រាជធានីភ្នំពេញ ៖ សមាគមសិល្បករខ្មែរបានចាត់ទុកការរៀបចំពិធីរំលឹកគុណវីរសិល្បកររៀមច្បង ដែលដឹកនាំដោយលោកជំទាវអ្នកឧកញ៉ា ម៉ៅ ចំណាន គិតម៉េង គឺជាព្រឹត្តិការណ៍ដ៏មានអត្ថន័យជ្រាលជ្រៅបំផុត សម្រាប់វិស័យសិល្បៈវប្បធម៌ខ្មែរ ។…
រាជធានីភ្នំពេញ ៖ សមាគមសិល្បករខ្មែរបានចាត់ទុកការរៀបចំពិធីរំលឹកគុណវីរសិល្បកររៀមច្បង ដែលដឹកនាំដោយលោកជំទាវអ្នកឧកញ៉ា ម៉ៅ ចំណាន គិតម៉េង គឺជាព្រឹត្តិការណ៍ដ៏មានអត្ថន័យជ្រាលជ្រៅបំផុត សម្រាប់វិស័យសិល្បៈវប្បធម៌ខ្មែរ ។
សមាគមសិល្បករខ្មែរបានរៀបចំពិធីរំលឹកគុណសិល្បៈរៀមច្បង កាលពីថ្ងៃទី៩ ខែមេសា ឆ្នាំ២០២៦ ដោយមានវត្តអ្នកសិល្បៈចាស់ថ្មីជាច្រើនរូបក្នុងបរិយាកាសយ៉ាងសប្បាយរីករាយ ។ សមាគមសិល្បករខ្មែរ ក៏បានចាត់ទុកព្រឹត្តការណ៍នេះ គឺជាការអនុវត្តជាក់ស្តែងនូវតម្លៃខ្ពង់ខ្ពស់របស់ខ្មែរ គឺ«ការដឹងគុណ» ។
ការដែលសិល្បករជំនាន់ក្រោយចូលទៅសាកសួរសុខទុក្ខ និងរំលឹកគុណចំពោះវីរសិល្បករចាស់ៗ គឺជាការបង្ហាញថា ស្នាដៃ និងការលះបង់របស់បុព្វបុរសសិល្បៈមិនត្រូវបានបំភ្លេចឡើយ ទោះបីពេលវេលាកន្លងផុតទៅយូរប៉ុណ្ណាក៏ដោយ ។
សិល្បកររៀមច្បង មានអារម្មណ៍ថា កក់ក្តៅ មិនឯកោ និងមានមោទនភាពដែលក្មេងៗជំនាន់ក្រោយនៅតែឱ្យតម្លៃ ។ រីឯសិល្បករជំនាន់ក្រោយ មានឱកាសក្រេបជញ្ជក់បទពិសោធន៍ ទូន្មាន និងទទួលបានពរជ័យពីព្រឹទ្ធាចារ្យ ដើម្បីជាទុនក្នុងពង្រឹងសមត្ថភាពខ្លួនឯង ។
សកម្មភាពនេះ ជួយដាស់តឿនស្មារតីសាធារណជនឱ្យងាកមកចាប់អារម្មណ៍ និងស្រឡាញ់សិល្បៈអត្តសញ្ញាណជាតិកាន់តែខ្លាំង ។ សមាគមសិល្បករខ្មែរមិនត្រឹមតែជាកន្លែងប្រមូលផ្តុំអ្នកសិល្បៈប៉ុណ្ណោះទេ ប៉ុន្តែជា«គ្រួសារសិល្បៈ»ដ៏ធំមួយដែលមើលថែគ្នាទៅវិញទៅមក ។
លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរបានសម្តែងនូវការសង្ឃឹមជឿជាក់ថា នៅពេលសិល្បករវ័យក្មេងឃើញពីការយកចិត្តទុកដាក់ចំពោះសិល្បកររៀមច្បង ពួកគេនឹងមានទឹកចិត្តមោះមុតក្នុងការអភិរក្ស និងអភិវឌ្ឍសិល្បៈ ព្រោះពួកគេដឹងថា ការខិតខំប្រឹងប្រែងដើម្បីជាតិ នឹងត្រូវបានសង្គមទទួលស្គាល់ និងផ្តល់តម្លៃជាដរាប ។
សកម្មភាពនេះ ជាការដុតបញ្ឆេះស្មារតីស្រឡាញ់ជាតិ វប្បធម៌ និងការផ្តល់តម្លៃដល់ធនធានមនុស្សដែលជាគ្រឹះដ៏រឹងមាំក្នុងការថែរក្សាកេរដំណែលដូនតាឱ្យនៅគង់វង្ស និងរីកចម្រើនតទៅ
មុខ ៕
ចែករំលែកព័តមាននេះ