រាជធានីភ្នំពេញ ៖ អតីតតារាកំប្លែងជើងចាស់ នាយ សង់ ស៊ីស ត្រូវបានកូនចៅរបស់លោកធ្វើបុណ្យចម្រើនព្រះជន្មគម្រប់៧៧ឆ្នាំ កាលពីថ្ងៃទី៨ ខែមេសា ឆ្នាំ២០២៦…
រាជធានីភ្នំពេញ ៖ អតីតតារាកំប្លែងជើងចាស់ នាយ សង់ ស៊ីស ត្រូវបានកូនចៅរបស់លោកធ្វើបុណ្យចម្រើនព្រះជន្មគម្រប់៧៧ឆ្នាំ កាលពីថ្ងៃទី៨ ខែមេសា ឆ្នាំ២០២៦ ខណៈពេលដែលពិធីនេះ ក៏មានការអញ្ជើញចូលរួមពីអ្នកសិល្បៈចាស់ថ្មីជាច្រើនរូបផងដែរ ។
ក្នុងពេលដែលមានការជួបជុំអ្នកសិល្បៈ ជាពិសេស តារាកំប្លែងជើងចាស់រួមជំនាន់នោះ នាយសង់ ស៊ីស បានសម្តែងក្តីសប្បាយរីករាយ និងរំភើបរហូតហូរទឹកភ្នែក ដ្បិតលោកនៅតែស្រលាញ់សិល្បៈ និងមិត្តភក្តិសិល្បៈដដែល បើទោះបីជាបច្ចុប្បន្នលោកមានវ័យកាន់តែចាស់ និងមិនអាចសម្តែងកើតទៀតក៏ដោយ ។
បើតាមការឲ្យដឹងពីតារាកំប្លែងអ្នក ស្រីលាភ ដែលបានចូលរួមពិធីនេះដែរ បានលើកឡើងថា បុណ្យចម្រើនព្រះជន្ម តារាកប្លែងលោកឪស៊ីស គាត់មានជន្មាយុ៧៧ឆ្នាំហើយ គាត់
សម្តែងលែងកើតហើយ ប៉ុន្តែគាត់នៅតែស្រលាញ់សិល្បៈ ហើយគាត់នឹករលឹកអ្នកកប្លែងចាស់ៗដែលធ្លាប់សម្តែងរួមគ្នាដែលមានអនុស្សាវរីយ៍ជាច្រើនដែលមិនអាចបំភ្លេចបាន គាត់ចង់ជួបជុំសិល្បៈសូមជូនពរឪស៊ីស អោយមានសុខភាពល្អ អាយុវែង ជាម្លប់ដល់កូនចៅ ។
ជាការកត់សម្គាល់ នៅក្នុងពិធីបុណ្យចម្រើនព្រះជន្មាយុនាយសង់ស៊ីស នាពេលនេះ គេបានឃើញវត្តមានចូលរួមពីអ្នកសិល្បៈជាច្រើន ក្នុងនោះ មានតារាកំប្លែងនាយកុយ នាយក្រឹម នាយ ចាប ចៀន យាយយ៉យ និងលោកណយ វណ្ណេត ជាដើម ។ល។
ក្នុងជំនួបនោះ តារាកំប្លែងរួមជំនាន់ នាយ កុយ និងនាយ ក្រឹម បានសម្តែងក្តីនឹករលឹកគ្នាទៅវិញទៅមក និងជូនពរទៅកាន់នាយសង់ស៊ីស ឲ្យមានសុខភាព ក្នុងពេលដែលនាយ សង់ស៊ីស ក៏បានសម្រក់ទឹកភ្នែកនៅពេលបានជួបដៃគូចាស់ គឺយាយយ៉យ ។
ក្នុងនាមធ្លាប់ជាតារាកំប្លែងមួយរូប នាយ សង់ ស៊ីស ពិតជារំភើបក្រៃលែង នៅពេលបានជួបដៃគូចាស់ៗនៅពេលខ្លួនចាស់ជរា ហើយកូនៗបានធ្វើបុណ្យចង់ជួបសិល្បករជើងចាស់ធ្លាប់សម្តែងជាមួយគ្នា បើទោះបីជាពេលនេះ លោកមានវ័យចាស់ជរា និងមានជំងឺមិនអាចនិយាយបានច្បាស់ក៏ដោយ ។
គួរបញ្ជាក់ថា តារាកំប្លែងនាយ សង់ស៊ីស ដែលមានឈ្មោះពិតថា ម៉ារីសុន ហើយជាតារាកំប្លែងដ៏មានប្រជាប្រិយភាពមួយរូបប្រចាំប្រទេសកម្ពុជា បើទោះបីជាបច្ចុប្បន្នលោកបានឃ្លាតឆ្ងាយពីសិល្បៈដោយសារវ័យជរា និងមានជំងឺក៏ដោយ ប៉ុន្តែស្នាដៃរបស់តារាកំប្លែងជើងចាស់រូបនេះ ធ្វើឲ្យមហាជនចងចាំមិនភ្លេចឡើយ ។
ក្នុងចំណោមកូនៗទាំងអស់របស់នាយ សង់ ស៊ីស គេឃើញមានកូនលោកចំនួនពីររូបដែលកំពុងស្នងអាជីពសិល្បៈដូចជារូបផងដែរ ដោយនៅក្នុងនោះ មាននាយ សង់ សេត ជាតារាកំប្លែង និងអ្នកនាង ស៊ុន ស្រីពេជ្រ ជាតារាចម្រៀង ៕
ចែករំលែកព័តមាននេះ