ADផ្ទាំងផ្សព្វផ្សាយពាណិជ្ជកម្ម

Picture

ប្រាសាទ​អង្គរ និង​ប្រាសាទបូ​រ៉ូ​ប៊ូ​ឌួ​រ បទ​ពិសោធ​ការ​ទស្សនា​ខុស​គ្នា

1 ថ្ងៃ មុន
  • ភ្នំពេញ

រាជធានី​ភ្នំពេញ​៖ ការ​ទស្សនា​ប្រាសាទ​បូ​រ៉ូ​ប៊ូ​ឌួ​រ (Borobudur) នៅ​តំបន់​ជ្វា​កណ្ដាល ប្រទេស​ឥណ្ឌូ​ណេ​ស៊ី ជា​ឱកាស​មួយ​ដ៏​ល្អ​ក្នុង​ការ​ឈ្វេងយល់​អំពី​ប្រព័ន្ធ​គ្រប់គ្រង​ភ្ញៀវ​ទេសចរ និង​ការ​រៀបចំ​ការ​ទស្សនា​នៅ​ប្រាសាទ​ព្រះពុទ្ធ​សាសនា​ដ៏​សំខាន់​មួយ​នៃ​តំបន់​អាស៊ី​អាគ្នេយ៍ ។

បើ​តាម​វិទ្យាស្ថាន​មនុស្ស​សាស្ត្រ និង​វិទ្យាសាស្ត្រ​សង្គម តម្លៃ​សំបុត្រ​សម្រាប់​ភ្ញៀវ​បរទេស​គឺ​៤៥០.០០០​រូពី​ឥណ្ឌូ​ណេ​ស៊ី (​ប្រមាណ​២៧ ដុល្លារ​អា​មេ​រិ​ក​) ដោយ​កំណត់ពេល​ទស្សនា​តាម​ក្រុម និង​មាន​មគ្គុទ្ទេសក៍​នាំ​ផ្លូវ ចាប់ពី​ម៉ោង ៨:៣០​ដល់​ម៉ោង​១០​ព្រឹក ។ ភ្ញៀវ​ទេសចរ​ត្រូវ​ដើរ​តាម​ផ្លូវ​ដែល​បាន​កំណត់ ដើម្បី​គ្រប់គ្រង​ចំនួន​ភ្ញៀវ និង​កាត់​បន្ថយ​ផល​ប៉ះពាល់​លើ​សំណង់​ប្រាសាទបុរាណ ។
ចំណែក​នៅ​តំបន់​រមណីយដ្ឋាន​អង្គរ ក្នុង​ប្រទេស​កម្ពុជា ភ្ញៀវ​ទេសចរ​បរទេស​អាច​ទិញ​សំបុត្រ​ចូល​ទស្សនា​រយៈពេល​មួយ​ថ្ងៃ ក្នុង​តម្លៃ ៣៧​ដុល្លារ​អា​មេ​រិ​ក ហើយ​អាច​ជ្រើសរើស​ទៅ​ទស្សនា​ប្រាសាទ​ជា​ច្រើន​នៅ​ក្នុង​តំបន់​អង្គរ ពេញ​មួយ​ថ្ងៃ ដោយ​គោរព​តាម​ម៉ោង​បើក និង​បិទ​នៃ​ប្រាសាទ នីមួយ​ៗ ។

ជាមួយនឹង​ភាព​ខុស​គ្នា​នៃ​តម្លៃ​សំបុត្រ តំបន់​អង្គរ​ផ្ដល់​ឱកាស​ដ៏​ពិសេស​ដល់​ភ្ញៀវ​ទេសចរ​ក្នុង​ការ​ឈ្វ​ង​យល់​ពី​សំណង់​ស្ថាបត្យកម្ម និង​ប្រវត្តិសាស្ត្រ​ដ៏​សម្បូរ​បែប មិន​ត្រឹមតែ​ប្រាសាទអង្គរវត្ត​ប៉ុណ្ណោះ​ទេ ប៉ុន្តែ​ថែម​ទាំង​ប្រាសាទបាយ័ន ប្រាសាទតាព្រហ្ម ប្រាសាទព្រះខ័ន ប្រាសាទបន្ទាយស្រី និង​ប្រាសាទ​ជា​ច្រើន​ទៀត ។

ទាំង​ប្រាសាទ​បូ​រ៉ូ​ប៊ូ​ឌួ​រ និង​តំបន់​អង្គរ សុទ្ធតែ​ជា​សម្បត្តិ​បេតិកភណ្ឌ​ពិភពលោក​ដ៏​មាន​តម្លៃ ដែល​មាន​លក្ខណៈ​ពិសេស រៀង​ៗ​ខ្លួន ទាំង​ផ្នែក​ប្រវត្តិសាស្ត្រ ស្ថាបត្យកម្ម សាសនា និង​ទេសភាព​វប្បធម៌ ។ ភាព​ខុស​គ្នា​នៃ​ប្រព័ន្ធ​គ្រប់គ្រង​ភ្ញៀវ​ទេសចរ​នៅ​តំបន់​ទាំង​ពីរ ក៏​ឆ្លុះ​បញ្ចាំង​ពី​លក្ខណៈ​ពិសេស និង​តម្រូវការ​អភិរក្ស​បេតិកភណ្ឌរ​បស់ទីតាំង នីមួយ​ៗ ។

ប្រភព​ដដែល​បន្ត​ថា បទ​ពិសោធន៍​នៃ​ការ​ទស្សនា​ប្រាសាទ​បូ​រ៉ូ​ប៊ូ​ឌួ​រ បាន​ជំរុញ​ឱ្យ​យើង​កាន់តែ​យល់​ច្បាស់​អំពី​តម្លៃ និង​សក្ដានុពល​ដ៏​ធំធេង​នៃ​តំបន់​អង្គរ ។ តំបន់​អង្គរ​មិន​ត្រឹមតែ​សម្បូរ​ទៅ​ដោយ​សំណង់​ប្រាសាទបុរាណ​ដ៏​អស្ចារ្យ​ប៉ុណ្ណោះ​ទេ ប៉ុន្តែ​ថែម​ទាំង​មាន​ទេសភាព​វប្បធម៌ ប្រពៃណី​ទំនៀមទម្លាប់ និង​បរិស្ថាន​ធម្មជាតិ​ដ៏​សម្បូរ​បែប ដែល​ផ្ដល់​ឱកាស​ឱ្យ​ភ្ញៀវ​ទេសចរ​ទទួល​បាន​បទ​ពិសោធន៍​ចម្រុះ ទាំង​ការ​ទស្សនា ការ​សិក្សា​ឈ្វេងយល់ និង​ការ​ឈ្វេងយល់​អំពី​ជីវភាព​រស់នៅ​របស់​សហគមន៍​មូលដ្ឋាន ។

អង្គរ​មិន​ត្រឹមតែ​ជា​តំបន់​បេតិកភណ្ឌ​ពិភពលោក​ដ៏​មាន​តម្លៃ​ផ្នែក​ប្រវត្តិសាស្ត្រ និង​វប្បធម៌​ប៉ុណ្ណោះ​ទេ ប៉ុន្តែ​ក៏​ជា​គោលដៅ​ទេសចរណ៍វប្បធម៌​ដ៏​ទាក់ទាញ​មួយ​នៅ​អាស៊ី​អាគ្នេយ៍ ដែល​ផ្ដល់​ឱកាស​ឱ្យ​ភ្ញៀវ​ទេសចរ​ទស្សនា​ប្រាសាទ​ជា​ច្រើន​ក្នុង​រយៈពេល​មួយ​ថ្ងៃ ៕