ឥណ្ឌូនេស៊ី ៖ សមត្ថកិច្ចប៉ូលិសបាននិយាយថា សង្ស័យមនុស្សបំផ្ទុះគ្រាប់បែកអត្តឃាតបានវាយប្រហារព្រះវិហារចំនួន៣នៅប្រទេសឥណ្ឌូនេស៊ី កាលពីព្រឹកថ្ងៃអាទិត្យ ខែឧសភានេះ ដោយបានសម្លាប់មនុស្សយ៉ាងតិច១០នាក់ និងរងរបួសច្រើនជាងនេះ ។ នេះបើយោងតាមការផ្សាររបស់CNN ។
អ្នកនាំពាក្យប៉ូលិសកោះជ្វាខាងកើតលោក Frans Barung Mangera បាននិយាយថា មនុស្ស ៤៧នាក់ រួមទាំងមន្ត្រីប៉ូលិស២នាក់ កំពុងស្ថិតនៅក្នុងមន្ទីរពេទ្យកំពុងទទួលការព្យាបាលរបួស បន្ទាប់ពីការវាយប្រហារនៅទីក្រុង Surabaya ទីក្រុងកំពង់ផែមួយ នៅឆ្នេរសមុទ្រកោះជ្វាខាងកើត ។ ប្រភពព័ត៌មានដដែលបានបញ្ជាក់ថា ការបំផ្ទុះគ្រាប់បែកទាំងនេះបានសំដៅទៅលើវិហារកាតូលិកសាន់ម៉ារីយ៉ាវិហារកាតូលិកឥណ្ឌូណេស៊ី និងព្រះវិហារ Pentecost Central Church ។
អ្នកនាំពាក្យបាននិយាយថា ការផ្ទុះនៅផ្លូវម៉ារីយ៉ាបានសម្លាប់មនុស្ស ៤ នាក់ និងមនុស្ស ២នាក់ទៀត ត្រូវបានសម្លាប់នៅព្រះវិហារពីរផ្សេងទៀត ។ មនុស្សពីរនាក់ ក្រោយមកបានស្លាប់នៅឯមន្ទីរពេទ្យមួយ ។ ផ្លូវម៉ារីយ៉ាជាកន្លែងផ្ទុះដំបូងដែលបានកើតឡើងនៅវេលាម៉ោង៧និង៣០នាទីព្រឹក ក្នុងស្រុកនៅថ្ងៃអាទិត្យ និងការផ្ទុះបន្ទាប់នៅនៅវេលាម៉ោង៧និង៣៥នាទីព្រឹក និងការបំផ្ទុះអត្តឃាតលើកទី៣នៅម៉ោង៨ព្រឹកថ្ងៃដដែល ។
សមត្ថកិច្ចបញ្ជាក់ថា «យើងសង្ស័យថា វាជាការប៉ុនប៉ងបំផ្ទុះគ្រាប់បែកអត្តឃាត ។ យើងបានកំណត់អត្តសញ្ញាណជនរងគ្រោះម្នាក់» ៕
ចែករំលែកព័តមាននេះ