ម៉ាដូណា និងអ៊ឹម ជីវ៉ា បង្ហាញគំនិតស្របគ្នារឿងមិនទទួលសម្តែងសង្ក្រាន្តចូលឆ្នាំ ដោយទទួលត្រឹមប័ណ្ណសរសើរ
- ភ្នំពេញ
រាជធានីភ្នំពេញ ៖ តារាសម្តែង និងចម្រៀងពីរដួង គឺលោក ម៉ា ដូណា និងលោក អ៊ឹម ជីវ៉ា…
រាជធានីភ្នំពេញ ៖ តារាសម្តែង និងចម្រៀងពីរដួង គឺលោក ម៉ា ដូណា និងលោក អ៊ឹម ជីវ៉ា បានបង្ហាញគំនិតស្របគ្នា ដោយមិនទទួលការអញ្ជើញទៅសម្តែងក្នុងសង្ក្រាន្តចូលឆ្នាំថ្មី ដោយទទួលបានត្រឹមប័ណ្ណសរសើរនោះឡើយ ខណៈពេលដែលអ្នកទាំងពីរធ្លាប់បានជួយកម្មវិធីមួយនេះ អស់រយៈពេលជាច្រើនឆ្នាំ ដោយមិនទទួលបានថវិកាសូម្បីមួយរៀល ។
តារាភេទទីបី លោក ម៉ា ដូណា បានដាច់ចិត្តប្រកាសជាសាធារណៈជាមួយការប្រកាន់ជំហរខាងលើនេះ ដោយមិនខ្លាចមានការខឹងសម្បារពីអ្នករៀបចំកម្មវិធីនានានោះឡើយ ត្បិតលោកយល់ថា លោកបានជួយរឿងនេះអស់ជាច្រើនឆ្នាំក្នុងពេលដែលលោកត្រូវការថវិកាខ្លះពីកម្មវិធីនេះវិញម្តង ។
តាមរយៈសំណេរបង្ហោះលើបណ្តាញសង្គមលោក ម៉ា ដូណា បានលើកឡើងថា អ្នកហៅទៅជួយសង្ក្រាន្តចូលឆ្នាំ អនុគ្រោះផង សុំនិយាយត្រង់ កុំអន់ចិត្ត ខ្ញុំលែងចង់បានប័ណ្ណសរសើរហើយជាច្រើនឆ្នាំនេះ ខ្ញុំជួយច្រើនណាស់ អីឡូវចង់បានលុយវិញ កុំខឹងដែលសរសេរត្រង់បែបនេះ ។
លោកបញ្ជាក់ថា ជួយ១០ដង ខ្វះតែម្តងដឹងតែអាក្រក់ហើយ សម័យនេះហើយ ខ្ជិលគិតណាស់ សំខាន់ហៅគឺសុំលុយសិនហើយ ។ ដោយឡែក ក្រោយឃើញការបង្ហោះខាងលើពី ម៉ា ដូណា នាពេលនេះលោក អ៊ឹម ជីវ៉ា ក៏បានចូលទៅខំមិនពីក្រោម ដោយបានយល់ស្រប និងគាំទ្រចំពោះការលើកឡើងខាងលើនេះ ក្នុងពេលដែលលោកក៏ធ្លាប់កើតរឿងនេះ និងមិនដែលបានប្រាក់មួយរៀលពីកម្មវិធីសង្គមនានា ។
លោក អ៊ឹម ជីវ៉ា បានបញ្ជាក់ថា គាំទ្រម៉ាដូណា មិនមែនកាន់ជើងម៉ាដូណាទេ តែធាតុពិតចឹងមែន ដូចខ្ញុំចឹងខំជួយគេស្ទើរគ្រប់កម្មវិធីក្នុងសង្គម មិនដែលបានលុយ១រៀល ទៅជួយគេនៅពេទ្យ ពេលឈឺ ពេលមានទុក្ខ ពេលគេស្លា.ប់ ដល់ពេលខ្ញុំមានទុក្ខ មានបងប្អូនបង្កើតស្លា.ប់ កុំថា ឡើយទៅបុណ្យ ឬចូលបុណ្យ គ្រាន់តែឆាតចូលរូមរំលែកទុក្ខគ្មានផង ! ។
លោកថា ឥឡូវឃើញខ្ញុំមិនសូវជួយអ្នកណា ឬទៅកម្មវិធីច្រើនដោយសារខ្ញុំ គឺចាប់ផ្តើមរាប់អានមើលមនុស្ស ហើយកុំថា ខ្ញុំបក្សពួក គឺអត់ទេ ព្រោះមកពីមនុស្សនៅជុំវិញខ្លួនជាអ្នកបង្រៀនខ្ញុំ តែជឿថា អំពើល្អមិនសាបសូន្យ ។
ជាការកត់សម្គាល់សម្រាប់ការលើកឡើងពីលោក ម៉ា ដូណា នាពេលនេះ មិនមែនមានតែលោក អ៊ឹម ជីវ៉ា ម្នាក់ប៉ុណ្ណោះទេ ពោលគេឃើញមានអ្នកសិល្បៈមួយចំនួនទៀតក៏បានធ្វើការចែកចាយសំណេរមួយនេះជាមួយនឹងការគាំទ្រផងដែរ ៕
ចែករំលែកព័តមាននេះ