នាំអំណោយទៅចែកគ្រួសាររងគ្រោះដោយខ្យល់កន្ត្រាក់នាពេលកន្លងទៅ

ថ្ងៃទី ១៣ ខែ ឧសភា ឆ្នាំ ២០១៨

ម៉ោង ១០:៥៨

ខេត្តស្វាយរៀង ៖ ឯកឧត្តមម៉ែន វិបុល ប្រធានគណៈកម្មាធិការសាខាកាកបាទក្រហមខេត្តស្វាយរៀងបាន ដឹកនាំក្រុមការងារនាំយកអំណោយមនុស្សធម៌របស់សាខាកាកបាទក្រហមកម្ពុជាទៅចែកជូនគ្រួសារដែល រងគ្រោះដោយសារខ្យល់កន្ត្រាក់ បណ្តាលឲ្យរលំផ្ទះទាំងស្រុង៨ខ្នង និងប៉ះពាល់មួយផ្នែក៤ខ្នងសរុប១២ខ្នង នៅស្រុករំដួលដែលមកពីឃុំជ្រុងពរពេល៧គ្រួសារ ឃុំសង្កែ៣គ្រួសារ និងឃុំស្វាយចេក២គ្រួសារ ។
ការនាំអំណោយទៅចែកជូននេះដែរបានធ្វើឡើងនៅថ្ងៃទី១២ ខែឧសភា ឆ្នាំ ២០១៨ ។

ក្នុងឱកាសនោះលោកម៉ែន វិបុលប្រធានគណៈកម្មាធិការសាខាបានពាំនាំប្រសាសន៍របស់សម្តេចកិត្តិព្រឹទ្ធ បណ្ឌិតប៊ុន រ៉ានី ហ៊ុន សែនប្រធានកាកបាទក្រហមកម្ពុជាដែលផ្តាំផ្ញើសួរសុខទុក្ខក្តីអាណិតអាសូរ និងការសោកស្តាយចំពោះឧបទ្ទវហេតុដែលបានបំផ្លាញលំនៅដ្ឋាន និងទ្រព្យសម្បត្តិរបស់បងប្អូនដែលបង្កដោយ គ្រោះធម្មជាតិនាពេលនេះ ។

នាឱកាសនោះដែរលោកជំទាវដួង វណ្ណា អនុប្រធានកិត្តិយសសាខាក៏បានបន្តនាំយកអំណោយមនុស្សធម៌ ចែកជូនគ្រួសាររងគ្រោះ ដោយសារខ្យល់កន្ត្រាក់ បណ្តាលឲ្យរលំផ្ទះទាំងស្រុង៩ខ្នង និងប៉ះពាល់មួយផ្នែក ៨ ខ្នង សរុប១៧ខ្នង នៅស្រុកចន្ទ្រាដែរមកពីឃុំចន្ទ្រា១៤គ្រួសារ ឃុំទួលស្តី៣គ្រួសារ ។

គួរបញ្ជាក់ផងដែរថា អំណោយដែលបានចែកជូនដល់គ្រួសាររងគ្រោះទាំងស្រុង១៧គ្រួសារ ក្នុង១គ្រួសារ ទទួលបានអង្ករ៣០គីឡូក្រាម កៅស៊ូតង់១ធុង ទឹកជ័រ១ ឆ្នាំងបាយសម្ល២ កន្ទេលបត់១ មី១កេស ទឹកស៊ីអ៊ីវ១ យួ ត្រីខ១០កំប៉ុង ឃីត១កញ្ចប់ មានមុង១ ភួយ១ ក្រម៉ា១ សារុង១ និងថវិកា២០០,០០០រៀល ។ គ្រួសារប៉ះពាល់មួយផ្នែក១២គ្រួសារ ក្នុង១គ្រួសារទទួលបានអង្ករ៣០គីឡូក្រាម កន្ទេលបត់១ មី១កេស ទឹកស៊ីអ៊ីវ១យួរ ត្រីខ១០កំប៉ុង ឃីត១កញ្ចប់ មានមុង១ ភួយ១ មុង១ ក្រម៉ា១ សារុង១ និងថវិកា៥០,០០០ រៀល ។

ឧបត្ថម្ភដល់ទារកអាយុ៣ខែ ២នាក់ ក្នុងម្នាក់ថវិកា១០០,០០០រៀល ឧបត្ថម្ភថវិកា៥០០,០០០ រៀល ដល់ លោកយាយ ម៉ា សឿង អាយុ៨៣ ដែលរងរបួសសម្រាប់ព្យាបាលជំងឺ ៕