សារព័ត៌មាន PEOPLE ចុះផ្សាយនៅថ្ងៃទី១៩ ខែវិច្ឆិកា ឆ្នាំ២០២៦ តារាភាពយន្តហូលីវូដដ៏ល្បីល្បាញ គឺលោកស្រី អេនជឺលីណា ជូលី (Angelina Jolie) មានគម្រោងនាំយកគម្រោងសិល្បៈ និងច្នៃម៉ូដសម្លៀកបំពាក់ Atelier Jolie មកបង្កើតកម្មវិធី និងផ្លាស់ប្តូរបទពិសោធន៍ផ្នែកសិល្បៈនៅកម្ពុជា នៅឆ្នាំ២០២៧ ។

ប្រភពដដែលបានរាយការណ៍ថា កម្មវិធី Atelier Jolie ដែលជាគម្រោងសហគមន៍ច្នៃប្រឌិតរបស់លោកស្រី បង្កើតឡើងនៅទីក្រុងញូវយ៉ក សហរដ្ឋអាមេរិក ក្នុងឆ្នាំ២០២៣ ដោយមានគោលបំណងប្រមូលផ្តុំអ្នកកាត់ដេរ អ្នករចនាម៉ូដ សិល្បករ និងសិប្បករ ដើម្បីបង្កើតស្នាដៃថ្មីៗ និងលើកកម្ពស់ការច្នៃម៉ូដប្រកបដោយចីរភាព គ្រោងបង្កើតនូវកម្មវិធី Atelier Jolie Residency នៅកម្ពុជានៅឆ្នាំក្រោយ ដើម្បីផ្តល់ឱកាសដល់អ្នកច្នៃប្រឌិត សិល្បករ អ្នករចនាម៉ូដ និងសិប្បករ ក្នុងការជួបជុំផ្លាស់ប្តូរចំណេះដឹង និងបង្ហាញស្នាដៃសិល្បៈ ។

ប្រភពដដែលបានបន្តថា គម្រោងនេះនឹងសហការជាមួយមជ្ឈមណ្ឌលបុប្ផាណា ដែលជាអង្គការមិនរកប្រាក់ចំណេញរបស់ផលិតករ និងអ្នកដឹកនាំភាពយន្តកម្ពុជា លោក រិទ្ធី ប៉ាន់ ព្រមទាំងមូលនិធិ Maddox Foundation របស់លោកស្រី ។
គួររំលឹកថា ក្រោយពេលលោកស្រីលក់លំនៅស្ថាន ដ៏ប្រណីតមួយនៅទីក្រុងឡូសអេនជឺឡេស របស់លោកស្រីបានសម្រេចនាពេលថ្មីៗនេះ តារាភាពយន្ត វ័យ៥១ឆ្នាំ រូបនេះ បានធ្វើដំណើរមកកម្ពុជា ដោយលោកស្រីក៏បានចូលថ្វាយបង្គំ សម្ដេចព្រះមហាសុមេធាធិបតី សម្ដេចសង្ឃនាយក អំ លឹមហេង នៅវត្តចំពុះក្អែក កាលពីថ្ងៃទី១៥ ខែវិច្ឆិកា ឆ្នាំ២០២៦ថ្មីៗនេះផងដែរ ៕



ចែករំលែកព័តមាននេះ