រាជធានីភ្នំពេញ ៖ ព្រះនាង ជេនណា បានបង្ហាញក្តីរំភើបខ្លាំង និងចាត់ទុកជាអនុស្សាវរិយ៍ដ៏ល្អក្នុងប្រវត្តិសាស្ត្រនៃឆាកជីវិតរបស់ព្រះនាង បន្ទាប់ពីព្រះនាងត្រូវបានព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា…
រាជធានីភ្នំពេញ ៖ ព្រះនាង ជេនណា បានបង្ហាញក្តីរំភើបខ្លាំង និងចាត់ទុកជាអនុស្សាវរិយ៍ដ៏ល្អក្នុងប្រវត្តិសាស្ត្រនៃឆាកជីវិតរបស់ព្រះនាង បន្ទាប់ពីព្រះនាងត្រូវបានព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និង សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុតសព្វព្រះរាជហឬទ័យប្រោសព្រះរាជទានត្រាស់បង្គាប់ផ្តល់តួនាទីដល់រូបព្រះនាង ជាអ្នកជូនភួងមាលា ដល់ ឯកឧត្តម ស៊ី ជីងពីង ប្រធានាធិបតីសាធារណៈរដ្ឋប្រជាមានិតចិនដោយផ្ទាល់នៅអាកាសយានដ្ឋានអន្តរជាតិភ្នំពេញ ក្នុងដំណើរទស្សនកិច្ចនៅកម្ពុជា ។
ប្រធានាធិបតីចិនលោក ស៊ី ជីងពីង បានបំពេញទស្សនកិច្ចនៅកម្ពុជារយះពេល២ថ្ងៃគឺថ្ងៃទី១៧-១៨ ខែមេសា ឆ្នាំ២០២៥ ដោយក្នុងឱកាសអញ្ជើញដល់ព្រលានយន្តហោះអន្តរជាតិភ្នំពេញនោះគឺមានការផ្តល់កិត្តិយសដ៏ខ្ពង់ខ្ពស់បំផុតពីព្រះមហាក្សត្រ និងសម្តេចតេជោ ប្រធានព្រឹទ្ធសភា បានអញ្ជើញទទួលបដិសណ្ឋាកិច្ច ដោយនៅក្នុងនោះ ព្រះនាង ជេនណា ក៏ត្រូវបានផ្តល់កិត្តិយសជាអ្នកជូនភួងមាលា ដល់ ឯកឧត្តម ស៊ី ជីងពីង ដោយផ្ទាល់ផងដែរ ។
ក្រោយមានឱកាសដ៏ពិសេសនេះ ព្រះនាង ជេនណា បានបង្ហាញអារម្មណ៍រំភើបរកអ្វីប្រៀបផ្ទឹមបាន និងចាត់ទុកនេះជាប្រវត្តិសាស្ត្រមួយក្នុងឆាកជីវិតរបស់ព្រះនាង ដែលត្រូវបានព្រះមហាក្សត្រផ្តល់តួនាទីដ៏មានសារៈសំខាន់ និងមានអត្ថន័យមួយនេះ ។
តាមរយៈបណ្តាញសង្គម ព្រះនាង នរោត្តម ជេនណា បានបង្ហោះសំណេរថា អនុស្សាវរីយ៍ជាប្រវត្តិសាស្ត្រក្នុងឆាកជីវិតខ្ញុំ រំភើបរកអ្វីប្រៀបផ្ទឹមពុំបាន! ។
ជាបឋម ខ្ញុំម្ចាស់ សូមព្រះបរមរាជានុញ្ញាតក្រាបអរព្រះរាជគុណព្រះករុណា ហ្លួងតា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងហ្លួងយាយទួត សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុត ដែលស្ដេចទាំងទ្វេសព្វព្រះរាជហឬទ័យប្រោសព្រះរាជទានត្រាស់បង្គាប់ផ្តល់តួនាទីដល់ខ្ញុំម្ចាស់ ជាអ្នកជូនភួងមាលា ដល់ ឯកឧត្តម ស៊ី ជីងពីង ប្រធានាធិបតីសាធារណៈរដ្ឋប្រជាមានិតចិន នៅអាកាសយានដ្ឋានអន្តរជាតិភ្នំពេញ កាលពីព្រឹកថ្ងៃទី១៧ ខែមេសា ឆ្នាំ២០២៥ ។
ព្រះនាងបញ្ជាក់ថា នេះជារឿងរ៉ាវដ៏ពិសេសបំផុតក្នុងឆាកជីវិតពោពេញដោយសេចក្ដីរំភើបយ៉ាងខ្លាំងរកទីបំផុតគ្មាន ដែលអាចរាប់ថាជាអនុស្សាវរីយ៍ប្រវត្តិសាស្ត្រដ៏ល្អប្រចាំជីវិតខ្ញុំម្ចាស់។
ខ្ញុំម្ចាស់ជាចៅសូមក្រាបបង្គំថ្វាយព្រះពរ ព្រះករុណាហ្លួងតា និងហ្លួងយាយទួត សូមទេវតាថែរក្សាព្រះមហាស្វេត្រឆ័ត្រ ព្រះបារមីវត្ថុសក្តិសិទ្ធិនានាក្នុងលោក ព្រមទាំងទេវតារក្សាឆ្នាំថ្មី ប្រទានព្រះពរជ័យសព្វសាធុការ ថ្វាយព្រះអង្គទាំងទ្វេ សូមស្តេចប្រកបដោយព្រះបរមសុខគ្រប់ប្រការ មានព្រះរាជសុខភាពល្អ គង់ប្រថាប់ជាម្លប់ដ៏ត្រជាក់នៃប្រជារាស្ត្រទូទាំងព្រះនគរ ។
ខ្ញុំក៏សូមគោរពជូនពរ ឯកឧត្តមប្រធានាធិបតី មានសេចក្តីរីករាយក្នុងដំណើរទស្សនកិច្ចមកកម្ពុជា ចងចាំក្តីស្រឡាញ់រវាងជាតិសាសន៍ទាំងពីរ ៕
ចែករំលែកព័តមាននេះ