ស្នងការរង អាវុធហត្ថ គ្រប់៤ខេត្ត មានខេត្តពោធិសាត់ បាត់ដំបង ប៉ៃលិន និងបន្ទាយមានជ័យ មេបញ្ជាការគ្រប់កងពល ប្រធានការិយាល័យទំនាក់ទំនងព្រំដែន មន្ត្រីស៊ីម៉ាក់ នាយទាហានមន្ទីរពេទ្យយោធភូមិភាគទី៥ សរុបទាំងអស់ចំនួន៧៤២នាក់ ។
លោកឧត្តមសេនីយ៍ទោ ឯក សំអូន មេបញ្ជាការស្តីទីយោធភូមិភាគទី៥ បានមានមតិស្វាគមន៍ និងបញ្ជាក់អំពីសភាពការណ៍រួមនៅតំបន់នេះជាង២ទស្សវត្តន៍មកហើយ ពេលនេះ គឺយើងទទួលបានសុខសន្តិភាពពង្រឹងពង្រីកក្នុងជួរអង្គភាពកងទ័ពមានជីវភាព និងការរស់នៅមានភាពល្អប្រសើរ សំខាន់ពេលនេះប្រាក់បៀវត្សបានលើកជារៀងរាល់ឆ្នាំ ដែលអាចឲ្យកងទ័ពយើងមានជីវភាពល្អប្រសើរ ហើយពេលនេះ គឺជាកម្លាំងទ័ពថ្មីបានស្ម័គ្រចិត្តតាមតម្រូវការទទួលហ្វឹកហាត់បានគ្រប់គ្រាន់ ដើម្បីបង្គ្រប់ក្របខណ្ឌដល់តម្រូវការរបស់យោធភូមិភាគទី១តាមតម្រូវការ ។
បន្តមកលោកឧត្តមសេនីយ៍ត្រី សោម សុន នាយកសាលាពលទាហានយោធភូមិភាគទី៥ បានរាយការណ៍អំពីការហ្វឹកហាត់ពលទាហានថ្មីចំនួន៣៤៩នាក់នេះប្រើរយៈពេល១៤០ថ្ងៃ ហ្វឹកហាត់រៀនសូត្រគ្រប់មុខជំនាញរបស់កងទ័ព ដែលត្រូវបានបញ្ចប់ថ្ងៃទី១០ ខែឧសភា ឆ្នាំ២០១៨នេះ និងត្រូវបញ្ជូនទៅយោធភូមិភាគទី១ ក្នុងខេត្តស្ទឹងត្រែង ដើម្បីបំពេញកាតព្វកិច្ចការងារការពារជាតិនៅតំបន់នោះ ហើយទទួលបានការឧបត្ថម្ភការហ្វឹកហាត់នេះ ពីសម្តេចតេជោហ៊ុន សែន នាយករដ្ឋមន្ត្រី និងក្រសួងការពារជាតិបានជួយកន្លងមក ។ បន្ទាប់មកលោកនាយឧត្តមសេនីយ៍ហ៊ីង ប៊ុនហៀង បានផ្តាំផ្ញើឲ្យកងកម្លាំងថ្មីនេះ គឺទុកចិត្តបានបន្ទាប់ពីបានឃើញរបៀបការសម្តែងលទ្ធផលនៃការហ្វឹកហាត់ គឺមានបទវិន័យត្រឹមត្រូវ ហើយសូមកងទ័ពទាំងអស់ត្រូវគោរពអនុវត្តន៍ឲ្យបានតាមសៀវភៅរបស់កងទ័ព រក្សាចំណងសាមគ្គីភាពរវាងគ្នា និងគ្នា ត្រូវចេះគោរពស្រឡាញ់ជួយដល់ប្រជាជនដែលយើងកំពុងរស់នៅជាមួយគាត់ ។
សំខាន់កុំជឿពាក្យឃោសនារបស់ជនអគតិដែលបានបំផុសបំផុលឲ្យប្រទេសយើងធ្លាក់ក្នុងភាពអន្តរាយ ដែលដាច់ខាតទប់ស្កាត់មិនឲ្យមានបដិវត្តន៍ពណ៌កើតមាននៅក្នុងប្រទេសកម្ពុជាយើងបានឡើយ ហើយកុំភ្លេចយើងត្រូវនាំគ្នាទៅចូលរួមបោះឆ្នោតគាំទ្រសម្តេចតេជោហ៊ុន សែនបន្តការដឹកនាំប្រទេសយើងបន្តទៅទៀត ក្នុងអណត្តិទី៦នេះ ព្រោះយើងកំពុងតែមានសុខសន្តិភាពពិតប្រាកដ និងការអភិវឌ្ឍកំពុងតែដំណើរការឥតឈប់ឈរឡើយ ។
ចុងក្រោយលោកនាយឧត្តមសេនីយ៍បានជួយសាងសង់អាគារស្នាក់នៅរបស់កងទ័ពក្នុងសាលាពលទាហាននេះ១ខ្នង របស់សម្តេចតេជោ តាមរយៈលោកឧកញ៉ាលី យូគៀត និងឧបត្ថម្ភកុំព្យូទ័រ៥គ្រឿង ព្រីនធ័រ៥គ្រឿង អង្ករ៥តោន មី២០កេសធំ ទឹកសុទ្ធ២០កេស ស្រាបៀរ២០កេស ថវិកា២០លានរៀល ដល់សាលាពលទាហាន លោកគ្រូយោធាចារ្យ២៩នាក់ ក្នុងម្នាក់ទទួលបាន២០ម៉ឺនរៀល សិក្ខាកាមទាហានថ្មី និងពលទាហានក្នុងសាលាចំណុះយោធភូមិភាគទី៥ ចំនួន៧៤២នាក់ ក្នុងម្នាក់ៗទទួលបាន៥ម៉ឺនរៀល គ្រប់តាមបណ្តាអង្គភាពមកចូលរួមក្នុង១អង្គភាពទទួលបាន១លានរៀលផងដែរ ៕
ចែករំលែកព័តមាននេះ