រាជធានីភ្នំពេញ ៖ តារាកំប្លែងជើងចាស់លោកតា ហ្វុយ ហ្ស៊ូ ត្រូវបានក្រុមគ្រួសារបញ្ជូនទៅមន្ទីរពេទ្យ ដើម្បីសង្គ្រោះបន្ទាន់ជាថ្មីម្តងទៀត បន្ទាប់ពីស្ថានភាពជំងឺសួតរបស់លោករើឡើងវិញនៅក្នុងរយៈពេលប៉ុន្មានថ្ងៃចុងក្រោយនេះ ។ ក្រោយពេលកំពុងសម្រាកព្យាបាលនៅក្នុងបន្ទប់សង្គ្រោះបន្ទាន់…
រាជធានីភ្នំពេញ ៖ តារាកំប្លែងជើងចាស់លោកតា ហ្វុយ ហ្ស៊ូ ត្រូវបានក្រុមគ្រួសារបញ្ជូនទៅមន្ទីរពេទ្យ ដើម្បីសង្គ្រោះបន្ទាន់ជាថ្មីម្តងទៀត បន្ទាប់ពីស្ថានភាពជំងឺសួតរបស់លោករើឡើងវិញនៅក្នុងរយៈពេលប៉ុន្មានថ្ងៃចុងក្រោយនេះ ។
ក្រោយពេលកំពុងសម្រាកព្យាបាលនៅក្នុងបន្ទប់សង្គ្រោះបន្ទាន់ (ICU) កូនប្រុសរបស់លោកបានបញ្ជាក់ថា ស្ថានភាពឪពុកលោកកំពុងស្ថិតក្នុងដំណាក់កាលតាមដានពីក្រុមគ្រូពេទ្យនៅឡើយក្នុងពេលដែលក្រុមគ្រូពេទ្យតម្រូវឲ្យដាក់អុកស៊ីហ្ស៊ែនជាប់២៤ម៉ោងផងដែរ ។
កូនប្រុសរបស់លោកតា ហ្វុយ ហ្ស៊ូ គឺលោក ឡុង វណ្ណៈ បានអះអាងប្រាប់កោះសន្តិភាពតាមសារអេឡិចត្រូនិចថា បច្ចុប្បន្នឪពុករបស់លោកកំពុងសម្រាកនៅបន្ទប់ ICU ក្នុងមន្ទីរពេទ្យរុស្សី ផ្នែកសួតកំរិតធ្ងន់ ដោយឪពុកលោកមានអាការៈគាត់ក្អកខ្លាំង ហត់ខ្លាំង នឹងកំហាកមានឈាម ។
លោកបញ្ជាក់ថា ឪពុករបស់ត្រូវបានក្រុមគ្រូពេទ្យយកកំហាកទៅបណ្តុះមេរោគ រួចបានប្រើថ្នាំសម្លាប់មេរោគ តែបច្ចុប្បន្នពេទ្យប្រើថ្នាំសម្លាប់មេរោគបណ្តោះអាសន្ន ខណៈពេលស្ថានភាពយ៉ាងណានោះទាល់តែលទ្ធផលពិនិត្យមេរោគចេញមក៥ថ្ងៃទៀត ។
លោកថា បច្ចុប្បន្នគាត់ក្អកម្តងម្កាល តែក្អកខ្លាំងហើយហត់ខ្លាំងនឹងដាក់អុកស៊ីហ្ស៊ែន ជាប់២៤ម៉ោង បើតាមលោក ឡុង វណ្ណៈ ដំបូងពុករបស់លោកត្រូវបាននាំទៅពេទ្យព្យាបាលនៅមន្ទីរពេទ្យឯកជនមួយ ហើយក្រុមគ្រូពេទ្យនៅទីនោះបានអោយថ្នាំលេបបាន៣-៤ដង ស្រាប់តែឪពុកលោកធ្វើទុកខ្លាំង ដង្ហក់យកតែម្តង ទើបគេអោយបញ្ជូនមកពេទ្យរុស្សី ពីព្រោះនៅពេទ្យរុស្សីមានឧបករណ៍សង្គ្រោះគ្រប់គ្រាន់ ។
លោកបញ្ជាក់ថា ឪពុកលោកធ្លាប់ឈឺសួត (របេង) កាល៣០ឆ្នាំមុន ហើយសួតគាត់ខូចខាតស្រាប់ ហើយឥឡូវគាត់ទើបព្យាបាលថ្លើមរួចកាលពីខែមុនទើបធ្វើអោយអង់ទីគ័រគាត់ចុះខ្សោយ បណ្តាលអោយងាយឆ្លងមេរោគ ណាមួយគាត់ធ្លាប់ឈឺសួតហើយ សួតខូចស្រាប់ផង ទើបបណ្តាលអោយគាត់ឈឺធ្ងន់ភ្លាមៗត្រឹមតែ៥ថ្ងៃនេះ ។
យ៉ាងណាសម្រាប់ស្ថានភាពជំងឺឪពុករបស់លោកនាពេលនេះ លោកមិនទាន់ដឹងថា ឪពុកលោកនឹងត្រូវសម្រាកព្យាបាលនៅមន្ទីរពេទ្យរយៈពេលប៉ុន្មានថ្ងៃនោះឡើយ ពោល គឺអាស្រ័យលើក្រុមលោកគ្រូពេទ្យដែលកំពុងតាមដានជំងឺនៅឡើយ ។
ជាការកត់សម្គាល់ នេះមិនមែនជាលើកទីមួយទេ ដែលតារាកំប្លែងជើងចាស់លោក ហ្វុយ ហ្ស៊ូ ត្រូវបានក្រុមគ្រូពេទ្យបញ្ជូនទៅមន្ទីរពេទ្យសង្គ្រោះបន្ទាន់ ពោលកន្លងមកលោកក៏ត្រូវបានក្រុមគ្រួសារបញ្ជូនទៅសង្គ្រោះបន្ទាន់ដូចគ្នានេះ បន្ទាប់ពីលោកបានពើបប្រទះនូវជំងឺរលាកសួតរ៉ាំរ៉ៃ និងមានទឹកដក់ក្នុងសួត ហើយនឹងរលាកតម្រង់នោមផងដែរ ។ ក្នុងវ័យ៨២ឆ្នាំ លោកស៊ូ សាវ៉ាង ហៅតា ហ្វុយ ហ្ស៊ូ បានប្រឡូកក្នុងសិល្បៈអស់ជាច្រើនឆ្នាំ ហើយក្រៅពីអាជីពសម្តែងលោកក៏ជាគ្រូបង្ហាត់បង្រៀនសិល្បៈដូចក្មេងជំនាន់ក្រោយនៅក្នុងក្លឹបសិល្បៈដែលបង្កើតឡើងដោយរូបលោកផ្ទាល់ផងដែរ ។
យ៉ាងណា ក្រោយស្ថានភាពជំងឺរួមរិត រួមផ្សំនឹងភាពចាស់ជរាផងនោះ លោកក៏បានឲ្យកូនប្រុសរបស់លោក គឺលោក ឡុង វណ្ណះ ជាអ្នកស្នងដឹកនាំក្រុមសម្តែងសិល្បៈរបាំជំនួសលោករហូតមកដល់បច្ចុប្បន្ននេះ ៕
ចែករំលែកព័តមាននេះ