រាជធានីភ្នំពេញ ៖ ស្របពេលវិស័យអចលនទ្រព្យ និងសំណង់របស់កម្ពុជាកំពុងរីកចម្រើន ធនាគារពិភពលោក (WB) បានបង្ហាញពីហានិភ័យដែលអាចកើតឡើងពីភាពងាយរងគ្រោះនៅក្នុងកំណើនវិស័យអចលនទ្រព្យ និងសំណង់ ។ យោងតាមរបាយការណ៍របស់ធនាគារពិភពលោក…
រាជធានីភ្នំពេញ ៖ ស្របពេលវិស័យអចលនទ្រព្យ និងសំណង់របស់កម្ពុជាកំពុងរីកចម្រើន ធនាគារពិភពលោក (WB) បានបង្ហាញពីហានិភ័យដែលអាចកើតឡើងពីភាពងាយរងគ្រោះនៅក្នុងកំណើនវិស័យអចលនទ្រព្យ និងសំណង់ ។
យោងតាមរបាយការណ៍របស់ធនាគារពិភពលោក ដែលចេញផ្សាយកាលពីថ្ងៃទី១០ ឧសភា បានបង្ហាញថា កម្ពុជាមានហានិភ័យអាចនឹងកើតមានឡើងដោយពំនូនគរនៃភាពងាយរងគ្រោះ ដែលមានជាយូរមកហើយនៅក្នុងកំណើននៃវិស័យអចលនទ្រព្យ និងសំណង់ ដែលទាមទារធ្វើការតាមឃ្លាំមើលឱ្យបានដិតដល់ទៅលើដំណើរស្ទុះឡើងនៅក្នុងវិស័យសំណង់និងអចលនទ្រព្យ និងការរៀបចំឱ្យមានគោលនយោបាយប្រុងប្រយ័ត្នក្នុងទិដ្ឋភាពម៉ាក្រូ គឺជាការចាំបាច់ ដើម្បីកាត់បន្ថយវិសាលភាពរបស់សកម្មភាពរកស៊ីកេងចំណេញនៅក្នុងវិស័យទាំងនេះ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting ក៏បានយល់ស្របនឹងរបាយការណ៍នេះផងដែរ ដោយលោកបានលើកឡើងកាលពីថ្ងៃទី១១ ឧសភា ម្សិលមិញថា ជាក់ស្តែង គឺដូចទៅនឹងការលើកឡើងរបស់ធនាគារពិភពលោក ។
លោកមានប្រសាសន៍ថា ៖« បើយើងគណនាកំណើនសេដ្ឋកិច្ច ប្រៀបធៀបនឹងកំណើនទំហំនៃការវិនិយោគក្នុងវិស័យអចលនទ្រព្យ និងសំណង់នាប៉ុន្មានឆ្នាំចុងក្រោយនេះ បានចូលរួមនៅក្នុងកំណើនសេដ្ឋកិច្ចខ្លាំង » ។
លោកបន្ដថា ធម្មតា តម្រូវការនៅតាមវិស័យអចលនទ្រព្យ វាមិនមែនចេះតែកើនធំរហូតនោះទេ វាមានដំណាក់កាលរបស់វា ហើយទៅតាមតម្រូវការជាក់ស្តែងផងដែរ ។ អីចឹង ការព្រមាន ក៏ដូចជាផ្តល់សញ្ញា ដើម្បីរាជរដ្ឋាភិបាលយកចិត្តទុកដាក់ហ្នឹង ជារឿងត្រឹមត្រូវ ។
លោកបន្តថា ៖« ការផ្តល់អនុសាសន៍តាមដានត្រួតពិនិត្យដោយលក្ខណៈប្រុងប្រយ័ត្នរបស់ធនាគារពិភពលោក វាជារឿងល្អបំផុត ព្រោះកាលណាយើងឃើញសញ្ញាហានិភ័យដែលអាចកើតមានឡើងអីចឹង វាត្រូវមាននិយ័តកម្មដើម្បីទប់ » ។
លោកបានលើកឡើងថា ៖« បើវិស័យអចលនទ្រព្យ និងសំណង់ជួបបញ្ហា វាធ្វើឱ្យប៉ះពាល់ដល់សហគ្រាសធុនតូច និងមធ្យម, កម្លាំងពលកម្មនៅក្នុងវិស័យ និងអាចប៉ះពាល់ដល់វិស័យហិរញ្ញវត្ថុ ព្រោះម្ចាស់គម្រោងនីមួយៗ ភាគច្រើនគាត់តែងតែទទួលបានហិរញ្ញប្បទានពីធនាគារ ឬពីប្រភពផ្សេងៗយកមកអភិវឌ្ឍន៍គម្រោង ។ អីចឹង បើមានបញ្ហាទៅ គាត់មានលទ្ធភាពរកលុយមកពីណាបង់ទៅធនាគារវិញ។ ខ្ញុំគិតថា អ្វីដែលជាអនុសាសន៍នេះ វាត្រឹមត្រូវណាស់ ហើយខ្ញុំគិតថា ប្រហែលរាជរដ្ឋាភិបាល បាននិងកំពុងពិនិត្យពិច័យលើបញ្ហានេះដែរ និងគួរចាត់វិធានការត្រួតពិនិត្យវិស័យហ្នឹងឱ្យបានល្អិតល្អន់ » ។
បើយោងតាមរបាយការណ៍ប្រចាំឆ្នាំ២០១៧របស់ក្រសួងរៀបចំដែនដី នគរូបនីយកម្ម និងសំណង់ គូសបញ្ជាក់ថា ទិន្នន័យសំណង់ទូទាំងប្រទេស មានចំនួនសរុប៣.០៥២គម្រោង ដែលមានតម្លៃប៉ាន់ស្មានទុនវិនិយោគប្រមាណជាង៦ពាន់លានដុល្លារ បើប្រៀបធៀបនឹងរយៈពេលដូចគ្នាឆ្នាំ២០១៦ មាន២.៤០៥គម្រោង គិតជាផ្ទៃក្រឡាសាងសង់មានជាង១១លានម៉ែត្រការ៉េ មានទុនវិនិយោគជាង៥ពាន់លានដុល្លារ ពោលគឺកើនឡើង២២,៣១% ។
ជាមួយគ្នានេះដែរ បើតាមរបាយការណ៍ស្ដីពី ស្ថិរភាពម៉ាក្រូសេដ្ឋកិច្ចកម្ពុជា បានបង្ហាញការព្យាករថា វិស័យសំណង់នឹងមានអត្រាកំណើនប្រមាណ១៦,៧%ក្នុងឆ្នាំ២០១៨ និង១៦,៩%ក្នុងឆ្នាំ២០១៩ ដែលឆ្លុះបញ្ចាំងតាមរយៈការបន្តងាកទៅរកប្រភេទគម្រោងសំណង់ថ្លៃទាប និងមធ្យម ដែលជួយប៉ះប៉ូវដល់កំណើនយឺតនៃប្រភេទសំណង់ថ្លៃខ្ពស់។ ចំណែកវិស័យអចលនទ្រព្យត្រូវបានរំពឹងថា នឹងនៅតែមានកំណើនរឹងមាំក្នុងរង្វង់៨,៥%ក្នុងឆ្នាំ២០១៨ និងឆ្នាំ២០១៩ ដែលមាននិន្នាការស្របគ្នានឹងវិស័យសំណង់ដែរ ៕
ចែករំលែកព័តមាននេះ